ඇමති සමන්ත කියන්නේ බොරු.. ගම්මිරිස්වලින් ඒ කියන තරම් ආදායමක් ගන්න බැහැ.. - ගම්මිරිස් වගාකරන මන්ත්‍රී කියයි..

Apr 27, 2026 at 08:02 AM

|

Lanka Leader

සමන්ත විද්‍යාරත්න අමාත්‍යවරයා සිය ගම්මිරිස් වගාවෙන් වසරකට රුපියල් ලක්ෂ 21ක ආදායමක් ලබන බවට කළ ප්‍රකාශය සම්පූර්ණයෙන්ම සාවද්‍ය එකක් බව සජබ රත්නපුර දිස්ත්‍රික් පාර්ලිමේන්තු මන්ත්‍රී ආරියවංශ බාලසූරිය මහතා පවසයි.

තමන්ද ගම්මිරිස් ගොවියෙකු මෙන්ම ව්‍යාපාරිකයෙකු ලෙස එම ප්‍රකාශය ප්‍රායෝගිකව කළ නොහැක්කක් බව ඔහු අවධාරණය කරයි.

මාධ්‍ය හමුවකට එක්වෙමින් මන්ත්‍රීවරයා කියා සිටියේ, අමාත්‍යවරයා පවසන පරිදි ගම්මිරිස් අක්කරයකින් රුපියල් ලක්ෂ 21ක ආදායමක් ලැබිය නොහැකි බව ඕනෑම අයෙකු දන්නා බවයි.

දැනට වෙළඳපොලේ ගම්මිරිස් කිලෝවක මිල රුපියල් 2000ක් පමණ වන අතර, අක්කරයකින් ලබාගත හැකි උපරිම අස්වැන්න කිලෝ 600-650ක් පමණ වන බව ඔහු පෙන්වා දෙයි.

ඒ අනුව උපරිම ඵලදාවක් ලැබුණද අක්කරයකින් ලබාගත හැක්කේ රුපියල් ලක්ෂ 12ක පමණ ආදායමක් බවත්, පසුගිය වසරේ මෙන් අස්වැන්න අඩු කාලවලදී එය ලක්ෂ එකහමාරක් දක්වා පහත වැටෙන බවත් මන්ත්‍රීවරයා සඳහන් කළේය.

අමාත්‍යවරයා මුලින් මෙම ඉඩම තමන්ගේ යැයි පවසා පසුව එහි හවුල්කරුවන් සිව්දෙනෙකු සිටින බව පැවසීම හරහා පෙනී යන්නේ, ආණ්ඩුවේ මැති ඇමතිවරුන් පසුගිය කාලය තුළ උපයාගත් දූෂිත මුදල් වත්කම් බැරකම් ප්‍රකාශ හරහා නීත්‍යානුකූල කර ගැනීමට උත්සාහ කරන ආකාරය බව බාලසූරිය මහතා චෝදනා කළේය.

රටේ ගොවි ජනතාව පොහොර මිල ඉහළ යෑම සහ අස්වැන්න විකුණා ගැනීමට නොහැකි වීම නිසා දැඩි පීඩනයකට පත්ව සිටින මොහොතක, ඇමතිවරුන් මෙවැනි ප්‍රකාශ සිදු කිරීම ජනතාව මුලා කිරීමක් බවත් මන්ත්‍රීවරයා වැඩිදුරටත් කියා සිටියේය.

එමෙන්ම මුදල් අමාත්‍යාංශයේ සිදුවූ වංචාවන් වසා ගැනීමට ආණ්ඩුව හැකර්වරුන් හෝ විපක්ෂය දෙසට ඇඟිල්ල දිගු කරමින් සිටින බවත්, සැබෑ වංචාකරුවන් සිටින්නේ ආණ්ඩුව තුළම බවත් ඔහු මෙහිදී අනාවරණය කළේය