භාණ්ඩාගාර කොල්ලයේ වරදට සුළු සේවකයින් බිල්ලට දී අත පිහදාගැනීමේ උත්සාහයක් ගැන කීර්ති තෙන්නකෝන් හෙළිකරයි..

Apr 26, 2026 at 05:56 AM

|

Lanka Leader

මහා භාණ්ඩාගාරයේ සිදුවූ බව කියන ඩොලර් මිලියන 2.5ක මංකොල්ලය වසා ගැනීමටත්, එහි වගකීම පහළ මට්ටමේ සේවකයින් වෙත පටවා නිදහස් වීමටත් මුදල් අමාත්‍යාංශයේ ලේකම් හර්ෂණ සූරියප්පෙරුම මහතා කටයුතු කරමින් සිටින බව හිටපු ආණ්ඩුකාර රජිත කීර්ති තෙන්නකෝන් මහතා චෝදනා කරයි.

මෙම මංකොල්ලයට වගකිව යුතු ඉහළ නිලධාරීන් ආරක්ෂා කිරීමේ අවශ්‍යතාවයක් ලේකම්වරයාට පවතින බව පෙනෙන්නට තිබෙන බව ද ඔහු පවසයි.

මෙම සිද්ධිය සම්බන්ධයෙන් විමර්ශනය කිරීමට පළමුව මාර්තු 24 වන දින තනි සභාපතිවරයෙකුගෙන් යුත් කමිටුවක් පත් කළ බව ලිපියකින් දැනුම් දී තිබුණ ද, පසුව නියෝජ්‍ය භාණ්ඩාගාර ලේකම්වරු (DST) දෙදෙනෙකුගේ සම සභාපතිත්වයෙන් යුත් පස් දෙනෙකුගෙන් සමන්විත කමිටුවක් පත් කර ඇති බව හෙළි වී තිබේ.

මෙම වංචාව අභ්‍යන්තරිකව වසා ගැනීමට ලේඛන සංශෝධනය කිරීමේ උත්සාහයක් පවතින බවත්, ඇතැම් ලේඛන බෙදා හැරීමෙන් පසු නැවත භාරයට ගෙන ඇති බවත් තෙන්නකෝන් මහතා අනාවරණය කරයි. කෙසේ වෙතත්, නියමිත දින මුද්‍රා සහිත ලේඛන පද්ධතිය තුළ තවමත් පවතින බව සේවකයන් පවසන බව ද ඔහු සඳහන් කළේය.

විමර්ශන කමිටු වාර්තාව අප්‍රේල් 10 වන දින මුදල් ලේකම්වරයා වෙත ලැබී තිබුණ ද, ඒ පිළිබඳව අවම වශයෙන් ජනාධිපතිවරයා හෝ කැබිනට් මණ්ඩලය දැනුවත් කිරීමට කටයුතු කර නොමැති බව පැවසේ. ජනාධිපතිවරයා වෙත අර්ධ සත්‍ය කරුණු ඉදිරිපත් කරමින් ඔහුව නොමග යැවීමට මුදල් ලේකම්වරයා කටයුතු කර ඇති බවට ද තෙන්නකෝන් මහතා චෝදනා කරයි.

සිද්ධිය වසා ගැනීමේ උපක්‍රමයක් ලෙස අප්‍රේල් 17 වන දින පහළ මට්ටමේ සේවකයන් සිව් දෙනෙකුගේ වැඩ තහනම් කිරීමට පියවර ගෙන ඇත. විශේෂයෙන් මෑතකදී මාරු වී ආ දක්ෂ නිලධාරිනියන් දෙදෙනෙකු මෙම ක්‍රියාවලියේ ගොදුරු බවට පත්වීමේ අවදානමක් පවතින බවත්, රාජ්‍යයන් අතර ණය ගනුදෙනු පිළිබඳ පුහුණුවක් ඔවුන්ට නොතිබූ බවත් හිටපු ආණ්ඩුකාරවරයා පෙන්වා දෙයි.

මෙම විමර්ශන හරහා වැරදිකරුවන් ලෙස හංවඩු ගැසීමට උත්සාහ කරන්නේ අංක ටයිප් කළ පුද්ගලයන් බව ඔහු වැඩිදුරටත් පැවසීය.

මහා භාණ්ඩාගාරයේ සිටි දක්ෂ නිලධාරීන් දේශපාලන අවශ්‍යතා මත විවිධ ස්ථානවලට මාරු කිරීම මෙම අර්බුදයට ප්‍රධාන හේතුවක් බව තෙන්නකෝන් මහතා පෙන්වා දෙයි. විශේෂයෙන්ම පසුගිය සැප්තැම්බර් මාසයේ සිට පරිගණක අංශයට වගකිවයුතු ප්‍රධානියෙකු පත් කර නොමැති බවත්, දක්ෂයන් වෙනුවට දේශපාලන ලැදියාව මත පත්වීම් සිදු කිරීම නිසා ආර්ථිකයේ හදවත බඳු භාණ්ඩාගාරය අවදානමකට ලක්ව ඇති බවත් ඔහු අවධාරණය කළේය.

වත්මන් මුදල් ලේකම්වරයාට රාජ්‍ය අංශ කළමනාකරණය පිළිබඳ ප්‍රායෝගික අත්දැකීම් නොමැති වීම මෙම තත්ත්වය තවත් දරුණු කර ඇති බව ද ඔහු වැඩිදුරටත් සඳහන් කරයි