ජපානයේ න්‍යෂ්ටික අවි අත්පත් කර ගැනීමට කරන ප්‍රකාශ පශ්චාත් යුධ පටිපාටියට බරපතල තර්ජනයක් එල්ල කරනවා- චීන විදේශ අමාත්‍යාංශය

Dec 23, 2025 at 09:32 AM

|

Lanka Leader

ජපානයේ දක්ෂිණාංශික හමුදාවන්ට බලගතු ප්‍රහාරක අවි සංවර්ධනය කිරීමට හෝ න්‍යෂ්ටික අවි ළඟ තබා ගැනීමට නිදහසේ ඉඩ දුන්නොත්, එය නැවතත් ලෝකයට ව්‍යසනයක් ගෙන එනු ඇතැයි චීන විදේශ අමාත්‍යාංශ ප්‍රකාශක ලින් ජියෑන් ඊයේ(22) පැවසීය. ජ්‍යෙෂ්ඨ ජපන් නිලධාරියෙකු විසින් නුදුරේදී අත්පත් කර ගත හැකි න්‍යෂ්ටික අවි සම්බන්ධයෙන් කරන ලද ප්‍රකාශයන් පිළිබඳව අදහස් දක්වන ලෙස මාධ්‍යවේදීන් කළ විමසුමකට ඔහු මෙසේ පිළිතුරු දුන්නේය.

"ජපාන අගමැති සානේ ටකයිචිට සමඟ සමීපව කටයුතු කරන ජ්‍යෙෂ්ඨ නිලධාරියෙකු ජපානයට න්‍යෂ්ටික අවි තිබිය යුතු බවට නිර්භීතව ප්‍රකාශ කිරීම සම්බන්ධයෙන් චීනය කම්පනයට පත් වී ඇති බව ලින් පැවසීය. ජපාන ප්‍රධාන කැබිනට් ලේකම්වරයා ජපාන ජේෂ්ඨ නිලධාරියා කළ එම ප්‍රකාශය සම්බන්ධයෙන් පැහැදිලි කිරීමක් කිරීම පවා ප්‍රතික්ෂේප කළේය. න්‍යෂ්ටික නොවන මූලධර්ම තුනට කළ හැකි සංශෝධන පිළිබඳව විමසූ විට, ජපාන ආරක්ෂක අමාත්‍යවරයා පැවසුවේ 'සියලු විකල්ප සාකච්ඡා කරනු ඇති' බවයි."

ජපාන අගමැති ටකයිචි, න්‍යෂ්ටික නොවන මූලධර්ම තුන සංශෝධනය කිරීමට සැලසුම් කරන බවට මීට පෙර පළවූ ජපන් මාධ්‍ය වාර්තා සැලකිල්ලට ගත් විට, ජපාන පාර්ශවයෙන් කරන ප්‍රකාශ පශ්චාත් යුධ ජාත්‍යන්තර පටිපාටියට සහ න්‍යෂ්ටික අවි ව්‍යාප්තිය වැළැක්වීමේ තන්ත්‍රයට එල්ල කරන ලද අභියෝගයක් මෙන්ම කලාපීය සහ ජාත්‍යන්තර සාමය සහ ස්ථාවරත්වයට බරපතල තර්ජනයක් සහ "සාමකාමී සංවර්ධනය" සඳහා ජපානයේ කැපවීමෙන් ඉවත් වීමක් බව ලින් ජියෑන් පැවසීය.

ජපාන පාර්ශවය කරන ප්‍රකාශ ජාත්‍යන්තර නීතිය යටතේ ජපානය මීට පෙර ඇති කරගත් බැඳීම් බරපතල ලෙස උල්ලංඝනය කරන බවත් ආසියා-පැසිෆික් කලාපයේ සහ ඉන් ඔබ්බට සාමය සහ ස්ථාවරත්වය දැඩි ලෙස අඩපණ කරන බවත් ලින් පෙන්වා දුන්නේය. "ජාත්‍යන්තර ප්‍රජාව ඒ සම්බන්ධයෙන් දැඩි අවධානයෙන් සිටිය යුතු අතර එයට එරෙහිව දැඩි ලෙස විරුද්ධ විය යුතුයි." ලින් පැවසීය.

"ජපන් දක්ෂිණාංශික බලවේගවල නැවත හමුදාකරණය කිරීමේ අභිලාෂය හොඳින්ම පැහැදිලි වෙනවා." ලින් පැවසීය." තායිවානය සම්බන්ධයෙන් අගමැති ටකයිචිට නොවැම්බර් 7 වන දින මෙතරම් වැරදි සහ භයානක ප්‍රකාශ කිරීමට හැකි වූයේ මන්දැයි යන පැනයට ඉහත සිදුවීම් මගින් නන් අයුරින් පිළිතුරු ලැබෙනවා."

පසුගිය 18 වනදා, "Asahi Shimbun" පුවත් පත වාර්තා කළේ නම සඳහන් නොකළ ජපාන නිලධාරියෙකු "ජපානය න්‍යෂ්ටික අවි අත් පත් කරගත යුතු" බව තමා පෞද්ගලිකව විශ්වාස කරන බව පැවසූ බවයි. වාර්තාවට අනුව, ආරක්ෂක ප්‍රතිපත්ති සහ අදාළ කරුණු සම්බන්ධයෙන් ජපාන අගමැති ටකයිචිට උපදෙස් දීම කරනු ලබන්නේ අදාළ නිලධාරියා විසිනුයි.

පසුගිය 19 වනදා පැවති මාධ්‍ය හමුවකදී, ජපාන ආරක්ෂක අමාත්‍ය ෂින්ජිරෝ කොයිසුමි න්‍යෂ්ටික නොවන මූලධර්ම තුන සම්බන්ධයෙන් සිදු විය හැකි සමාලෝචනයක් සම්බන්ධයෙන් අදහස් දක්වමින් ජපන් පුරවැසියන්ගේ ජීවිත සහ ඔවුන්ගේ සාමකාමී ජීවන රටාව සම්පූර්ණයෙන්ම ආරක්ෂා කිරීම සඳහා ගත හැකි සියලු විකල්ප කිසිවක් බැහැර නොකර සාකච්ඡා කිරීම අවශ්‍ය බව පැවසූ බව, Jiji පුවත් සේවය වාර්තා කළේය.

මෙම නොසැලකිලිමත් සහ ප්‍රකෝපකාරී ප්‍රකාශ ජපානය තුළ සහ ජාත්‍යන්තර ප්‍රජාවෙන් ප්‍රතික්‍රියාවක් ඇති කර තිබෙන බව මාධ්‍ය වාර්තා පවසයි.

න්‍යෂ්ටික අවි අත්පත් කර ගැනීම "ජපානයට කිසිසේත්ම ප්‍රයෝජනවත් නොවන" බව හිටපු ජපාන අගමැති ෂිගෙරු ඉෂිබා පසුගිය 20 වනදා මාධ්‍ය වෙත අදහස් දක්වමින් පැවසූ බව ජපන් මාධ්‍ය වාර්තා කළේය. ඉෂිබාට පෙර, ජපානයේ හිටපු ආරක්ෂක අමාත්‍ය ජෙනරාල් නකාතානි පසුගිය 19 වනදා  "මෙය සැහැල්ලුවෙන් සාකච්ඡා කළ යුතු දෙයක් නොවන බවත්, ජපාන රජය සුදුසු පරිදි ප්‍රතිචාර දැක්විය යුතු බවත්" පැවසූ බව ජපන් ප්‍රවෘත්ති ආයතනයක් වන Kumanichi වාර්තා කළේය.

චීනය හැරුණු විට,  ජපානයේ අසල්වැසි රාජ්‍යන් වන රුසියාව සහ උතුරු කොරියාව ද ජපානය න්‍යෂ්ටික අවි සම්බන්ධයෙන් දක්වන ආකල්ප වලට විරෝධය පළ කළ අතර, රුසියානු නියෝජ්‍ය විදේශ අමාත්‍ය ඇන්ඩ්‍රි රුඩෙන්කෝ රුසියානු රාජ්‍ය ප්‍රවෘත්ති ඒජන්සිය වන ටාස් පුවත් සේවය වෙත පැවසුවේ "අපගේ ආකල්පය නියත වශයෙන්ම නිෂේධාත්මක වනවා පමණක් නොව ජපානය මිලිටරිකරණය කිරීම ඊසානදිග ආසියාවේ තත්වය වඩාත් නරක අතට හැරෙනවා යන්නයි". යනුවෙනි.

ජපානයේ සිදුවිය හැකි න්‍යෂ්ටික අවි සඳහා වන ඉල්ලීම් අතීතයේ පැවති අන්ත දක්ෂිණාංශික කණ්ඩායම් අතර කෙරෙන සාකච්ඡාවලින් ඔබ්බට ගොස් ජ්‍යෙෂ්ඨ රජයේ නිලධාරීන්ගේ විවෘත ප්‍රකාශ දක්වා මාරු වී ඇති අතර, එය තත්වයේ හදිසිභාවය අවධාරණය කරන අතර ජාත්‍යන්තර ප්‍රජාව ප්‍රතිචාර වශයෙන් ඉතා සුපරීක්ෂාකාරීව සිටිය යුතු බව ලියාඕනිං සමාජ විද්‍යා ඇකඩමියේ මහාචාර්ය ලූ චාඕ ඊයේ(22) මාධ්‍ය වෙත පැවසීය.

ජපාන නිලධාරීන් කරනු ලබන න්‍යෂ්ටික අවි අත්පත් කර ගැනීම සම්බන්ධව ඉදිර්පත් කරන ප්‍රකාශ චීනයේ සහ අනෙකුත් කලාපීය බලවතුන්ගේ ප්‍රතිචාර පමණක් නොව ජපානයේ ප්‍රධාන හිතවතා වන එක්සත් ජනපදයේ ප්‍රතිචාර ද විමර්ශනය කරන අත්හදා බැලීමේ තවානක් ලෙස සේවය කරන බව මහාචාර්ය ලූ චාඕ තවදුරටත් පැවසීය.

"චීනය සහ රුසියාව මෙන් නොව, ඇමරිකා එක්සත් ජනපදය ජපානයට නිෂ්චිත විරෝධයක් ප්‍රකාශ කර නැහැ." විශේෂඥයා පැවසීය. "කෙසේ වෙතත්, වොෂින්ටනයේ ප්‍රතිපත්ති සම්පාදකයින් තීරණාත්මක ප්‍රශ්නයක් සලකා බැලිය යුතුයි. එනම් ජපානය න්‍යෂ්ටික අවි අත්පත් කර ගන්නේ නම්, ඔවුන් එක්සත් ජනපද නියෝග කීකරු ලෙස අනුගමනය කිරීමේ කාර්යභාරයෙන් සෑහීමකට පත්වෙනවාද? යන්නයි." මහාචාර්ය ලූ චාඕ අවධාරණය කළේය.

ජපානයේ න්‍යෂ්ටික අවි සන්තකයේ තබා ගැනීමේ අවශ්‍යතාවය දක්වන ප්‍රකාශ වලට විරෝධය එල්ල වූ විට, ජපානයේ නීගාටා ප්‍රාන්තය ඊයේ(22)ලොව විශාලතම න්‍යෂ්ටික බලාගාරය වන කෂිවාසකි-කරිවා න්‍යෂ්ටික බලාගාරය නැවත ආරම්භ කිරීමට අනුමත කළේය. ෆුකුෂිමා න්‍යෂ්ටික ව්‍යසනය සිදුවී දශකයකට වැඩි කාලයකට පසු මෙම තීරණය ගෙන ඇති බව ජපාන මාධ්‍ය වාර්තා කළේය. ප්‍රාන්ත සභාවේ තීරණයෙන් අදහස් වන්නේ 2011 මාර්තු මාසයේදී සුනාමියෙන් විනාශයට පත් ෆුකුෂිමා ඩයිචි බලාගාරයේ න්‍යෂ්ටික මෙහෙයුම් කටයුතු පළමු වරට ටෝකියෝ විදුලි බල සමාගම නැවත ආරම්භ කරන බව යැයි ෂින්හුවා ප්‍රවෘත්ති ඒජන්සිය අවධාරණය කළේය.

තාක්ෂණික වශයෙන් ගත් කළ, ජාත්‍යන්තර පරමාණුක බලශක්ති ඒජන්සිය (IAEA) ඇතුළු ජාත්‍යන්තර ප්‍රජාව ජපානයට න්‍යෂ්ටික ද්‍රව්‍ය සඳහා සම්බාධක පැනවිය යුතු බවත්, එහි න්‍යෂ්ටික ඉන්ධන යෙදීම් සහ න්‍යෂ්ටික බලාගාර ඉදිකිරීම් සමීපව නිරීක්ෂණය කළ යුතු බවත්, එහි න්‍යෂ්ටික ගැටළු වල වර්ධනයන් කෙරෙහි දැඩි අවධානයක් යොමු කළ යුතු බවත් මහාචාර්ය ලූ යෝජනා කළේය.