ජපානයේ පැවැත්වෙන වකුගඩු රෝග පිළිබඳ ලෝක කොංග්‍රසයට ආචාර්ය චන්න ජයසුමන සහභාගි වෙයි..

Mar 29, 2026 at 08:59 AM

|

Lanka Leader

වකුගඩු රෝග පිළිබඳ ලෝක කොංග්‍රසය (World Congress of Nephrology-WCN) මෙවර ජපානයේ යොකොහාමා නගරයේ පැසිෆිකා සම්මන්ත්‍රණ ශාලාවේදී පැවැත්වෙන අතර, එම සම්මන්ත්‍රණය නියෝජනය කරන ආචාර්ය චන්න ජයසුමන මහතා පවසන්නේ ශ්‍රී ලංකාවෙන් මෙම කොංග්‍රසයට පර්යේෂණ පත්‍රිකා හයක් ඉදිරිපත් වී ඇති බවත් ඉන් තුනක් ඒ මහතා සම්බන්ධ වූ ඒවා බවත් ය.

චන්න ජයසුමන මහතා සිය මුහුණුපොතේ මේ සම්බන්ධව දක්වා ඇති සටහන පහළින්..

යොකොහාමා සිට..

වකුගඩු රෝග පිළිබඳ ලෝක කොංග්‍රසය (World Congress of Nephrology-WCN) මෙවර පැවැත්වෙන්නේ ජපානයේ යොකොහාමා නගරයේ. ජපානයේ දෙවන විශාලතම නගරය වන යොකොහාමාහි පැසිෆිකා සම්මන්ත්‍රණ ශාලාව ඒ සඳහා වෙන්කර තිබෙනවා.

ඊයේ එහි සමාරම්භක දිනයයි. ලොව පුරා වකුගඩු රෝග පිළිබඳ පර්යේෂකයන් සහ වෛද්‍යවරැන් දහස් ගණනක් මෙම කොංග්‍රසයට සහභාගි වෙනවා. මීට පෙර කීප වතාවක් මා WCN කොංග්‍රස කිහිපයකට සහභාගි වුව ද දේශපාලන කටයුතු නිසා වසර හයක් එය මග හැරැණා.

මෙවර ශ්‍රී ලංකාවෙන් මෙම කොංග්‍රසයට පර්යේෂණ පත්‍රිකා හයක් ඉදිරිපත් වී ඇති අතර ඉන් තුනක් මා සම්බන්ධ වූ ඒවායි.

පළමුවැන්න උතුරු මැද පළාත කේන්ද්‍රීයව ලංකාවේ කෘෂිකාර්මික ප්‍රදේශවල පැතිර ගිය වකුගඩු රෝග පාලනයට අපගේ මූලිකත්වයෙන් 2012 වසරේ ප්‍රති ආස්‍රෘත ජලය හඳුන්වා දීමෙන් පසු රෝග පාලනයට එහි ඇති වූ බලපෑම පිළිබඳවයි. මහාචාර්ය සිසිර සිරිබද්දන සහ මහාචාර්ය සරත් ගුණතිලක සමඟ මා එම පර්යේෂණ පත්‍රිකාව ඉදිරිපත් කර තිබෙනවා. 

දෙවැන්න කොස්ටරිකානු පර්යේෂණ කණ්ඩායම සමඟ එරට දී සිදුකළ පර්යේෂණයක ප්‍රතිඵල. තෙවැන්න ශ්‍රී ලංකාවේ සහ මධ්‍යම ඇමෙරිකාවේ වකුගඩු රෝගීන්ගේ ජාන අධ්‍යයනයක්. එය සිදු කළේ ස්වීඩනයේ කැරොලින්ස්කා ආයතනයේ දී (Karolinska Institute - වෛද්‍ය විද්‍යාව සදහා නොබෙල් ත්‍යාගයට වාර්ෂික තෝරා ගැනීම සිදු කරන්නේ ද කැරොලින්ස්කා ආයතනයෙන්).