විමල් ගැන පොලිසිය දැමූ FB සටහනට සමාජ මාධ්‍ය ක්‍රියාකාරීන්ගෙන් දැඩි ප්‍රහාරයක්.. උතුරට වෙනම නීතියක්දැයි ප්‍රශ්න කරයි..

May 19, 2026 at 09:47 AM

|

Lanka Leader

ජාතික රණවිරු සැමරුම් දිනය වෙනුවෙන් පාර්ලිමේන්තු ක්‍රීඩාංගණයේ පිහිටි රණවිරු ස්මාරකය අභියස සංවිධානය කර තිබූ පෙරහුරු කටයුතු වලට සහ රාජකාරියේ නිරත නිලධාරීන්ට බාධා කිරීමේ සිද්ධියක් සම්බන්ධයෙන් හිටපු පාර්ලිමේන්තු මන්ත්‍රී විමල් වීරවංශ මහතා ඇතුළු 35 දෙනෙකුගෙන් සමන්විත කණ්ඩායමකට එරෙහිව ඉදිරි අධිකරණ ක්‍රියාමාර්ග ගැනීමට නියමිත බව ශ්‍රී ලංකා පොලිසිය පවසයි.

පොලිස් මාධ්‍ය කොට්ඨාසය නිල නිවේදනයක් නිකුත් කරමින් සඳහන් කරන්නේ ජනාධිපතිතුමාගේ ප්‍රධානත්වයෙන් පැවැත්වීමට නියමිත ප්‍රධාන උත්සවයේ කටයුතු සහ පෙරහුරු මැයි 18 වනදා සිදු කෙරෙමින් පවතිද්දී, මෙම පිරිස අනවසරයෙන් එම භූමියට ඇතුළු වීමට උත්සාහ කර ඇති බවයි.

එහිදී ක්‍රියාත්මක වූ පොලිස් නිලධාරීන් එම උත්සාහය ව්‍යර්ථ කර, රැඳී සිටි පිරිස එම ස්ථානයෙන් ඉවත් කිරීමට කටයුතු කර තිබේ.

පොලිසිය විසින් මේ පිළිබඳව තැබූ නිල සමාජ මාධ්‍ය සටහනත් සමඟ, ඊට ප්‍රතිචාර දක්වමින් මහජන විරෝධයක් සහ දැඩි කතාබහක් නිර්මාණය වී ඇත.

පරිශීලකයන් රැසක් චෝදනා කරන්නේ පොලිසිය නීතිය ක්‍රියාත්මක කිරීමේදී දකුණට සහ උතුරට පක්ෂග්‍රාහී ලෙස “ද්විත්ව ප්‍රතිපත්තියක්” අනුගමනය කරන බවයි.

යාපනය ඇතුළු උතුරු ප්‍රදේශවල මෑතකදී ආරක්ෂක හිස්වැසුම් (හෙල්මට්) රහිතව යතුරුපැදිවලින් ගමන් කරමින් කළ නොසන්සුන් හැසිරීම් සහ උත්සව මැඩපැවැත්වීමට පොලිසිය අසමත් වූ බවට ජනතාව චෝදනා කරති. බයිසිකල් අංක තහඩු පවා පැහැදිලිව පෙනෙන්නට තිබියදී උතුරේ අයට එරෙහිව නීතිය ක්‍රියාත්මක නොවන්නේ මන්දැයි ඔවුහු ප්‍රශ්න කරති.

පසුගිය දිනවල දකුණේ තරුණියන් පිරිසක් සහ කලාකරුවන් පිරිසක් හෙල්මට් නොමැතිව ගමන් ගත් වීඩියෝ පට උපයෝගී කරගෙන වහාම රුපියල් 20,000ක දඩ මුදල් නියම කිරීමට පොලිසිය කටයුතු කළ ආකාරය පෙන්වා දෙන පරිශීලකයන්, නීතිය සැමට සමාන විය යුතු බව අවධාරණය කර සිටිති.

- lankacnews