දෙවරක් මුදල් ගෙවා තියෙනවා නම් BOC වැරදීමකින්.. ඒක RDA වගකීමක් නෙවෙයි..- නි. ඇමති

Apr 27, 2026 at 04:45 PM

|

Lanka Leader

මාර්ග සංවර්ධන අධිකාරියේ ප්‍රධාන ගිණුමෙන් හෝ වෙනත් කිසිදු ගිණුමකින් කොන්ත්‍රාත්කරුවන් වෙත සතයක හෝ මුදලක් දෙවරක් ගෙවා නොමැති බවත්, පාර්ලිමේන්තු මන්ත්‍රී නලින් බණ්ඩාර මහතා විසින් එල්ල කරන ලද රුපියල් මිලියන 380ක ද්විත්ව ගෙවීම් චෝදනාව සම්පූර්ණයෙන්ම සාවද්‍ය බවත් නියෝජ්‍ය ඇමති ප‍්‍රසන්න ගුණසේන මහතා ප්‍රකාශ කළේය.

රජය විසින් වසරකට රුපියල් බිලියන 340-350ක් වැනි අතිවිශාල ප්‍රාග්ධන මුදලක් වෙන් කරන මෙවැනි ආයතනයක කීර්තිනාමයට හානි කිරීමේ අරමුණින් මෙම ප්‍රකාශ සිදු කර ඇති බව ඔහු වැඩිදුරටත් අවධාරණය කළේය.

යම් හෙයකින් ලංකා බැංකුව හරහා එවැනි අතිරික්ත ගෙවීමක් සිදුව ඇත්නම්, එය එම බැංකුවේ වරදක් මිස මාර්ග සංවර්ධන අධිකාරියේ වගකීමක් නොවන බව නියෝජ්‍ය ඇමතිවරයා පෙන්වා දුන්නේය.

"අපි ප්‍රධාන ගිණුමෙන් යම් මුදලක් ගෙවීමට නිර්දේශ කළ විට බැංකුව එය ගෙවනවා. අපේ ගිණුමෙන් මුදල් ලබා නොදී බැංකුව විසින් දෙවරක් ගෙවා ඇත්නම්, එය බැංකුව සහ කොන්ත්‍රාත්කරු අතර සිදුවූ ගනුදෙනුවක් පමණයි" යන්න ඔහුගේ අදහස විය.

මාර්ග සංවර්ධන අධිකාරිය විසින් සිදු කර ඇත්තේ අදාළ ගෙවීමට අදාළ මුල් ගනුදෙනුව (Original transfer) පමණක් බවත්, දෙවරක් මුදල් යවා නොමැති බවත් ඔහු සහතික කළේය.

ප්‍රාදේශීය මට්ටමින් සිදුවූ ගෙවීම් කොළඹ මූලස්ථානය මගින් මාර්ගගතව (Online) සිදු කිරීම නිසා මෙම අවුල ඇති වූ බවට එල්ල වන චෝදනා ද නියෝජ්‍ය ඇමතිවරයා ප්‍රතික්ෂේප කළේය. මීට පෙර පැවති පාරිදෘශ්‍ය ගෙවීම් ක්‍රමවේදයේ කිසිදු වෙනසක් සිදු කර නොමැති බවත්, පැරණි ක්‍රමයම තවදුරටත් ක්‍රියාත්මක වන බවත් ඔහු පැහැදිලි කළේය.