ඇගළුම් අපනයන ආදායම වැටේ.. මැණික්, ස්වර්ණාබරණ, කුළුබඩු ආදායමත් පහලට..

Feb 27, 2026 at 05:43 AM

|

Lanka Leader

ඉකුත් වසරේ (2025) ජනවාරි මාසයට සාපේක්ෂව මේ වසරේ ජනවාරි මාසයේදී ඇඟලුම් සහ රෙදිපිළි අපනයන ආදායම අඩුවී ඇති බව අපනයන සංවර්ධන මණ්ඩලයේ තොරතුරු සඳහන් කරයි.

මේ වසරේ ජනවාරි මාසයේදී ඇඟලුම් සහ රෙදිපිළි අපනයන ආදායම ඇමරිකානු ඩොලර් මිලියන 447.25 ක් (හාරසිය හතළිස් හතයි දශම දෙකයි පහ) වන අතර, ඉකුත් වසරේ (2025) ජනවාරි මාසයේදී ඇඟලුම් සහ රෙදිපිළි අපනයන ආදායම ඇමරිකානු ඩොලර් මිලියන 460.22 කි (හාරසිය හැටයි දශම දෙකයි දෙකයි).

මේ අනුව, මේ වසරේ ජනවාරි මාසයේදී ඇඟලුම් සහ රෙදිපිළි අපනයන ආදායම ඉකුත් වසරේ (2025) ජනවාරි මාසයට සාපේක්ෂව සියයට 2.82 කින් (දෙකයි දශම අටයි දෙක) අඩුවී ඇත.

ඇඟලුම් සහ රෙදිපිළිවලට අමතරව ඉකුත් වසරේ (2025) ජනවාරි මාසයට සාපේක්ෂව මේ වසරේ ජනවාරි මාසයේදී කුළුබඩු සහ සගන්ධ තෙල්, දියමන්ති,මැණික් සහ ස්වර්ණාභරණ අපනයන ආදායමද අඩුවී තිබේ.

කුළුබඩු සහ සගන්ධ තෙල් අපනයන ආදායම ඉකුත් වසරේ (2025) ජනවාරි මාසයට සාපේක්ෂව මේ වසරේ ජනවාරි මාසයේදී සියයට 4.57 කින්ද (හතරයි දශම පහයි හත), දියමන්ති, මැණික් සහ ස්වර්ණාභරණ අපනයන ආදායම ඉකුත් වසරේ (2025) ජනවාරි මාසයට සාපේක්ෂව මේ වසරේ ජනවාරි මාසයේදී සියයට 10.96 කින් (දහයයි දශම නමයයි හයකින්) අඩුවී ඇත.

රටවල් ලෙස ගත්විටද ඉකුත් වසරේ (2025) ජනවාරි මාසයට සාපේක්ෂව මේ වසරේ ජනවාරි මාසයේ අපනයන කාර්ය සාධනයට අනුව ඇමරිකා එක්සත් ජනපදයෙන් ලැබී තිබෙන ආදායම ඍණ 0.90 කින් (දශම නමයයි බිංදුව) අඩුවී ඇත. 

ඉකුත් වසරේ (2025) ජනවාරි මාසයේදී ඇමරිකා එක්සත් ජනපදයට භාණ්ඩ අපනයනයෙන් ඇමරිකානු ඩොලර් මිලියන 260 ක ආදායම ලැබී ඇති අතර,මේ වසරේ ජනවාරි මාසයේදී එය ඇමරිකානු ඩොලර් මිලියන 258 කට ආසන්න අගයක් දක්වා අඩුවී ඇත.

එමෙන්ම,ඉකුත් වසරේ ජනවාරි මාසයට සාපේක්ෂව මේ වසරේ ජනවාරි මාසයේදී එක්සත් අරාබි එමීර් රාජ්‍යය, ප්‍රංශය සහ කැනඩාව යන රටවලින් ලැබී තිබෙන අපනයන ආදායමද අඩුවී තිබේ.

ඇඟලුම් සහ රෙදිපිළි අපනයන ආදායම අඩුවීමට බලපාන ලද කරුණු සම්බන්ධව රජයේ ප්‍රවෘත්ති දෙපාර්තමේන්තුවේ පැවැති මාධ්‍ය හමුවකදී අපනයන සංවර්ධන මණ්ඩලයේ සභාපති, ප්‍රධාන විධායක නිලධාරි මංගල විජේසිංහගෙන් මාධ්‍යවේදියකු කරන ලද විමසීමකදී කියා සිටියේ ඇඟලුම් අපනයනයේ අඩුවක්වී නොමැති බවය.

- සාලිය කුමාර ගුණසේකර