සුනාමි ඇවිත් කළ විනාශයට වසර 19යි

Dec 26, 2023 at 06:54 AM

|

Lanka Leader

2004 වසරේ දෙසැම්බර් 26 වැනිදා සිදු වූ සුනාමි ව්‍යසනයට අදට වසර 19 ක් සපිරේ. 

මේ විපත නිසා ශ්‍රී ලංකාවේ මිනිස් ජීවිත 31,225 කට වැඩි ප්‍රමාණයක්ද ඇතුළුව ලොව පුරා 2,25,000කට අධික පිරිසකට තත්පර කිහිපයකදී දිවි අහිමි විය.

පෙරවරු 9.27ට ගොඩබිමට පැමිණි උදම් රළ පහරට හසු වූ පැරෑලියේ දුම්රිය අනතුර නිසා 1250කට අධික පිරිසක් මියගියහ. තනි දුම්රියක සිදු වූ ලෝකයේ දරුණුම දුම්රිය අනතුර මෙය ලෙස සැලකේ.

සුනාමියේ දී වැඩිම හානිය සිදු වූ රට ඉන්දුනීසියාවය. එරට පුද්ගලයන් 167,540ක් මෙම ඛේදවාචකයෙන් මියගියහ. 

සුනාමි තත්ත්වය ඇති වූයේ ශ්‍රී ලංකාවට කි.මී. 2500ක් පමණ නැගෙනහිරින් පිහිටි සුමාත්‍රා දිවයිනට කි.මී. 200ක් බටහිර මුහුදේ කිලෝ මීටර් 10කට ඇති වූ භූමිකම්පාවකිනි. මෙය රිච්ටර් මාපකයේ ඒකක 9.3ක් ලෙස සලකුණු කර ඇත. මෙම භූමිකම්පාව මෙතෙක් ලොව වාර්තා වූ දෙවැනි විශාලම භූමිකම්පාව වන අතරම මෙතෙක් ලොව ඇතිවූ භූමිකම්පා අතරින් එක් සිදුවීමකින් වැඩිම ජීවිත හා දේපළ හානි සිදු වූ විශාලම ස්වාභාවික ආපදාව ද විය.

මේ අතර, සුනාමි ඛේදවාචකයෙන් දිවි අහිමි වූ සියලු දෙනා සිහිපත් කිරීම වෙනුවෙන් අද දින සැමරුම් වැඩසටහන් රැසක් සංවිධානයකොට තිබේ.

ප්‍රධාන සැමරු වැඩසටහන ගාල්ල හික්කඩුව තෙල්වත්ත පැරෑලිය සුනාමි ස්මාරකය අබියසදී ලබන පෙරවරු 08.30 පැවැත්වීමට නියමිතයි.

ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන් මහතාගේ ප්‍රධානත්වයෙන් සහ ආරක්ෂක ලේකම් විශ්‍රාමික ජෙනරාල් කමල් ගුණරත්න මහතාගේ සහභාගිත්වයෙන් මෙම සැමරුම් උස්සවය පැවැත්වීමට නියමිතව ඇත.

මීට සමගාමීව දිස්ත්‍රික් මට්ටමින් රට පුරා සැමරුම් සංවිධානය කර තිබේ.