සනත් ජයසූරිය ඉල්ලා අස්වේ..

May 23, 2026 at 07:06 AM

|

Lanka Leader

හිටපු ශ්‍රී ලංකා ක්‍රිකට් ක්‍රීඩක සනත් ජයසූරිය ශ්‍රී ලංකා ක්‍රිකට් උසස් දක්ෂතා මධ්‍යස්ථානයේ උපදේශක තනතුරෙන් මෙම මස අවසානයේ සිට ක්‍රියාත්මක වන පරිදි ඉල්ලා අස්වීමට නියමිතය.

ඔහු මාතර දිස්ත්‍රික් ක්‍රිකට් සංගමයේ සභාපතිවරයා ලෙසද කටයුතු කරන බැවින්, තනතුරු දෙකක් දැරීම ළබැඳියාවන් අතර ගැටුමක් (conflict of interest) බවට අලුතින් පත් වූ ක්‍රිකට් පරිවර්තන කමිටුවේ සාමාජිකයින් පිරිසක් මතුකළ ගැටලු හේතුවෙන් ඔහු මෙම තීරණය ගෙන ඇත.

සනත් ජයසූරිය පවසන්නේ, තමන් මෙම තනතුර භාරගත්තේ රැකියාවක් අවශ්‍ය නිසා නොව, ජාතික කණ්ඩායම පසුබෑමකට ලක්ව සිටි දුෂ්කර අවස්ථාවක උපකාර කිරීමට බවයි.

ප්‍රධාන පුහුණුකරු ලෙස කටයුතු කළ කාලය සිහිපත් කරමින් ඔහු පවසන්නේ, කණ්ඩායම අසාර්ථක වී කිසිවෙකු එම වගකීම භාරගැනීමට අකමැති වූ මොහොතක තමන් එය භාරගත් බවයි.

එහිදී දේශීය පුහුණුකරුවන් සහ ක්‍රීඩකයන් සමඟ එක්ව ඉන්දියාව, නවසීලන්තය, බටහිර ඉන්දීය කොදෙව් සහ ඕස්ට්‍රේලියාවට එරෙහිව ජයග්‍රහණ රැසක් ලබාගැනීමට හැකි වූ බව ඔහු පෙන්වාදෙයි.

විස්සයි20 ලෝක කුසලාන තරගාවලියෙන් කණ්ඩායම ඉවත් වීම පිළිබඳව අදහස් දක්වමින් ඔහු පවසන්නේ, ක්‍රීඩකයන්ගේ ආබාධ සහ තම පාලනයෙන් බැහැරව සිදුවූ ව්‍යුහාත්මක වෙනස්කම් සැලසුම්වලට බාධාවක් වූ බවයි.

එසේ වුවද, එහි වගකීම භාරගනිමින් තමන් මීට පෙර පුහුණුකරු ධුරයෙන් ඉල්ලා අස්වූ බව ඔහු සිහිපත් කරයි.

මාතර ක්‍රිකට් සංවර්ධනය තමන්ට ඉතා වැදගත් බවත්, එහි කිසිදු ළබැඳියාවන් අතර ගැටුමක් නොදකින බවත් පවසන සනත් ජයසූරිය, නව පාලනාධිකාරියට බාධාවක් නොවනු පිණිස තමන් මාතර ක්‍රිකට් වෙනුවෙන් පමණක් ඉදිරියටත් කැපවන බව ප්‍රකාශ කර සිටියි.

ශ්‍රී ලංකා ක්‍රිකට් ක්‍රීඩාවට සහාය දීමට තමන්ට නිල තනතුරු අවශ්‍ය නොවන බවද ඔහු වැඩිදුරටත් සඳහන් කරයි.