රුපියල දුර්වල වීම නිසා දේශීය උද්ධමනය, ඉන්ධන හා බලශක්ති පිරිවැය ඉහළ යා හැකි බවට පුරෝකථන..

May 20, 2026 at 10:17 AM

|

Lanka Leader

අමෙරිකානු ඩොලරයේ අගය රුපියල් 330 සීමාව ඉක්මවා යාමෙන් පෙන්නුම් කරන්නේ ශ්‍රී ලංකා රුපියල මත දිගින් දිගටම පවතින පීඩනය යැයි ඒකාබද්ධ ඇඟලුම් සංගම් සංසදයේ (Joint Apparel Association Forum) මහලේකම් යොහාන් ලෝරන්ස් අවධාරණය කරයි.

රුපියල දුර්වල වීම හේතුවෙන් ඉන්ධන සහ බලශක්ති වැනි පිරිවැය තවදුරටත් ඉහළ යන අතර, එය දේශීය උද්ධමනය ඉහළ යාමට ද හේතු වන බවයි ඔහු ඉංග්‍රීසි පුවත්පතකට පවසා ඇත්තේ.

"කෙටි කාලීනව බලන විට, රුපියල දුර්වල වීම අපනයනකරුවන්ට වාසියක් වන්නේ එය අපනයන වඩාත් තරගකාරී කරන නිසයි. කෙසේ වෙතත්, එය රුපියල්වලින් ගෙවිය යුතු පිරිවැය ඉහළ යාමට ද හේතු වන අතර, එමගින් අර කියපු වාසි නැති වී යා හැකියි. අපට අවශ්‍ය කරන්නේ යථාර්ථවාදී මට්ටමක පවතින ස්ථාවර මුදල් ඒකකයක්," යනුවෙන් ඔහු පවසා තිබේ.

ශ්‍රී ලංකා ක්ෂුද්‍ර, කුඩා හා මධ්‍ය පරිමාණ ව්‍යවසායක (MSME) මණ්ඩලයේ විධායක කමිටු සාමාජික සෙල්වරාජා තුමිලන් මෙම පුවත්පතට ප්‍රකාශ කර ඇත්තේ, ඉන්ධන ආනයනය සීමා කිරීම, බලශක්ති ආරක්ෂණ භාවය ශක්තිමත් කිරීම, විදේශ විනිමය සංචිත මත පවතින පීඩනය ලිහිල් කිරීම සහ දිගුකාලීන ආර්ථික හා පාරිසරික තිරසාරභාවයට සහය වීම සඳහා ශ්‍රී ලංකාව විකල්ප බලශක්තිය කෙරෙහි අවධානය යොමු කළ යුතු අතර විද්‍යුත් වාහන වෙත මාරුවීමේ ක්‍රියාවලිය වේගවත් කළ යුතු බවයි.

කලාපයේ ඉහළම නිෂ්පාදන පිරිවැය ව්‍යුහයන්ගෙන් එකක් පවත්වා ගෙන යන අතරතුර ශ්‍රී ලංකාවට තිරසාර කාර්මිකකරණයක් ළඟා කර ගත නොහැකි බව ඔහු වැඩිදුරටත් ප්‍රකාශ කර තිබේ.

ඔහුට අනුව, ඉහළ බලශක්ති මිල ගණන්, මූල්‍ය පිරිවැය (ණය පොලී), බදු, ප්‍රවාහන හා සැපයුම් ක්ෂේත්‍රයේ පවතින අකාර්යක්ෂමතාවය සහ ප්‍රතිපත්තිමය අස්ථාවරත්වය හේතුවෙන් දේශීය කර්මාන්ත සහ ක්ෂුද්‍ර, කුඩා හා මධ්‍ය පරිමාණ ව්‍යවසායයන්ගේ තරගකාරීත්වය අඛණ්ඩව පහළ වැටී, ආයෝජන අධෛර්යමත් වී, අපනයන දුර්වල වෙමින් පවතින අතර ඒ මත දැඩි පීඩනයක් එල්ල වී ඇති බව සඳහන්.