යුද්ධය පටන් ගත්තේ අපි නෙමෙයි. අපි කරන්නේ අපිව ආරක්ෂා කර ගැනීම පමණයි.. - මෙරට ඉරාන තානාපති කියයි

Mar 7, 2026 at 07:18 AM

|

Lanka Leader

ඉරානයට එරෙහිව ඇමෙරිකාව සහ ඊශ්‍රායලය ක්‍රියත්මක කර ඇති යුදමය ක්‍රියාමාර්ග වහාම නතර කරන ලෙස බලකරමින් මුස්ලිම් ප්‍රජාව විසින් සංවිධානය කරන ලද විරෝධතාවක් ඊයේ (06) කොළඹ, දවටගහ පල්ලිය අසලදී පැවැත්විණි.

මෙම අවස්ථාවට ශ්‍රී ලංකාවේ ඉරාන තානාපති ආචාර්ය අලිරේසා ඩෙල්කෝශ් (Alireza Delkhosh) ද එක්ව සිටීම විශේෂත්වයක්.

මෙහිදී අදහස් දැක්වූ ඉරාන තානාපතිවරයා සඳහන් කළේ, "යුද්ධය පටන් ගත්තේ අපි නෙමෙයි. අපි අපිව ආරක්ෂා කර ගන්නවා විතරයි,” යනුවෙනි.

එසේම, ලෝක සාමය අපේක්ෂා කරන සියලු දෙනා මෙම අසාධාරණ යුද්ධයට එරෙහිව හඬ නැගිය යුතු බව ද තානාපතිවරයා සඳහන් කළේය.

එහිදී මාධ්‍ය වෙත අදහස් දක්වමින් ඉරාන තානාපතිවරයා, මෙසේ ද පැවසීය,

“ඔබ දන්නා පරිදි පෙබරවාරි 28 වැනිදා අපි එක්සත් ජනපද රෙජිමයේ සහ ඊශ්‍රායල් රෙජිමයේ නීතිවිරෝධීි ප්‍රහාරයකට ලක්වුණා. මෙම ප්‍රහාරය එල්ල වුණේ අපි එක්සත් ජනපදය සමග සාකච්ඡා කරමින් සිටින අතරතුරදීයි. ඒකෙන් දෙවැනි වරටත් පෙන්නුම් කළේ මේ මාස අටට එක්සත් ජනපදය කිසිදු සාකච්ඡාවක් විශ්වාස නොකරන බවයි.

ඔවුන්ට අවශ්‍ය වන්නේ අණ දෙන්න පමණයි. ඔවුන්ට අවශ්‍ය යමක් කියලා අනෙක් අය ඒ දේට අවනත වෙන එකයි. අපිට ඒකට එකඟ වෙන්න බෑ. අපි ඉරාන ජාතිකයින්. අපි ස්වාධීනයි. අපි බලවත්. අපිට අපිව ආරක්ෂා කර ගන්න පුළුවන්.

යුද්ධය පටන් ගත්තේ අපි නෙමෙයි. අපි කරන්නේ අපිව ආරක්ෂා කර ගන්න එකයි. අපි දිගටම අපිව ආරක්ෂා කරගන්නවා. එක්සත් ජාතීන්ගේ ප්‍රඥප්තියේ 51 වන වගන්තියට අනුව. මගේ පණිවුඩය නම් ශ්‍රී ලංකාව ඉරානයට ඉතා ගෞරවනීය රටක්. ලංකා ශිෂ්ඨාචාරය සමග අපට සහයෝගීතාවයේ ඉතා දිගු ඉතිහාසයක් තිබෙනවා. අවුරුදු දහස් ගණනක ඉතිහාසයක්.

මම හිතනවා මේක තමයි වෙලාව ජාත්‍යන්තර නීතිය උල්ලංඝනය කිරීමට විරුද්ධයි කියලා හැම රටකටම පණිවිඩයක් දෙන්න. ජාත්‍යන්තර නීතිය උල්ලංඝණය කරලා අපි මධ්‍යස්ථයි කියන්න බෑ. මධ්‍යස්ථභාවය කියන්නේ සෑම කෙනෙකුටම ජාත්‍යන්තර නීතිය සහ ජාත්‍යන්තර රෙගුලාසි ගැන සැලකිලිමත් විය යුතුයි කියන එක.”