චීන පර්යේෂණ නෞකාවකට මෙරට මුහුදු සීමාවට ඇතුළුවීමට අවසර නොදේ..

Mar 30, 2026 at 04:40 AM

|

Lanka Leader

ශ්‍රී ලංකාවට අයත් සුවිශේෂී ආර්ථික කලාපය (EEZ) තුළ නැංගුරම් ලා තිබූ චීන පර්යේෂණ නෞකාවක සිටි රෝගී වූ නාවිකයෙකු ගොඩබිමට රැගෙන ඒමට ශ්‍රී ලංකා නාවික හමුදාව පියවර ගෙන ඇත. 

කෙසේ වෙතත්, අදාළ නෞකාවට මෙරට මුහුදු සීමාවට ඇතුළු වීමට අවසර ලබා නොදෙන බව රජයේ ජ්‍යෙෂ්ඨ ප්‍රකාශකයෙකු තහවුරු කර ඇත.

'ෂී යැන් 6' (Shi Yan 6) නම් මෙම චීන පර්යේෂණ නෞකාව ශ්‍රී ලංකාවේ සිට නාවික සැතපුම් 700ක් පමණ දුරින් පිහිටි මුහුදු සීමාවේ රැඳී සිටින අතරතුර, එහි සිටි නාවිකයෙකු වකුගඩු ආබාධයකින් පීඩා විඳීම හේතුවෙන් නෞකාව විසින් හදිසි ආපදා සංඥාවක්  නිකුත් කර තිබිණි.

ඊට ප්‍රතිචාර දක්වමින් ක්‍රියාත්මක වූ නාවික හමුදාව, මෙරට මුහුදු සීමාව ආසන්නයේදී රෝගියා තම භාරයට ගෙන ප්‍රතිකාර සඳහා ගාල්ල කරාපිටිය ශික්ෂණ රෝහල වෙත ඇතුළත් කර ඇත. පසුව වැඩිදුර ප්‍රතිකාර සඳහා ඔහු කොළඹ ජාතික රෝහල වෙත මාරු කර යවා ඇති අතර මේ වන විට ඔහු එහි ප්‍රතිකාර ලබමින් පසුවේ.

පසුගිය 2023 වසරේදී 'ෂී යැන් 6' නෞකාව කොළඹ වරායට පැමිණි නමුත්, මෙවර එම නෞකාව කලාපය තුළ රැඳී සිටියද මෙරටට ඇතුළු වීම සඳහා කිසිදු ඉල්ලීමක් කර නොමැති බව රජයේ ආරංචි මාර්ග පවසයි.

විදේශීය පර්යේෂණ නෞකා මෙරටට පැමිණීම සම්බන්ධයෙන් 2024 දෙසැම්බර් මාසයේ සිට තාවකාලික තහනමක් පනවා තිබේ. එසේ වුවද, පසුගිය සතියේදී එක්සත් ජාතීන්ගේ සංවිධානයට අයත් ආහාර හා කෘෂිකර්ම සංවිධානය (FAO) යටතේ ක්‍රියාත්මක වන 'ඩොක්ටර් ෆ්‍රිඩ්ජොෆ් නැන්සන්' පර්යේෂණ නෞකාවට ශ්‍රී ලංකාවට අයත් සුවිශේෂී ආර්ථික කලාපය තුළ මුහුදු පර්යේෂණ කටයුතු සිදු කිරීම සඳහා රජය විශේෂ අවසරයක් ලබා දී තිබිණි.

විදේශීය පර්යේෂණ නෞකා මෙරටට පැමිණීම සම්බන්ධයෙන් අනුගමනය කළ යුතු සම්මත මෙහෙයුම් පටිපාටිය (SOP) සකස් කිරීමේ කටයුතු ද මේ වන විට රජය විසින් අවසන් කරමින් පවතී.