‘අපි යුද්ධයට බය නැහැ’ - කියුබානු ජනාධිපති රුසියානු මාධ්‍ය වෙත පවසයි

Apr 19, 2026 at 06:53 AM

|

Lanka Leader

ඇමරිකානු ප්‍රහාරයක් එල්ල වුවහොත් කියුබාව ආරක්ෂා කිරීම සඳහා සමස්ත කියුබානු ජනතාවම බලමුලු ගන්වනු ඇති බව කියුබානු ජනාධිපති මිගෙල් ඩයස්-කැනෙල් රුසියානු මාධ්‍ය ආයතනයක් වන RT වෙත පවසා තිබේ.

කියුබාව සාමකාමී ජාතියක් වන නමුත් එක්සත් ජනපද ආක්‍රමණයකදී කියුබාව ආරක්ෂා වීමට සියලු උපක්‍රම භාවිතා කරන බව කියුබානු ජනාධිපති මිගෙල් ඩයස්-කැනෙල් RT වෙත පවසා තිබේ.

එක්සත් ජනපද ජනාධිපති ඩොනල්ඩ් ට්‍රම්ප් පසුගිය පෙබරවාරි මාසයේ සිට කියුබාවට එරෙහිව ඛනිජ තෙල් අවහිරයක් පැනවූ අතර ෆ්ලොරිඩා වෙරළ තීරයේ සිට සැතපුම් 93 (කිලෝමීටර් 150) ක් දුරින් පිහිටි සමාජවාදී ආර්ථික ක්‍රමවේදයක් පවත්වාගෙන යන කියුබානු දූපතට එරෙහිව සිදුවිය හැකි පාලන තන්ත්‍ර වෙනස් කිරීමේ මෙහෙයුමක් පිළිබඳව නැවත නැවතත් ඉඟි කළේය. ට්‍රම්ප් පසුගියදා පැවසුවේ “අපි මෙය අවසන් කළ පසු කියුබාවට යා හැකිය” යනුවෙන් ඉරානයට එරෙහිව එක්සත් ජනපද-ඊශ්‍රායල යුද්ධය සම්බන්ධයෙන් සඳහන් කරමිනි.

ඊයේ(18) හවානා හිදි RT වෙත අදහස් දක්වමින් ඩයස්-කැනෙල් අවධාරණය කළේ එක්සත් ජනපද ජනාධිපතිවරයාගේ තර්ජන උත්සන්න වීමෙන් පසු කියුබානු රජය ජාතික ආරක්ෂාව සම්බන්ධයෙන් “ඉහළම ප්‍රමුඛතාවයක්” ප්‍රකාශයට පත් කර ඇති බවයි.

කියුබාව "යුද්ධයට කැඳවන හෝ එය ප්‍රවර්ධනය කරන රටක් නොවේ, නමුත් අපගේ මව්බිම ආරක්ෂා කර ගැනීම සඳහා යුද්ධය දියත් කළ යුතු නම් අපි යුද්ධයට බිය නොවෙමු" යනුවෙන් ඔහු අනතුරු ඇඟවීය.

"එක්සත් ජනපදය කියුබාව ඉලක්ක කර ගැනීමට තීරණය කළහොත් දැඩි සටනකට මුහුණ දෙනු ඇත, මන්ද එහි ආරක්ෂක උපාය මාර්ගය "සියලු ජනතාවගේ යුද්ධයක්" යන සංකල්පය මත පදනම් වී ඇති බැවින්, ඒ අනුව මුළු ජනගහනයම ප්‍රහාරයක් මැඩපැවැත්වීමේ නිරතව සිටිනවා." කියුබානු ජනාධිපතිවරයා අවධාරණය කළේය.