ජවිපෙ පැලවත්ත කාර්යාලයට STF ආරක්‍ෂාවත් දාලා.. පැලවත්තේ අය යන්නේ රජයේ වාහනවල..

Apr 9, 2026 at 06:04 AM

|

Lanka Leader

පැලවත්ත පිහිටි ජනතා විමුක්ති පෙරමුණේ ප්‍රධාන කාර්යාලයට පොලිසිය ඇතුළු රාජ්‍ය ආරක්ෂාවක් යොදවා තිබීම රාජ්‍ය දේපළ සහ රාජ්‍ය මුදල් අවභාවිත කිරීමක් බවට නව ජනතා පෙරමුණ චෝදනා කරයි.

මෙරට පවතින දැඩි ගෑස්, ඉන්ධන සහ විදුලි අර්බුදයට විසඳුම් ඉල්ලමින් සහ මෙරට සිදුව ඇති ප්‍රධාන වංචා දූෂණ හයක් සම්බන්ධයෙන් ලිපියක් භාරදීම සඳහා එම පක්ෂයේ මහලේකම් සුගීෂ්වර බණ්ඩාර ඇතුළු පිරිසක් පැලවත්ත කාර්යාලය වෙත පැමිණි අවස්ථාවේදී මෙම අදහස් පළ විය.

විරෝධතාකරුවන් එහි පැමිණ තිබුණේ හිස් ගෑස් ටැංකි ද රැගෙනය.

එහිදී මාධ්‍ය වෙත අදහස් දැක්වූ පිරිස ප්‍රශ්න කර සිටියේ මීට පෙර මෙරට පාලනය කළ මහින්ද රාජපක්ෂ හෝ මෛත්‍රීපාල සිරිසේන වැනි නායකයන්ගේ පක්ෂ කාර්යාලවලට මෙලෙස රාජ්‍ය ආරක්ෂක අංශ යොදවා තිබුණේද යන්නයි.

දේශපාලන පක්ෂ කාර්යාලයකට මෙලෙස රාජ්‍ය ආරක්ෂාව යොදවා ජනතාවට සහ පක්ෂ සාමාජිකයන්ට එහි ඇතුළු වීමට ඉඩ නොදීම ප්‍රජාතන්ත්‍රවාදය අහිමි කිරීමක් බව ඔවුහු පෙන්වා දුන්හ.

ටිල්වින් සිල්වා මහතා මෙරට නොනිල ජනාධිපති ලෙස කටයුතු කරන බවට චෝදනා කළ සුගීෂ්වර බණ්ඩාර මහතා, ජනතාව ගෑස් ටැංකි රැගෙන පැලවත්ත වට කරන දිනයක ඔහුට බංකර් දහයක සැඟවී සිටියත් පැන යාමට ඉඩක් නොලැබෙනු ඇති බවට ද අනතුරු ඇඟවීය.

තවද, ගල් අඟුරු වංචාව සම්බන්ධයෙන් විගණකාධිපතිවරයා නිකුත් කර ඇති පිටු 109ක වාර්තාව කියවන ලෙස රජයට බලකර සිටි විරෝධතාකරුවන්, පවතින අර්බුද කළමනාකරණය කිරීමට නොහැකි නම් වහාම මැතිවරණයක් පවත්වන ලෙස ද ඉල්ලා සිටියහ.

පක්ෂ කාර්යාලයක් තුළට වී ජනතා ප්‍රශ්නවලින් සැඟවී නොසිට ඒවාට පැහැදිලි උත්තර ලබාදෙන ලෙස ඔවුහු වැඩිදුරටත් අවධාරණය කළහ.