කිරින්දෙන් මත්කුඩු සොයාගත් සිද්ධියේ උපාය දූතයා ඝාතනය කිරීමේ සැලැස්මක් - අත්අඩංගුවට ගත් වෙඩික්කරු සියල්ල වමාරයි..

Feb 24, 2026 at 09:23 AM

|

Lanka Leader

කිරින්ද - අඳගලවැල්ල මුහුදු ප්‍රදේශයේදී රුපියල් කෝටි 400කට ආසන්න වටිනාකමකින් යුත් අයිස් මත්ද්‍රව්‍ය සමග සැකකරුවන් 07 දෙනෙකු අත්අඩංගුවට ගැනීමේ සිද්ධියේ උපාය දූතයා ලෙස පොලිසිය යොදාගත් පුද්ගලයා වෙඩිතබා ඝාතනය කිරීමේ සැලැස්මක් අනාවරණය වී තිබෙනවා.

එම ඝාතන සැලැස්මට යොදා ගැනීමට සිටි වෙඩික්කරු රත්නපුර ප්‍රදේශයේදී බස්නාහිර උතුර අපරාධ කොට්ඨාසයේ නිලධාරීන් විසින් අත්අඩංගුවට ගැනීමත් සමගයි මේ සම්බන්ධයෙන් තොරතුරු හෙළිව ඇත්තේ.

පසුගිය වසරේ නොවැම්බර් 12 වැනිදා මෙම වැටලීම සිදුකර තිබුණේ මෙම කොට්ඨාසය භාර සහකාර පොලිස් අධිකාරී රොහාන් ඕලුගලට ලද තොරතුරකට අනුවයි.

එම වැටලීම් සඳහා එම පොලිස් කොට්ඨාසයේ කොස්තාපල්වරයෙකුගේ ඥාතියෙකු උපාය දූතයෙකු ලෙස යොදා ගැනුණු අතර, වැටලීමේදී අයිස් මත්ද්‍රව්‍ය කිලෝ 329ක් සහ ඒවා ප්‍රවාහනයට පැමිණ තිබූ රථ 6ක් ද පොලිස් භාරයට ගෙන තිබුණා.

මෙම උපාය දූතයා සම්බන්ධයෙන් තොරතුරු හෙළිදරව්වීමත් සමග මත්කුඩු තොගය අයත් බව පැවසෙන දැනට ඩුබායි රාජ්‍යයේ රැදී සිටින හිටපු යුධ හමුදා සෙබලෙකු වන අංගොඩ ප්‍රියංකර සහ රූබන් නමැති මත්කුඩු ජාවාරම්කරුවන් ඔහුව ඝාතනය කිරීමට සැලසුම් කර තිබූ බවයි අත්අඩංගුවට ගත් වෙඩික්කරු ප්‍රකාශ කර ඇත්තේ.

මෙම වැටලීමෙන් පසු බස්නාහිර උතුර අපරාධ කොට්ඨාසයේ ස්ථානාධිපති ලින්ටන් සිල්වාට ද මරණ තර්ජන එල්ල වී තිබුණා.

අත්අඩංගුවට ගත් සැකකරු පොලිසියට පවසා ඇත්තේ, පොලිස් ජීප් රථයකට සමාන රථයකින් වැටලීමට එක්වූ උපාය දූතයාගේ නිවසට ගොස් ඔහුව පැහැරගන්නා ලෙස අංගොඩ ප්‍රියංකර නැමැත්තා උපදෙස් ලබාදී තිබූ බවයි.

අනතුරුව ඔහුව වෙඩි තබා ඝාතනය කර ගෙල කපා සහකාර පොලිස් අධිකාරී රොහාන් ඕලුගලගේ නිවසේ ගේට්ටුවෙහි එල්ලීමට සැලසුම් කර තිබූ බවද මොහු පොලිසියට පාපොච්ඡාරණය කර තිබෙනවා.

මේ අතර, අකුරේගොඩදී නීතිඥවරයා සහ ඔහුගේ බිරිද ඝාතනය කිරීමේ සිද්ධියට අදාළව මේ වනවිට වෙඩික්කරුවෙකු ඇතුළු 05 දෙනෙකු අත්අඩංගුවට ගෙන තිබෙනවා.

මූලාශ්‍ර - hirunews