මත්තල ගුවන්තොටුපලේ ආයෝජනය කිරීම සඳහා අභිලාෂ කැඳවීම ඉන්දියාවේ විශේෂ අවධානයට..

May 18, 2026 at 02:20 PM

|

Lanka Leader

ලංකාවේ උපායමාර්ගික වශයෙන් වැදගත් ජාත්‍යන්තර ගුවන් ගුවන්තොටුපළක් තම පාලනයට ගැනීමේ අවස්ථාවක් උදාවී ඇති බව ඉන්දීය පුවත්පතක් වන Times of India පුවත්පත අද දින(2026 මැයි 18) වාර්තා කර ඇත.

වත්මන් රජය විසින් ශ්‍රී ලංකාවේ ගුවන් සේවා ක්ෂේත්‍රය පුනර්ජීවනය කිරීමට සහ දකුණු පළාතේ ආර්ථික වර්ධනය උත්තේජනය කිරීමේ තීරණාත්මක පියවරක් ලෙස, මත්තල රාජපක්ෂ ජාත්‍යන්තර ගුවන්තොටුපළ (MRIA) සඳහා දේශීය හා විදේශීය ආයෝජකයින් ආකර්ෂණය කර ගැනීමේ පරමාර්ථයෙන් වරාය, නාවික හා ගුවන් සේවා අමාත්‍යාංශය විසින් විවිධ අංශ කිහිපයක් යටතේ ආයෝජනය කිරීම සඳහා දේශීය සහ විදේශීය ආයෝජකයින්ගෙන් අභිලාෂ කැඳවා ඇත. 

වසර 99ක බදු කාල සීමාවක් සඳහා හම්බන්තොට වරාය සම්පූර්ණ පාලනය චීනයට ලබා දී ඇති පසුබිමක් යටතේ ඊට කිලෝමීටර විස්සකට පමණ දුරින් පිහිටා ඇති මත්තල රාජපක්ෂ ජාත්‍යන්තර ගුවන්තොටුපළට ආයෝජන සඳහා අභිලාෂ කැඳවීම ඉන්දියාවේ විශේෂ අවධානයට ලක්වී ඇත.

පසුගිය මාසයේදී කොළඹ වරාය ඇතුලෙහි පිහිටා ඇති Colombo Dockyard සමාගමේ බහුතර කොටස් අයිතිය ඉන්දියානු ආරක්ෂක අමාත්‍යංශයට අයිති Mazagon Dock Shipbuilders විසින් හිමිකර ගෙන ඇති තත්ත්වයක් තුළ චීන පාලනය යටතේ පවතින හම්බන්තොට වරායේ සිට කිලෝමීටර විස්සක් පමණ දුරින් පිහිටා ඇති මත්තල ජාත්‍යන්තර ගුවන් තොටුපළේ පාලන බලය ඉන්දියාවට හිමි කර ගත හැකිවුවහොත් මෙම කලාපය භූ දේශපාලනික බල තරඟය හමුවේ ඉන්දියාව ලබන අතිශය ඉහළ ජයග්‍රහණයක් වනු ඇත.

චීන එක්සිම් බැංකුවෙන් ලද ණය පහසුකම් යටතේ 2013 වර්ෂයේ දී ඉදි කරන ලද මත්තල ජාත්‍යන්තර ගුවන්තොටුපොළ ශ්‍රී ලංකාව වර්තමානයේ මුහුණ දෙන භූ දේශපාලනික බලපොරයේ ඊළඟ දිශානතිය තීරණය කරනු ඇත.