ගෝලීය ක්‍රිප්ටෝ වත්කම් අත්පත් කර ගැනීම වෙනුවෙන් එක්සත් ජනපදය 'තාක්ෂණික ආධිපත්‍යය' භාවිතා කරනවා- චීන සයිබර් ආරක්ෂණ ආයතන

Feb 26, 2026 at 03:49 PM

|

Lanka Leader

චීන සයිබර් ආරක්ෂණ ආයතන කිහිපයක් අද(26) වාර්තාවක් නිකුත් කරමින්, ගෝලීය අථත්‍ය මුදල් වත්කම් විශාල ප්‍රමාණයක් රාජසන්තක කිරීම සඳහා එක්සත් ජනපදය එහි තාක්ෂණික සහ නියාමන බලපෑම උපයෝගී කර ගන්නා බවට චෝදනා කරනු ලැබුවේය.

"ඉහළම ක්‍රීඩකයා: එක්සත් ජනපද තාක්ෂණික ආධිපත්‍යය යටතේ ගෝලීය අථත්‍ය මුල්‍ය වත්කම් පැහැර ගැනීම පිළිබඳ විශ්ලේෂණය" යන මාතෘකාව යටතේ ලියවුනු වාර්තාව,චීනයේ ජාතික පරිගණක වෛරස් හදිසි ප්‍රතිචාර මධ්‍යස්ථානය, පරිගණක වෛරස් වැළැක්වීමේ තාක්ෂණය සඳහා වූ ජාතික ඉංජිනේරු රසායනාගාරය, 360 ඩිජිටල් ආරක්ෂක කණ්ඩායම සහ ඇන්ටි ලැබ්ස් විසින් ඒකාබද්ධව නිකුත් කරන ලදී.

වාර්තාවට අනුව, 2022 සහ 2025 අතර කාලය තුළ එක්සත් ජනපද බලධාරීන් විවිධ බලාත්මක කිරීමේ ක්‍රියාමාර්ග හරහා ලොව පුරා ඩොලර් බිලියන 30 කට වඩා වටිනා අථත්‍ය මුදල් වත්කම් රාජසන්තක කරනු ලැබ තිබේ. ව්‍යාපාරික චෙන් ෂි සම්බන්ධයෙන් වූ එක් නඩුවක් පමණක් ඩොලර් බිලියන 15 ක් හෝ ඉහත සඳහන් කළ මුදලින් අඩක් පමණ වූ බව වාර්තාව පවසයි.

මෙම අධ්‍යයනය ගුප්ත ව්‍යවහාර මුදල් (ක්‍රිප්ටෝ කරන්සි ) හුවමාරුව වන ඹිනන්cඑ හි නිර්මාතෘ චෙන් ෂි සහ ෂාඕ චැංපෙන්ග් ඇතුළු ඉහළ පෙළේ සිද්ධීන් විශ්ලේෂණය කරයි. මෙම සිද්ධීන්, තාක්ෂණික නිරීක්ෂණ, නියාමන සම්බන්ධීකරණය සහ එක්සත් ජනපද බලධාරීන් විසින් බලාත්මක කිරීමේ ක්‍රියාමාර්ගවල “සංවෘත-ලූප් උපාය මාර්ගයක්” ලෙස ඔවුන් පවසන දේ පිළිබිඹු කරන බවට වාර්තාවේ කතුවරුන් තර්ක කරති.

ඩිජිටල් වත්කම්වල වෙළඳපල වැදගත්කම

ග්ලෝබල් ටයිම්ස් වෙබ් අඩවිය සමඟ කළ සම්මුඛ සාකච්ඡාවකදී, ජාතික පරිගණක වෛරස් හදිසි ප්‍රතිචාර මධ්‍යස්ථානයේ ජ්‍යෙෂ්ඨ ඉංජිනේරුවෙකු වන ඩූ ෂෙන්හුවා, 2026 ජනවාරි වන විට ගෝලීය ඩිජිටල් මුදල් වෙළඳපල ප්‍රාග්ධනීකරණය ආසන්න වශයෙන් ඩොලර් ට්‍රිලියන 2.73 ක් වූ බවට තහවුරු කරන ජාත්‍යන්තර සංඛ්‍යාලේඛන උපුටා දැක්වීය. එයින් බිට්කොයින්හි වෙළෙඳ පොළ ඩොලර් ට්‍රිලියන 1.57 ක් පමණ විය.

මෙම අගය ගෝලීය නිල රන් සංචිතවල ඇස්තමේන්තුගත වටිනාකමෙන් අඩකට ආසන්න ප්‍රමාණයක් වන බවත්, එම කාලය තුළ එය ඩොලර් ට්‍රිලියන 5.83 ක් පමණ වූ බවත්,ඒ අනුව ඩිජිටල් වත්කම්වල වර්ධනය වන මූල්‍ය බර අවධාරණය කරන බවත් ඩූ සඳහන් කළේය. මෙයින් පෙන්නුම් කරන්නේ අතථ්‍ය මුදල් වත්කම්වල වෙළඳපල වටිනාකම දැනටමත් ගෝලීය නිල රන් සංචිතවල මුළු වටිනාකමෙන් සියයට 47 ක් පමණ - අඩකට ආසන්න - ළඟා වී ඇති බවත්, එමඟින් ඒවා සැලකිය යුතු නව මූල්‍ය වත්කමක් බවට පත් කරන බවත්ය.

එක්සත් ජනපදය සයිබර් මෙහෙයුම්, නියාමන පියවර සහ දිගු කාලීන අධිකරණ බලය භාවිතා කරමින් ගෝලීය අථත්‍ය මුදල් ගනුදෙනු එහි බලාත්මක කිරීමේ රාමුවට ඇතුළත් කරන බවත්, එමඟින් මහා පරිමාණ වත්කම් අත්පත් කර ගැනීමට හැකි වන බවත් ඔහු චෝදනා කළේය.

චෙන් ෂි සහ බයිනෑන්ස් නඩු

චීන බලධාරීන් විසින් දේශසීමා සූදු සහ වංචා ව්‍යාපාරික සංඝයක(සින්ඩිකේටයක ) ප්‍රධානියා ලෙස හඳුනාගෙන ඇති චෙන් ෂිගේ සිද්ධිය වාර්තාවෙන් ඉස්මතු කරනු ලබයි. චීනයේ මහජන ආරක්ෂක අමාත්‍යාංශයට අනුව, චෙන් මෙම වසර මුලදී කාම්බෝජයෙන් චීනයට පිටුවහල් කරන ලද අතර බහුවිධ අපරාධ සම්බන්ධයෙන් විමර්ශනයට ලක්ව ඇති පුද්ගලයෙකි.

2025 ඔක්තෝම්බර් මාසයේදී නිව්යෝර්ක් හි නැගෙනහිර දිස්ත්‍රික්කය සඳහා වූ එක්සත් ජනපද නීතිපති කාර්යාලය චෙන්ට එරෙහිව අපරාධ චෝදනා ප්‍රකාශයට පත් කළ අතර ඔහුගේ පාලනය යටතේ පැවති බව කියන බිට්කොයින් 127,000 ක් පමණ රාජසන්තක කළ බවත්, එම අවස්ථාවේ එහි වටිනාකම ඩොලර් බිලියන 15 ක් පමණ වූ බවත් වාර්තාවේ සඳහන් වේ. එය එක්සත් ජනපද අධිකරණ ඉතිහාසයේ විශාලතම අතථ්‍ය වත්කම් අත්පත් කර ගැනීම් වලින් එකක් ලෙස වාර්තාව විස්තර කරයි.

එලෙසම එම වාර්තාව 2023 සහ 2025 අතර කාලය තුළ බයිනෑන්ස් සහ එහි නිර්මාතෘ ෂාඕ චැංපෙන්ග්ට එරෙහිව එක්සත් ජනපද නීතිමය ක්‍රියාමාර්ග වෙනමම පරීක්ෂා  කරයි. එක්සත් ජනපද බලධාරීන් විසින් කරන ලද පරීක්ෂණ විසඳීම සඳහා ඩොලර් බිලියන 4.3 ක දඩ මුදලක් ගෙවීමට බයිනෑන්ස් එකඟ වීමෙන් ඇධිකරණ කටයුතු අවසන් විය.

වොෂින්ටනය මුලින්ම ගෝලීය ඩිජිටල් වත්කම් වේදිකාවලට දේශීය නියාමන රාමු යොදන ආකාරය සහ පසුව නියාමන ආධිපත්‍යය තහවුරු කිරීම සඳහා බලාත්මක කිරීමේ ක්‍රියාමාර්ග සහ දඩ භාවිතා කරන ආකාරය එවැනි අවස්ථා මගින් පෙන්නුම් කරන බව ඩූ තර්ක කළේය.

සයිබර් මෙහෙයුම් පිළිබඳ චෝදනා

2023 සහ 2025 අතර කාලය තුළ ලොව පුරා ප්‍රධාන ගුප්ත ව්‍යවහාර මුදල් හුවමාරු 20 කට වැඩි ගණනකට එක්සත් ජනපද සහාය ලත් හැකර් කණ්ඩායම් ඉලක්ක කරගත් සයිබර් ප්‍රහාර සිදු කළ බව වාර්තාව තවදුරටත් කියා සිටී. චෝදනා කරන ලද උපක්‍රමවලට බාහ්‍යද්වාර රෝපනය (backdoor implantation ), තෝමර-තතුබෑම් (spear-phishing ) සහ සැපයුම් දාම ආක්‍රමණය ඇතුළත් විය.

වාර්තා වූ සමහර සයිබර් ක්‍රියාකාරකම් එක්සත් ජනපද අධිකරණ දෙපාර්තමේන්තුවේ සහ භාණ්ඩාගාර දෙපාර්තමේන්තුවේ විදේශ වත්කම් පාලන කාර්යාලයේ බලාත්මක කිරීමේ ක්‍රියාමාර්ග සමඟ සමපාත වන බව ඇන්ටි ලැබ්ස් හි නිර්මාතෘ ෂියාඕ සින්ගුවාං පැවසූ බව වාර්තාව උපුටා දක්වනු ලබයි.

අථත්‍ය වත්කම් අංශයේ බලාත්මක කිරීමේ ක්‍රියාමාර්ග සැලකිය යුතු මූල්‍ය ආදායමක් ජනනය කරන බවත්, ඩිජිටල් මූල්‍යකරණයේ එක්සත් ජනපද ඩොලරයේ ගෝලීය භූමිකාව ශක්තිමත් කරන බවත් පෙන්නුම් කරන එක්සත් ජනපද භාණ්ඩාගාර දත්ත ද වාර්තාවේ අඩංගු වේ.

ගුප්ත ව්‍යවහාර මුදල් අත්පත් කර ගැනීම් සහ දඬුවම් වංචා, මුදල් විශුද්ධිකරණය සහ සම්බාධක මග හැරීමට එරෙහිව සටන් කිරීමේ උත්සාහයන්ගේ කොටසක් බව එක්සත් ජනපද බලධාරීන් මීට පෙර පවසා තිබේ. චීන වාර්තාවේ දක්වා ඇති නිශ්චිත චෝදනාවලට එක්සත් ජනපද රජය මෙතෙක් ප්‍රතිචාර දක්වා නොමැත.

අධ්‍යයන වාර්තාවෙන් , ඩිජිටල් මූල්‍ය, නියාමන අධිකාරිය සහ ගෝලීය මූල්‍ය පද්ධතිය තුළ ගුප්ත ව්‍යවහාර මුදල්වල විකාශනය වන භූමිකාව සම්බන්ධයෙන් වර්ධනය වන භූ දේශපාලනික ආතතීන් පිළිබිඹු කරයි.