"එක්සත් ජනපද ඩොලරයේ ගෝලීය භූමිකාව අවදානමට ලක්ව ඇත" -ජර්මානු මූල්‍ය නියාමන ආයතනය වන ෆෙඩරල් මූල්‍ය අධීක්ෂණ අධිකාරිය

Jan 30, 2026 at 03:36 PM

|

Lanka Leader

ගෝලීය සංචිත මුදල් ඒකකයක් ලෙස එක්සත් ජනපද ඩොලරයේ තත්ත්වය මෙම වසර මුලදීම  ප්‍රශ්නකාරී තත්වයකට පත් විය හැකි බව ජර්මානු මූල්‍ය නියාමන ආයතනය වන ෆෙඩරල් මූල්‍ය අධීක්ෂණ අධිකාරිය හෙවත් BaFin සිය වාර්ෂික අනාවැකිය මගින් අනතුරු අඟවා තිබේ. ෆෙඩරල් මූල්‍ය අධීක්ෂණ අධිකාරිය විසින් පසුගිය 28 වනදා ප්‍රකාශයට පත් කරන ලද වාර්තාවකට අනුව, ඩොලරය අරමුදල් හිඟය, භූ දේශපාලනික කම්පන සහ දේශපාලනීකරණයෙන් පීඩා විඳිය හැකිය.

මෙම අනාවැකිය පලවූවේ වසරකට ආසන්න කාලයක් තුළ ඩොලරයේ නරකම තනි දින පහත වැටීමෙන් පසුවය. අනෙකුත් ප්‍රධාන මුදල් වර්ගවලට සාපේක්ෂව ඩොලරයේ ශක්තිය මනිනු ලබන ප්‍රධාන දර්ශකයක් වන බ්ලූම්බර්ග් ඩොලර් ස්ථාන දර්ශකය, පසුගිය අප්‍රේල් මාසයේ දී එක්සත් ජනපද ජනාධිපති ඩොනල්ඩ් ට්‍රම්ප් ඔහුගේ පුළුල් ගෝලීය තීරුබදු න්‍යාය පත්‍රය එළිදැක්වීමෙන් පසු එහි තියුණුම පහත වැටීම වාර්තා කළේය.

“ගෝලීය සංචිත මුදල් ඒකකය ලෙස එක්සත් ජනපද ඩොලරයේ භූමිකාව පිළිබඳව ගෝලීය වෙළඳපොළවල් ප්‍රශ්න කරනු ලැබීමේ අවදානම පවතිනවා.” BaFin සභාපති මාර්ක් බ්‍රැන්සන් පැවසීය. “ආයතන දේශපාලනීකරණය කිරීමට ගන්නා දැඩි උත්සාහයන්” විශේෂයෙන් ආර්ථික හෝ මූල්‍ය අර්බුදයකදී ජාත්‍යන්තර සහයෝගීතාවයේ කාර්යක්ෂමතාව අඩපණ කළ හැකි බවට,  ඔහු අනතුරු ඇඟවීය.

භූ දේශපාලනික කම්පන නිසා ඇති විය හැකි "ද්‍රවශීලතා හිඟයන්" පිළිබඳව ද ආයතනය කනස්සල්ල පළ කළ අතර එය "විශේෂ වැදගත්කමක් ඇති" අවදානමක් ලෙස හැඳින්වීය.

වොෂින්ටනයේ ප්‍රතිපත්ති පිළිබඳ අවිනිශ්චිතතාවය මධ්‍යයේ එක්සත් ජනපද ඩොලරය දිගටම පහත වැටෙනු ඇතැයි මුල්‍ය වෙළඳුන් විශාල ලෙස ඔට්ටු අල්ලමින් සිටින බව මෙම සතියේ බ්ලූම්බර්ග් වාර්තා කළේය.බ්ලූම්බර්ග්ට අනුව, 2025 මැයි මාසයේ පසුව එළඹි ඕනෑම අවස්ථාවකට වඩා ඩොලරයේ දිගුකාලීන දැක්ම පිළිබඳව වෙළඳපොළවල් වඩාත් අශුභවාදී විය. මුදල් ඒකකයේ දුර්වලතාවය පිළිබඳ කනස්සල්ල ට්‍රම්ප් මීට පෙර ප්‍රතික්ෂේප කළ අතර, එය "හොඳින් ක්‍රියාත්මක වන" බවත් ඩොලරය "තමන්ගේම මට්ටම සොයා ගැනීමට" කටයුතු කිරීම ඔහුට අවශ්‍ය බවත් අවධාරණය කළේය.

පසුගිය වසරේ අප්‍රේල් සහ ජුනි අතර කාලය තුළ ගෝලීය විදේශ විනිමය සංචිතවල ඩොලරයේ කොටස දශක තුනක අවම අගයක් වන 56.3% දක්වා පහත වැටුණු බව IMF ඔක්තෝබර් මාසයේදී වාර්තා කළේය. කෙසේ වෙතත්, ඩොලරය පහත වැටීමට හේතුව මහ බැංකු විසින් හිතාමතාම ඩොලරය විකිණීමට පෙළඹිමට වලට වඩා මුදල් තක්සේරු කිරීමේ පියවරයන් ගැනීම බව අවධාරණය කළේය.