ගල් අගුරු කොමිසමේ තීන්දුව ටිල්වින් කලින්ම දීලා.. - ජී.එල්. පීරිස්

May 14, 2026 at 02:47 PM

|

Lanka Leader

2009 වසරේ සිට සිදුවූ ගල්අඟුරු ගනුදෙනු පිළිබඳව විමර්ශනය කිරීමට පත්කළ ජනාධිපති කොමිසමේ සැබෑ අභිප්‍රාය කුමක්දැයි ඒකාබද්ධ විපක්ෂයේ නායක, හිටපු විදේශ කටයුතු අමාත්‍ය මහාචාර්ය ජී.එල්. පීරිස් මහතා ප්‍රශ්න කරයි.

විමර්ශන අවසන් වීමටත් පෙර එහි ප්‍රතිඵලය පිළිබඳ පූර්ව නිගමනවලට එළඹෙමින් ප්‍රකාශ නිකුත් කරන ආණ්ඩු පක්ෂයේ ප්‍රධාන ලේකම් ටිල්වින් සිල්වා මහතාගේ ක්‍රියාකලාපය ද ඔහු දැඩි විවේචනයට ලක් කළේය.

ඩේලි මිරර් පුවත්පත වෙත අදහස් දක්වමින් මහාචාර්ය පීරිස් මහතා පෙන්වා දුන්නේ මෙම කොමිසම පත්කර ඇත්තේ 1978 අංක 7 දරන විශේෂ ජනාධිපති පරීක්ෂණ කොමිෂන් සභා පනත යටතේ බවයි.

විශේෂ ජනාධිපති පරීක්ෂණ කොමිසමක පවතින සුවිශේෂී ලක්ෂණ පැහැදිලි කරමින් ඒ මහතා මෙසේ පැවසීය:

"අනෙකුත් කොමිෂන් සභා මෙන් නොව, මෙවැනි කොමිසමක සෑම සාමාජිකයෙකුම දිස්ත්‍රික් උසාවියකට නොඅඩු මට්ටමක සේවයේ නියුතු විනිසුරුවරයෙකු විය යුතුයි. එහි ප්‍රතිඵලයක් ලෙස, මෙම කොමිසමේ කටයුතු අධිකරණයක සිදුවන නඩු විභාගයකට බෙහෙවින් සමාන ස්වභාවයක් ගන්නවා."

මෙවැනි අධිකරණ බලතල සහිත කොමිසමක් පත් කිරීම සම්බන්ධයෙන් ජනතා විමුක්ති පෙරමුණේ මැයි දින රැලියේදී ටිල්වින් සිල්වා මහතා කළ ප්‍රකාශය කෙරෙහි ජී.එල්. පීරිස් මහතා සිය අවධානය යොමු කළේය. තවත් මාස තුනකින් චෝදනා කරන්නන් විත්තිකරුවන් වන බවත්, සියලුම පක්ෂ සාමාජිකයන් වගකීම්වලින් නිදහස් වන බවත් සිල්වා මහතා එහිදී ප්‍රකාශ කර තිබුණි.

ටිල්වින් සිල්වා මහතාගේ එම ප්‍රකාශය උපුටා දක්වමින් මහාචාර්ය පීරිස් මහතා කියා සිටියේ, මෙය කොමිසමේ සේවය කරන විනිසුරුවරුන්ට කරන ලද අපහාසයක් බවයි.

"මෙය කොමිසමට කළ අපහාසයක්. එහි සිටින්නේ සේවයේ නියුතු විනිසුරුවරුන්. අපට අපක්ෂපාතී තීරණයක් අවශ්‍ය නම්, ඔවුන්ට ස්වාධීනව සහ වාස්තවිකව කටයුතු කිරීමට ඉඩ දිය යුතුයි. ටිල්වින් සිල්වා මහතා මෙරට ප්‍රබල දේශපාලන චරිතයක්. එවැනි අයෙකු කොමිසමේ තීන්දුව කුමක්දැයි කලින්ම පවසන්නේ නම්, මෙවැනි කොමිසමක් පත් කිරීමේ තේරුම කුමක්ද? රජය දැනටමත් තීන්දුව ගෙන අවසාන බව මෙයින් පැහැදිලි වෙනවා," යැයි ඔහු වැඩිදුරටත් සඳහන් කළේය.

මෙම කොමිසමේ ක්‍රියාපටිපාටිය සාමාන්‍ය අධිකරණයක මෙන් නීතිඥයන් සහ හරස් ප්‍රශ්න ඇසීම් සහිතව සිදුවන බව පෙන්වා දුන් මහාචාර්යවරයා, මෙහි ඇති බරපතලම තත්ත්වය වන්නේ විශේෂ ජනාධිපති කොමිසමකට පුද්ගලයකුගේ ප්‍රජා අයිතිය අහෝසි කිරීමට නිර්දේශ කිරීමේ බලය පැවතීම බව අවධාරණය කළේය.

එවැනි කොමිසමකට වසර හතක කාලයක් සඳහා පුද්ගලයකුගේ ප්‍රජා අයිතිය අහෝසි කිරීමට නිර්දේශ කළ හැකි අතර, එම යෝජනාව පාර්ලිමේන්තුවේදී සම්මත වුවහොත් අදාළ පුද්ගලයාට සිය ප්‍රජා අයිතිය අහිමි වන බවද හෙතෙම පෙන්වා දුන්නේය.