අර්බුදය නිර්මාණය කළ අයම අර්බුදයෙන් රට ගොඩගන්නා බව කියනවා - වෛද්‍ය වසන්ත බණ්ඩාර..., සිටින පිරිසේම කවුරුන් හෝ නායකත්වයට ගෙන ඒමෙන් අර්බුදය විසඳන්න බැහැ - උවිඳු විජේවීර

Dec 28, 2023 at 05:29 PM

|

Lanka Leader

ඕනෑම සමාජයක් අර්බුදයකට මුහුණ දී ජනතාව දැඩි පීඩාවට ලක්වීමේ දී එම ජනතාවට තම සුන්දර සිහින අමතක වී මහජන මනස හැකිලී, මහජනයා කුරුමිට්ටකු බවට පත්කරන මානසික තත්ත්වයක් නිර්මාණය වන බවත්, එහිදී ඔවුන්ව ඉතා පහසුවෙන් රැවටිය හැකි බවත් දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා පවසයි.

'නයෝමි ක්ලේම්' නම් කතුවරිය විසින් ද මේ තත්ත්වය පිළිබඳව තම කෘතියකින් පෙන්වා දී ඇති බවත්, ජනතාව මෙයින් ගලවා ගැනීමට නම් අනිවාර්යෙන්ම ඔවුන්ට යථාර්ථය වටහාදිය යුතු බවත් වසන්ත බණ්ඩාර මහතා සඳහන් කරයි.

වෛද්‍ය වසන්ත බණ්ඩාර මහතා සහ දෙවන පරපුරේ සංවිධානයේ නායක උවිඳු විජේවීර මහතා සහභාගි වූ රූපවාහිනී සාකච්ඡාවක දී ඒ මහතා මේ බව සඳහන් කළේය.

රටේ අර්බුදයක් නිර්මාණය කළ මිනිසුන්ම අර්බුදයෙන් රට ගොඩගන්නා බව පවසමින් මැතිවරණ ව්‍යාපාරයේ යෙදෙන බවද, ඔවුන්ට ඡන්දය දීමට මහජනයා සූදානම් දැයි ප්‍රශ්න කළ යුතු බවද වසන්ත බණ්ඩාර මහතා මෙහිදී පැවසීය.

මෙරට ඓතිහාසික සභ්‍යත්ව උරුමය, ස්වභාවික සම්පත් හා මානව සම්පතේ ඇති සුවිශේෂී දක්ෂතා යොදාගනිමින් රට වැටී ඇති තැනින් ගොඩ ගත හැකි වුවද පවතින ආර්ථික හා සමාජීය මොඩලය තුළ මෙය කළ නොහැකි බවද ඒ මහතා මෙහිදී පෙන්වා දෙන ලදී.

මෙම සාකච්ඡාවට එක්වෙමින් උවිඳු විජේවීර මහතා පැවසුවේ පවතින අර්බුදය මේ මොහොතේ නිර්මාණය වූවක් නොවන බවත්, ඉතිහාසයේ සිට මෙම අර්බුදය ක්‍රමක්‍රමයෙන් පැන නැගුනු තත්ත්වයක් බවත්ය.

අර්බුදය විසඳිය හැක්කේ නිවැරදි දැක්මක් හා චින්තනයක් මත බවත්, ඒ සදහා ජනතාවට නිවැරදි චින්තනයක් හා දැක්මක් ලබාදියුතු බවත් පවසන උවිඳු විජේවීර මහතා, ඉදිරි මැතිවරණයක දී ද සිටින පිරිසේම කවුරුන් හෝ නායත්වයට ගෙන ඒමෙන් මෙම අර්බුදය ජයගත නොහැකි බවද පෙන්වා දෙන ලදී.

සවිස්තරාත්මක වීඩියෝව නරඹන්න...