කපිල චන්ද්‍රසේනගේ මරණය ගැන තොරතුරු රැසක් හෙළිවේ.. ඝාතනයක්ද, සිය දිවි නසා ගැනීමක්දැයි පරීක්‍ෂණ..

May 8, 2026 at 05:49 PM

|

Lanka Leader

ශ්‍රී ලංකන් ගුවන් සමාගමේ හිටපු ප්‍රධාන විධායක නිලධාරී කපිල චන්ද්‍රසේන මහතා අද (08) උදෑසන කොල්ලුපිටිය ප්‍රදේශයේ පිහිටි සිය ඥාතියකුගේ නිවසේදී මියගොස් සිටියදී හමු විය.

කොල්ලුපිටිය පේද්‍රිස් පෙදෙසේ අංක 37 දරන නිවසේ දෙවන මහලේ නාන කාමරයක දොරේ එල්ලී ඔහු සියදිවි හානිකරගෙන ඇති බවට පොලිසිය සැක පළ කරයි.

අසල පිහිටි පෞද්ගලික රෝහලක සේවකයෙකු ලබාදුන් තොරතුරක් මත කොල්ලුපිටිය පොලිසිය එම ස්ථානයට ගොස් විමර්ශන ආරම්භ කළේය. මෙය සියදිවි නසා ගැනීමක් ද නැතහොත් ඝාතනයක් ද යන්න තහවුරු කරගැනීම සඳහා පුළුල් පරීක්ෂණයක් පවත්වන බව පොලිසිය අධිකරණයට දැනුම් දී තිබේ.

ඇප කොන්දේසි සම්පූර්ණ නොකිරීම සහ ඇපකරුවන් පිළිබඳ ඇති වූ ගැටලුකාරී තත්ත්වය හේතුවෙන්, ඔහුව යළි අත්අඩංගුවට ගෙන අධිකරණයට ඉදිරිපත් කරන ලෙස කොළඹ ප්‍රධාන මහේස්ත්‍රාත් අසංක එස්. බෝදරගම මහතා ඊයේ (07) වරෙන්තු නිකුත් කර තිබුණි.

පසුගිය 05 වැනිදා ඔහුට ඇප හිමි වුවද, ඔහු වෙනුවෙන් ඉදිරිපත් වූ ඇපකරුවන් දෙදෙනා ඔහු සමඟ කිසිදු සබඳතාවක් නොමැති පිරිසක් බව හෙළි විය. එම ඇපකරුවන් දෙදෙනා දැනටමත් රක්ෂිත බන්ධනාගාරගත කර ඇත.

එයාර් බස් ගුවන් යානා ප්‍රසම්පාදන ගනුදෙනුවේදී අමෙරිකානු ඩොලර් මිලියන 2ක අල්ලසක් ලබාගැනීම සම්බන්ධයෙන් ඔහුට එරෙහිව දීර්ඝ කාලීන විමර්ශනයක් ක්‍රියාත්මක විය.

සිය බිරිඳගේ නමින් බෲනායි රාජ්‍යයේ ව්‍යාජ සමාගමක් අරඹා, සිංගප්පූරු බැංකු ගිණුම් හරහා යුරෝ දාහතර ලක්ෂයකට අධික මුදලක් ලබාගත් බවට අල්ලස් කොමිසම චෝදනා කර තිබුණි.

මෙම සිද්ධියට අදාළව ප්‍රකාශයක් ලබාදීමට පැමිණි අවස්ථාවේදී පසුගිය මාර්තු 12 වැනිදා ඔහු අත්අඩංගුවට ගත් අතර දින 54ක් රක්ෂිත බන්ධනාගාරගතව සිටියේය.