බලශක්ති ඇමැති ඉල්ලා අස්වේ?

Apr 3, 2026 at 10:59 AM

|

Lanka Leader

විදුලි බල සහ බලශක්ති ඇමති කුමාර ජයකොඩි කැබිනට් මණ්ඩලයෙන් ඉවත් කිරීමට තීරණය කර ඇති බවට ප්‍රවෘති වෙබ් අඩවි සහ සමාජ මාධ්‍යය තුළ තොරතුරු සංසරණය වේ.

අමාත්‍ය කුමාර ජයකොඩි එම තනතුරෙන් ඉවත් කළ යුතු බවට පසුගිය දා රැස් වූ ජ.වි.පෙ. දේශපාලන මණ්ඩලයේ දී බිමල් රත්නායක ඇමතිවරයා ඇතුළු දේශපාලන මණ්ඩල සභිකයන් කිහිප දෙනෙකු කරුණු දක්වා ඇති බවත්, එහෙත් ජනාධිපති අනුර කුමාර එම මතය පිලිගෙන නැති බවත් එම තොරතුරුවල සඳහන්වේ. 

එහිදී දේශපාලන මණ්ඩල සභික ලාල් කාන්ත අමාත්‍යවරයා, බිමල් රත්නායකගේ මතයට එරෙහිව කරුණු දක්වා ඇති බවද එම දේශපාලන මණ්ඩල රැස්වීම පවත්වා ඇත්තේ, අමාත්‍ය බිමල් රත්නායක විදේශගත වීමට පෙරදී බවද සඳහන් ය.

කෙසේ වෙතත්, නිශ්චිත තීරණයකින් තොරව නිමා වූ එම දේශපාලන මණ්ඩල රැස්වීමෙන් පසුව, කුමාර ජයකොඩි තවදුරටත් ඇමැති ධුරයේ රැඳී සිටීම පක්ෂයට හා ආණ්ඩුවට හානිකරය යන මතය දැරූ දේශපාලන මණ්ඩල සාමාජිකයන්, ප්‍රධාන ලේකම් ටිල්වින් සිල්වා හමුවේ පවසා ඇත්තේ, ජනාධිපති සමග මෙය සාකච්ඡා කිරීම ඵල රහිත ක්‍රියාවක් වන බැවින්, කුමාර ජයකොඩි කැඳවා ඔහු සමග මේ පිළිබඳව සාකච්ඡා කළ යුතු බව ය. එම මතය පිළිගෙන ඇති ප්‍රධාන ලේකම් ටිල්වින් සිල්වා පක්ෂයට සහාය ලබා දෙන නීතිඥ පිරිසක් ද සහිතව එම සාකච්ඡාව පැවැත්වීමට එකඟ වී ඇති බවත් සඳහන්.

එහිදී දීර්ඝ කරුණු සාකච්ඡා කිරීමකින් පසු අමාත්‍ය තනතුරින් ඉල්ලා අස්වීමට කුමාර ජයකොඩි එකඟ වී ඇති බවද තොරතුරු වාර්තා වන අතර, අද දවස තුළ දී එම ලිපිය ජනාධිපතිවරයා වෙත ලබා දෙන බවට ද පොරොන්දු වී ඔහු එම සාකච්ඡාවෙන් බැහැර වී ගොස් ඇති බවත් සඳහන්.

කෙසේ වෙතත්, තම සමීප මිතුරාගේ ඉල්ලා අස්වීම ජනාධිපතිවරයා විසින් පිළිගනු ඇද්ද යන සැකය ජ.වි.පෙ. ප්‍රධාන ලේකම් ඇතුළු පිරිසට ඇති බව ආරංචි මාර්ග පෙන්වා දී තිබේ.