පිලිපීන නාවුක යාත්‍රාව ගිලීමෙන් අවම වශයෙන් 15 දෙනෙකු මියයයි! 28 දෙනෙකු තවමත අතුරුදහන්!

Jan 26, 2026 at 11:03 AM

|

Lanka Leader

මගීන් 332 ක් සහ කාර්ය මණ්ඩලයේ 27ක් සහිත පිරිසක් රැගත් පිලිපීන නාවුක යාත්‍රාව අද (26) උදෑසන පිලිපීන මුහුදේ ගිලී ගොස් ඇතැයි වාර්තාවේ. අනතුර හේතුවෙන් මේ වන විට අවම වශයෙන් 15 දෙනෙකු මිය ගොස් ඇති අතර, අවම වශයෙන් 43 දෙනෙකු අතුරුදහන් වී ඇති බව පිලිපීන වෙරළාරක්ෂක බලකාය පැවසූ බව මැනිලා ස්ටෑන්ඩර්ඩ් පුවත් පටහ වාර්තා කළේය. මේ අතර චීනයේ සින්හුවා ප්‍රවෘත්ති ඒජන්සිය පවසන්නේ, අනතුරට ලක් වූ පුද්ගලයින්ගේ ජාතිකත්වයන් තවමත් තහවුරු කළ නොහැකි බව පිලිපීනයේ චීන තානාපති කාර්යාලය පැවසූ බවයි.

අන්තර් දූපත් භාණ්ඩ හා මගී නෞකාවක් වන එම්/වී ට්‍රිෂා කර්ස්ටින් 3, පිලිපීනයේ සැම්බෝන්ගා වරාය නගරයේ සිට සුලු පළාතේ දකුණු ජොලෝ දූපතට යාත්‍රා කරමින් සිටියදී මෙම අනතුරට මුහුණ දුන් බව පිලිපීන වෙරළාරක්ෂක නිලධාරීන් උපුටා දක්වමින් ඒපී පුවත් සේවය වාර්තා කළේය.

යාත්‍රාව පෙරළුණු ස්ථානයට ආසන්නයේ පිහිටි බැසිලන් දූපත් පළාතේ ආණ්ඩුකාර මුජිව් හටමන් ඒපී පුවත් සේවය වෙත පැවසුවේ මගීන් සහ මළ සිරුරු දෙකක් පළාත් අගනුවර වන ඉසබෙලා වෙත ගෙන ආ බවයි. 

අද(26) අලුයම බලුක්-බලුක් දූපතේ මුහුදේ වාණිජ මගී යාත්‍රාව ගිලී ගිය පසු පිලිපීන වෙරළාරක්ෂක බලකාය දැවැන්ත සෝදිසි සහ ගලවා ගැනීමේ මෙහෙයුමක් දියත් කර තිබේ. පිලිපීන වෙරළාරක්ෂක බලකා නිලධාරීන් පැවසුවේ නෞකාව ඉරිදා රාත්‍රියේ සැම්බෝන්ගා වරායෙන් පිටත් වූ බවයි. එය මුහුදේදී අණතුරට මුහුණ දුන් අවස්ථාව වන විට සුලු හි ජොලෝ වෙත යමින් සිටි බව පිලිපීන මාධ්‍ය ආයතනයක් වන ABS-CBN ප්‍රවෘත්ති සේවය වාර්තා කළේය.

පිලිපීන වෙරළාරක්ෂක බලකාය සහ නාවික හමුදාව සහ ධීවර බෝට්ටු සමූහයක් සමඟ බැසිලාන් පළාතෙන් ඔබ්බෙහි සෙවීමේ සහ ගලවා ගැනීමේ උත්සාහයන් සිදු කරන ලද බව AP  පුවත් සේවය පවසයි.