මහ බැංකු අධිපති ආර්ථිකයේ "ලෑන්ඩින් ගියර්" එක හිරකරලා "පැරෂුට්" එකෙන් පනිනවා.. - ජාතික සංවිධාන පුරෝකථනයක

Jun 2, 2026 at 12:35 PM

|

Lanka Leader

"මහ බැංකුව මුදල් අච්චු ගහන්නේ නැහැ නමුත් නෝට්ටු මුද්‍රණය කරන්න පුලුවන්" වැනි තාක්ෂණික ප්‍රකාශ කරමින් මූල්‍ය පද්ධතියේ සැබෑ තත්ත්වය වසන් කරන බවට විවිධ පාර්ශ්ව විසින් චෝදනා එල්ල වී තිබේ. 

ඒ පිළිබඳව ලංකා ලීඩර් ජාතික සංවිධානවල මතය විමසන ලදී. මේ වෛද්‍ය වසන්ත බණ්ඩාර මහතාගේ අදහස් ඔහුගේ වචනයෙන්,

"පළමුවෙන්ම ඔහු තමයි ඒක පාර්ශ්වයීයව සහ හිතුවක්කාර ලෙස මුදල් පාලන බලය හිමි පාර්ලිමේන්තුවේ කිසිඳු සාකච්ඡාවකින් තොරව බංකොලොත් භාවය ප්‍රකාශයට පත්කළේ. ඉන්පසුව 2023 දී නව මහ බැංකු පනත මගින් ආණ්ඩුවට මහ බැංකුවෙන් ණය ගැනීමට නොහැකිවන ආකාරයට ආණ්ඩුවේ ගෙල හිරකරන ක්‍රියාවලිය පිටුපස ඔහු හිටියා. ඒ මගින් ආණ්ඩුවට මූල්‍ය වෙළෙඳපොලෙන් පමණක් ණය ගැනීමට සිදුවීම නිසා දේශීය ණය ප්‍රමාණය බිලියන 20,000ක් ඉක්මවා ගිහින් තිබෙනවා. එවැනි තත්ත්වයක් තිබියදී ඔහු කියනවා ආණ්ඩුවට මුදල් අතිරික්තයක් තිබෙනවා කියලා. ඒ 20,000න් 5000ක් වසරකදී ආපසු ගෙවියයුතු භාණ්ඩාගාර බිලිපත්. එවැනි තත්ත්වයක් තිබියදී මුදල් අතිරික්ත කතාවක් කියන්නේ කොහොමද?.

ඔහු එක පැත්තකින් සත්‍ය සඟවනවා. ඊට අමතරව බොරු කීමත් වරදක්. එසේම ඔහු ඒකපාර්ශ්වීයව ගන්නා සමහර තීන්දු වලින් අර්බුදය තවදුරටත් උග්‍රවන බව ඉතා පැහැදිලියි.

ඔහු අළුත් නෝට්ටු මුද්‍රණය කරලා තිබෙනවා. ඒ මගින් වෙළෙඳපොළෙන් ඩොලර් මිලදී ගන්නවා. ඒ මගින් එක පැත්තකින් උද්ධමනය වැඩි වෙනවා. රුපියල කඩා වැටෙනවා, භාණ්ඩ මිල ඉහළ යනවා. ඔහු මේ සත්‍ය වසන් කරනවා. ඊට අමතරව පොලී අනුපාත වැඩි කිරීම මගින් ට්‍රිලියන 11. 2 (මිලියන 11,200 ක්) වූ පුද්ගලික ණය හිමියන්ගේ ණය පොලී වැඩි වෙනවා. ඔවුන්ට ණය ගෙවාගැනීමට නොහැකි වෙනවා. බැංකුත් අමාරුවේ වැටෙනවා. ආර්ථිකය හැකිලෙනවා.

ආණ්ඩුවට මහ බැංකුවෙන් ණය ගැනීමට නොහැකි නිසා වැඩි පොලියට දේශීය ණය වෙළෙඳපොළෙන් ණය අරගෙන, ගත් ණය ආපසු ගෙවන්නත් සිදු වෙලා තිබෙනවා. එම තත්ත්වය තුළ මූල්‍ය පද්ධතියේ බරපතළ කඩා වැටීමක් සිදුවිය හැකියි. ඔහුගේ ක්‍රියාකලාපය අනුව පෙනී යන්නේ ආර්ථිකය හෙවත් ආණ්ඩුව වාඩිවී සිටින ගුවන් යානය කඩා වැටෙන බව ඔහු දන්නවා. ඔහු දැන් අනුමාන කරන්නේ යානය ගොඩබැස්වීමට නොහැකි වන ලෙස 'ලෑන්ඩින් ගියර්' හිර කරලා කඩා වැටීමට මොහොතකට පෙර පැරෂුටයෙන් පැනීමේ උපායක් බව ඉතා පැහැදිලියි."