ආර්ථික මධ්‍යස්ථාන එකතු කර රාජ්‍ය සමාගමක් පිහිටුවීම සම්බන්ධයෙන් ගොවිජන පවුරෙන් ඇමති වසන්තට යෝජනාවලියක්..

Mar 7, 2026 at 05:21 AM

|

Lanka Leader

මේ වන විට ආණ්ඩුවේ විසින් ඉදිරිපත් කර ඇති ආර්ථික මධ්‍යස්ථාන එකතු කර රාජ්‍ය සමාගමක් පිහිටුවීමේ යෝජනාව වෙනුවෙන්, ආර්ථික මධ්‍යස්ථාන එකතු කර රාජ්‍ය සමාගමක් පිහිටුවීමේන් පසු ගොවියාටත් පාරිබෝගිකයාටත් සාධානරය ඉටු කිරිම වෙනුවෙන් වන ගොවිජන පවුර සකස් කර ඇති යෝජනාවලිය වසන්ත සමරසිංහ ඇමතිවරයාට භාරදීම ඊයේ දින  සිදුවිය. 

වෙළද අමාත්‍ය වසන්ත සමරසිංහ ඇමතිවරයාට භාරදුන් යෝජනා පහත පරිධි වේ. 

ගරු ඇමතිතුමනි

විශේෂිත ආර්ථික මධ්‍යස්ථාන කළමනාකරණය කිරීම පිණිස සමාගමක් සංස්ථාගත කිරීම සඳහා නැසනල් ඇග්‍රි මාර්කට් පුද්ගලික සමාගම නමින් සීමා සහිත පුද්ගලික සමාගමක් පිහිටුවීම පිළිබඳව

පළමුවෙන්ම, රට පුරා පවතින විශේෂිත ආර්ථික මධ්‍යස්ථාන ලෙස හඳුන්වනු ලබන ආර්ථික මධ්‍යස්ථාන 14ක් පාලනය කිරීම සඳහා 2005 සිට ක්‍රියාත්මක වූ කළමනාකරණ භාරයන් ආශ්‍රිත ගැටළු අඳුනා ගැනීම සහ ඒවා නිවැරදි කිරීම සඳහා නව මධ්‍යගත යාන්ත්‍රණයක් අවශ්‍ය බව පිළිගැනීම පිළිබඳව අපගේ ගෞරවය සහ ස්තුතියි ඔබතුමාට පිරිනමමු. එසේම 2024 නොවැම්බර් මාසයේදී නිකුත් කළ 2412/08 ගැසට් පත්‍රය මගින් එම ආර්ථික මධ්‍යස්ථාන ඔබතුමාගේ අමාත්‍යාංශය යටතට පත් කිරීමෙන් පසුව ඉතා කෙටි කාලයකදී, එනම් 2025 මැයි 07 දින අමාත්‍ය මණ්ඩල පත්‍රිකාවක් මගින් ඔබතුමන්ගේ නව විසඳුම ඉදිරිපත් කිරීමද අගය කරමු. කෙසේ වෙතත් ඊට පෙර අදාළ යෝජනාවේ ගුණ අගුණ පිළිබඳව, ගොවි සංවිධාන වෙළඳ සංවිධාන සහ ක්ෂේත්‍රයේ විද්වතුන් මෙන්ම පොදු මහජනතාවගේ අදහස් විමසීමක් සිදුකළා නම් එය ඉතා වැදගත් වන බව මේ වන විට ඔබතුමාගේ යෝජනාවට එරෙහි එල්ල වන විරෝධතා වලින් පැහැදිලි වේ. 

ඔබතුමා විසින් ඉදිරිපත් කරන යෝජනාවේ මූලික අරමුණ එනම් සියලුම ආර්ථික මධ්‍යස්ථාන මධ්‍යගතව කළමනාකරණය කළ යුතු බව පිළිගැනීම අප ඉතා ඉහළින් අගය කළද ඔබතුමා විසින් ඉදිරිපත් කරන යාන්ත්‍රණය මගින් ජාතික අවශ්‍යතාවයක් ඉටු කිරීම වෙනුවට සමස්ත යාන්ත්‍රණයම මහා කෘෂි යෙදවුම් සමාගම් කිහිපයක ආධිපත්‍යයට යටත් වීමේ අනතුරක් මතුවේ. ඔබතුමා විසින් යෝජනා කරන සමාගම් රෙජිස්ටර් සමාගම යටතේ නීතිගත කරනු ලබන, සීමාසහිත සමාගමේ කොටස් අයිතිය මුල් අවස්ථාවේදී භාණ්ඩාගාර ලේකම්වරයා යටතට පත් කළද පසුව සමස්ත දේපළවල වටිනාකම අනුව නිර්ණය වන කොටස්වල වටිනාකම අනුව ඒවා පුද්ගලික සමාගම් විසින් මිලදී ගැනීමට අවස්ථාව නිර්මාණය වේ. ඒ අනුව මේ වන විට කෘෂි යෙදවුම්වලට අදාළව වෙළඳපොළ තුළ ආධිපත්‍යය පතුරුවන මහා සමාගම් නිෂ්පාදන වෙළඳපොළ තුළ ආධිපත්‍ය පැතිරීම සඳහා ඉහළ මිලට එම කොටස් මිලදී ගැනීම සඳහා ඉදිරිපත් වන බව ඔබතුමා ඉතා හොඳින් දන්නා කරුණකි. 

ඊට අමතරව මුල්වටයේදී එනම් කොටස් අයිතිය භාණ්ඩාගාරය සතුව පවතින තෙක් ඔබතුමාට අධ්‍යක්ෂක මණ්ඩලය පත් කිරීම මගින් ජනතා පරමාධිපත්‍යයට අනුව ආයතනය මෙහෙයවීමේ බලයක් ලැබුණද මහා සමාගම් විසින් කොටස් මිලදී ගැනීමෙන් පසුව ඔබතුමාට මහජනයා විසින් පවරා ඇති පරමාධිපත්‍යයේ බලය එම සමාගම්වල ප්‍රාග්ධනය හිමියන් විසින් අත්පත් කර ගන්නා බව ඔබතුමා පිළිගන්නවා ඇත. එසේම ආර්ථික මධ්‍යස්ථාන පාලනය කිරීමේ ක්‍රියාවලිය මගින්  ගොවියාගේ ජීවිතවලට, රටේ ආහාර සුරක්ෂිතතාවයට සහ ආර්ථිකය තුළ කෘෂිකර්ම ක්ෂේත්‍රයේ දායකත්වයට අදාලව විශාල බලපෑමක් ඇති වන අතර පාරිභෝගිකයාට දීර්ඝ කාලීනව සැබෑ ලෙසම සාධාරණය ඉටු කිරීමේ අවශ්‍යතාවයට මෙන්ම වෙළඳාට සහ විවිධ අතරමැදියන් විසින් වෙළඳපොළ තුළ ඇතිකරන ඇති කරන මිල විකෘතිය වැළැක්වීමේ අවශ්‍යතාවයට ද විශාල බලපෑමක් සිදුවෙන බව ඔබතුමාටද තේරුම් ගත හැක. 

එම නිසා ඔබතුමාගේ මූලික යහපත් අරමුණ සහ ප්‍රබල දිර්ගකාලින ජාතික අවශ්‍යතාවයක් ඉටු කිරීම සඳහා පහත සඳහන් යෝජනා ඔබතුමා වෙත ඉතා ගෞරවයෙන් ඉදිරිපත් කරමු. 

01 නව නීතියක් මගින් කෘෂි නිෂ්පාදන අලෙවි කළමනාකරන අධිකාරියක් පිහිටුවීම (එම නීතිය මගින් ඔබතුමාට මහජනයා ලබාදෙන පරමාධිපත්‍යයේ බලය අනුව අදාළ යාන්ත්‍රණය කළමනාකරණය කිරීමේ ක්‍රියාවලියට මග පෙන්වීමේ අවස්ථාව ලැබේ) සහ එම නීතිය මගින් පහත සඳහන් වගකීම් ඉටු කිරීම

02 දැනට පවතින වෙළදුන් සහ අතරමැදියන් විසින් පාලනය කරන මිලදී ගැනීමේ මධ්‍යස්ථාන ක්‍රමය වෙනුවට ගොවී සංවිධාන සහ ගොවි සමූපකාර පිහිටුවීම සහ ඒවා යොදා ගැනීම මගින් සියලුම ආර්ථික මධ්‍යස්ථාන කෘෂි නිෂ්පාදන අලෙවි කිරීමේ (තොග සහ සිල්ලර) මධ්‍යස්ථාන බවට පරිවර්තනය කළ යුතුය. ඒ අනුව කඩ කාමර සියල්ල නිෂ්පාදකයා වෙත පැවරිය යුතු අතර ඒවා වෙළෙන්දන්ට හෝ අතරමැදියන්ට නැවත බදු දීම තහනම් කළ යුතුය.

03 කෘෂිකර්ම දෙපාර්තමේන්තුව ගොවිජන සේවා දෙපාර්තමේන්තුව සහ හෙට්ටර් කොබ්බෑකඩුව ගොවි පර්යේෂණ ආයතන වැනි ආයතන නියෝජනය වන ලෙස විද්වත් උපදේශක මණ්ඩලයක් පත් කිරීම

04 එම උපදේශක මණ්ඩලයේ පර්යේෂණ දත්ත සහ ගොවියාගේ අදහස් ලබා ගැනීම මගින් තෝරාගත් කෘෂි නිෂ්පාදන ප්‍රමාණයක් සඳහා අවම සහායක මිල (MSP) එනම් නිෂ්පාදන පිරිවැය අනුව ගොවියාට ලැබිය යුතු අවම මිල නියම කළ යුතුය. (ඉන්දියාවේ භෝග 22ක් සඳහා (MSP) පනවා ඇත)

05 ආර්ථික මධ්‍යස්ථාන වලින් ලාභ ඉපයීමේ අරමුණ වෙනුවට ඒවා ස්වාධීනව නඩත්තු කිරීම සඳහා අවශ්‍ය පිරිවැයට සාපේක්ෂව කඩ කාමර සහ තොග ගබඩා හෝ සීතාගාර ආදිය සඳහා සාධාරණ අවම මිල නියම කිරීම.

06 එම අධිකාරිය මගින් ගොවි සංවිධාන සහ සමූපකාර, එනම් ආර්ථික මධ්‍යස්ථානවල කටයුතු මෙහෙයවන නිෂ්පාදකයින් නියෝජනය වන සංවිධාන ලියාපදිංචි කිරීම, පුහුණුව සහ උපදෙස් ලබාදීම.

07 අධිකාරියේ ලාභයාංශයේ කොටසක් යොදවා ගොවීන්ගේ සුබ සාධනය පුහුණුව ආදිය සඳහා විශේෂ අරමුදලක් පිහිටුවීම.

08 පශ්චාත් අස්වනු නාස්තිය අවම කිරීම සහ මිල පහත වැටීම වැළැක්වීම සඳහා සීතාගාර පහසුකම් සැපයීම සහ වටිනාකම් එකතු කිරීම් කර්මාන්ත දිරිගැන්වීම සඳහා ආයතනයේ අරමුදල් යෙදවීම. එම ක්‍රියාවලිය තුළ ගොවී සංවිධාන සහ ගොවි සමූපකාර සඳහා ප්‍රමුඛතාවය ලබාදීම.

09 බෙදා හැරීමේ ගැටළු අවම කිරීම සඳහා පුද්ගලික තොග වෙළදුන්ට සහ සමුපාකාර සමිතිවලට අවශ්‍යය පහසුකම් සහ වෙනත් අවශ්‍යතාවයන් ඉටු කිරීම සඳහා ණය පහසුකම් ලබාදීම සදහා මැදිහත්වීම සහ බෙදා හැරීමේ වෙළඳුන් සහ සමූපකාර ලියාපදිංචි කිරීම මගින් නිසි මඟ පෙන්වීම ලබාදීම.

10 අදාල නීතිය මගින් ගොවි ජනතාවගේ සහ පාරිභෝගිකයාගේ පැමිණිලි විභාග කර විසඳුම් නිර්දේශ කිරීම සඳහා ත්‍රී පුද්ගල කොමිසමක් පත් කිරීම සහ ආනයන බදු වංචා හෝ මිල විකෘතියක් ඇතිවන ලෙස බදු සහන ලබාදීම තුළ දේශීය නිෂ්පාදනවල මිල ගණන් පහත වැටීම වැළැක්වීම හෙවත් මිල විකෘතිය වැළැක්වීම සඳහා රජයට නිර්දේශ ලබාදීමේ බලය එම නීතිය මගින් කොමිසමට ලබාදීම. එසේම කොමිසම මගින් සිදු කරන සියලු පරීක්ෂණ සහ ඊට අදාළ තොරතුරු මෙන්ම නිර්දේශ විධිමත්ව නිල වශයෙන් ප්‍රකාශයට පත් කිරීම සඳහා නීතිමය ප්‍රතිපාදන පැනවීම.

ස්තුතියි

නලින් ද සේනාරත්න

කැදවුම්කරු

ගොවි ජනපරපුර