වෙනිසියුලාවට එරෙහි අමෙරිකාවේ ප්‍රචන්ඩකාරි හැසිරීම පාලනය කිරීමට එක්සත් ජාතීන්ගේ සංවිධානය වහා මැදිහත් විය යුතුයි- ශ්‍රී ලංකාවේ බොලිවේරියානු සහයෝගිතාවය

Dec 18, 2025 at 05:52 AM

|

Lanka Leader

ශ්‍රී ලංකාවේ බොලිවේරියානු සහයෝගිතාවය එක්සත් ජාතීන්ගේ මහ ලේකම්වරයා වෙත ලිපියක් යොමු කරමින් පවසා සිටින්නේ එක්සත් ජාතීන්ගේ සංවිධානය වෙනිසියුලාවේ බොලිවේරියානු ජනරජයේ ලියාපදිංචි තෙල් ප්‍රවාහන නෞකාවක් අමෙරිකානු වෙරළ ආරක්ෂක බලකාය විසින් අත්අඩංගුවට ගැනීමෙන් පැන නගින අර්බුදයට සමනය කිරීමට  වහා මැදිහත් වන ලෙසයි. ශ්‍රී ලංකාවේ බොලිවේරියානු සහයෝගිතාවයේ ලේකම් ජීවන්ත ජයතිස්ස මහතාගේ අත්සනින් යුතුව එක්සත් ජාතීන්ගේ මහ ලේකම්වරයා වෙත යොමු කරනු ලබන එම ලිපිය මගින් පසුගිය දෙසැම්බර් 10 වනදා වෙනිසියුලාවේ සිට කියුබාවට ඛණිජ තෙල් ප්‍රවාහනය කරමින් තිබූ M/T Skipper නම් වානිජ නෞකාව අමෙරිකානු වෙරළ ආරක්ෂක බලකාය විසින් අත්අඩංගුවට ගැනීම මගින් අමෙරිකානු සම්බාධක හේතුවෙන් මේ වන විට දැඩි ආර්ථික සමාජීය සහ සෞඛ්‍ය අර්බූදයකට මුහුණ දී සිටින කියුබානු රාජ්‍යයට එරෙහිවද එල්ල කළ මරු පහරක් බවයි. එලෙසම අමෙරිකාව විසින් වෙනිසියුලාවේ බොලිවේරියානු ජනරජයට පනවා ඇති අමෙරිකානු සම්බාධක මධ්‍යයේ එරට ආර්ථිකය පවත්වාගෙන යාමට එම රජය ගන්නා ක්‍රියාමාර්ග වලට එරෙහිව අමෙරිකාව අවි බලය පෙන්වීමක් ලෙසද ශ්‍රී ලංකාවේ බොලිවේරියානු සහයෝගිතාවය පවසයි. අමෙරිකාවේ මෙම ප්‍රචන්ඩ ස්වරූපය පාලනය කිරීමට එක්සත් ජාතීන්ගේ සංවිධානයේ මහ ලේකම්වරයා මැදිහත් නොවන්නේ නම් වෙනිසියුලාවේ දැවැන්ත ආයෝජනයන් කර ඇති රාජ්‍ය මෙන්ම ලතින් අමෙරිකානු කළාපයේ අමෙරිකානු එක්සත් ජනපද ප්‍රචන්ඩත්වය නොඉවසන රාජ්‍ය වෙනිසියුලාවේ බොලිවේරියානු ජනරජය සමඟ එක පෙලට හිට ගැනීම අනිවාර්ය වනු ඇති බවද ශ්‍රී ලංකාවේ බොලිවේරියානු සහයෝගිතාවය පෙන්වා දෙයි. කළාපීය යුද්ධයක් බවට පත් වීමට ඉඩ ඇති එම ප්‍රවනතාවය සමස්ත ලෝක මානවයාගේ යහ පැවැත්මට බලපාන බැවින් අමෙරිකාවේ ප්‍රචන්ඩ ස්වරූපය පාලනය කිරීමට එක්සත් ජාතීන්ගේ සංවිධානය මැදිහත්වීම අනිවාර්ය කොන්දේසියක් බවද ශ්‍රී ලංකාවේ බොලිවේරියානු සහයෝගිතාවය පවසයි. එම සංවිධානය එක්සත් ජාතීන්ගේ මහ ලේකම්වරයා වෙත ඉදිරිපත් කළ ලිපිය පහතින්.