විදුලිය අඩුවෙන් පාවිච්චි කරන අයගේ ගාස්තුව 300%කින් ඉහලට..

Jan 21, 2026 at 02:48 PM

|

Lanka Leader

ශ්‍රී ලංකාවේ ජාතික විදුලිබල ප්‍රතිපත්තිය සහ ප්‍රතිපත්තිය සෑදීමට ගත් ක්‍රියාමාර්ග සම්පූර්ණයෙන්ම නීති විරෝධී බව බලශක්ති විශේෂඥ ආචාර්ය විදුර රළපනාව පවසයි.

ඔහු පෙන්වා දෙන්නේ මෙම ප්‍රතිපත්ති සකස් වී ඇත්තේ එක් එක් පාර්ශ්වයන්ගේ වුවමනාවට බවය.

ජාතික විදුලිබල ප්‍රතිපත්තිය පිළිබඳ සාකච්ඡා කිරීම සඳහා හෙක්ටර් කොබ්බෑකඩුව ගොවි කටයුතු පර්යේෂණ හා පුහුණු ආයතනයේ නාරායන ස්වාමි ශාලාවේදි පරිසර යුක්ති කේන්ද්‍රය විසින් සංවිධානය කර තිබූ වට මේස සාකච්ඡාවේදි අදහස් දක්වමින් ඔහු මෙලස පැවසුවේය.

එහිදී ඔහු කියා සිටියේ මෙම ප්‍රතිපත්ති ප්‍රකාශයට අනුව මාසයකට විදුලි ඒකක 60 ට වඩා අඩුවෙන් භාවිත කරනවානම් ඒකක 0 ත් 30 ත් අතර පාරිභෝගිකයන්ට විදුලි බිල සියයට 300 කින් ද විදුලි ඒකක 30 ත් 60 ත් අතර පාරිභෝගිකයන්ට විදුලි බිල සියයට 200 කින් ද ඉහළ යන බවය.

එමෙන්ම 60 ත් 90 ත් අතර විදුලි එකක භාවිත කරන පාරිභෝගිකයන්ට විදුලි බිල සියයට 50 කින් ද ආගමික සිද්ධස්ථානයන්හි විදුලි බිල ද සියයට 500 කින් ඉහළ යන බවය.

මෙම ප්‍රතිපත්තියට අනුව ඒකක 180 ට වැඩියෙන් භාවිත කරන ඉහළ පෙළේ විදුලි පාරිභෝගිකයන්ට පමණක් විශාල සහනයක් ලැබී තිබෙන බවත් ඒ අනුව මෙම ප්‍රතිපත්තිය සකස් කර ඇත්තේ සාමාන්‍ය මට්ටමේ ජනතාවට නොව ඉහළ පෙළේ අයට සහනයක් ගෙන දෙන්නට බව ඔහු මෙහිදී පැවසුවේය.

මෙහිදී අදහස් දක්වා සිටි බලශක්තිවේදී අශෝක අබේගුණවර්ධන පැවසුවේ රටට වඩා අවශ්‍ය විදුලිබල ප්‍රතිපත්තියකට වඩා බලශක්ති ප්‍රතිපත්තියක් බවත් ඒ සම්බන්ධයෙන් කිසිවකුට අවශ්‍යතාවක් නොමැති බවත්ය.

වර්තමාන ආණ්ඩුව විසින් මූලික තැනක් ලබාදෙන්නේ පුනර්ජනනීය බලශක්තියට නොවන බවත් මෙම ප්‍රතිපත්තිය කියවූ විට මෙම ආණ්ඩුව ඒ සම්බන්ධයෙන් ලබාදෙන ස්ථානය සම්බන්ධයෙන් වැටහෙන බවත් මෙහිදී ඔහු පැවසුවේය,

ජාතික විදුලිබල ප්‍රතිපත්තියේ අඩංගු ඇතැම් කරුණු තනි පුද්ගලයකු මත පදනම්ව සකසා ඇති බවට එය කියවන විට සිතෙන බවත් ඒ අනුව පැවසිය හැක්කේ අද තියෙන්නේ මාලිමා ආණ්ඩුවක් නොව සියඹලාණ්ඩුවක් බවත් අශෝක අබේගුණවර්ධන මෙහිදී වැඩිදුරටත් පැවැසුවේය.

මෙම වට මේස සාකච්ඡාවේදි අදහස් දක්වමින් පරිසර යුක්ති කේන්ද්‍රයේ සභාපති හේමන්ත විතානගේ පෙන්වා දුන්නේ පුනර්ජනනීය බලශක්තිය සියයට 70 ක් දක්වා ඉහළ නැංවීමට 2030 වසර වන විට කටයුතු කරන බවට පැවසූ ආණ්ඩුව ජාතික විදුලි බල ප්‍රතිපත්තියේ ඒ සම්බන්ධයෙන් දක්වා නොමැති බවත්ය.

එමෙන්ම ඔහු පැවසුවේ මෙම ප්‍රතිපත්තිය සම්බන්ධයෙන් මහජන අදහස් විමසුව ද මාධ්‍යත් මහජනතාවත් යන දෙපාර්ශ්වයටම මේ සම්බන්ධයෙන් පැහැදිලි අවබෝධයක් නොමැති බවය. මෙම අවස්ථාව සඳහා සිය අදහස් පළ කිරීම සඳහා විදුලි බල සහ බලශක්ති ක්ෂේත්‍රයට සම්බන්ධ පිරිස්, විවිධ ආයතන නියෝජනය කරන පිරිස් ඇතුළු විශාල පිරිසක් සහභාගී වී සිටියහ.

- අශිකා ජයවීර