ආපදා තත්ත්වය පිළිබඳව කලින් දැනුම් දී තිබියදීත් අවශ්‍ය ක්‍රියාමාර්ග ගත්තා නම් මෙවැනි තත්ත්වයක් ඇති වන්නේ නෑ - කබීර් හෂීම්

Dec 2, 2025 at 05:40 AM

|

Lanka Leader

නොවැම්බර් 11 වැනිදා සහ 12 වැනිදා කාලගුණ විද්‍යා දෙපර්තමේන්තුව ඇතුළු අදාළ ආයතන මෙම හදිසි ආපදා තත්ත්වය පිළිබඳව කලින් දැනුම් දී තිබියදීත් අවශ්‍ය ක්‍රියාමාර්ග ගත්තා නම් මෙවැනි තත්ත්වයක් ඇති නොවන බවත් 75% කගේ පමණ ජීවිත බේරා ගැනීමට ඉඩ තිබුණු බවත් සමගි ජන බලවේගයේ පාර්ලිමේන්තු මන්ත්‍රී කබීර් හෂීම් අද(01) පාර්ලිමේන්තුවේදී ප්‍රකාශ කළේය.

ඔහු කියා සිටියේ මෙවැනි තත්ත්වයක් ඇතිවීමට පෙර අවශ්‍ය ක්‍රියාමාර්ග ගැනීමට ඉඩ තිබුණු බවයි.

මෙහිදී වැඩිදුරටත් අදහස් දැක්වූ කබීර් හෂීම් මන්ත්‍රීවරයා මෙසේද ප්‍රකාශ කළේය.්‍

"ගරු කතානායකතුමනි, නොවැම්බර් 11 වැනිදා සහ 12 වැනිදා කාලගුණ විද්‍යා දෙපාර්ත මේන්තුවත් වාරිමාර්ග දෙපාර්තමේන්තුවත් මේ ගැන අනතුරු ඇඟවීමක් කළා. විශාල විනාශයක් වෙන්න පුළුවන් කියලත් කිව්වා. නමුත් මේ ගැන පාර්ලිමේන්තුවේදී කතා කරලා අවශ්‍ය ක්‍රියාමාර්ග ගත්තේ නෑ.

දැනුත් ආණ්ඩුව කරන්න හදන්නේ ඒක. දැනුත් කතා කරන්න ඉඩ දෙන්නෙ නෑ. සාකච්ඡා කරලා අදහස් උපයෝගී කරගෙන එවැනි තත්ත්වයන් පිළිබඳව කතාබහ කරලා අවශ්‍ය ක්‍රියාමාර්ග ගන්න ඉඩ දෙන්නේ නැහැ.

සාකච්ඡා කරලා අදහස් උපයෝගී කරගෙන එවැනි තත්ත්වයන් පිළිබඳව කතාබහ කරලා අවශ්‍ය විනාශයන් වළක්වගන්න පුළුවන්.

නමුත් එහෙම කරන්නේ නෑ. දැන් මේ ජලාශවල වාන් දොරටු එක පාරට ඇරපු නිසා හුඟාක් තැන් යටවුණා. ජලාශවල වාන් දොරටු මේ අනතුරු ඇඟවීම දුන්නු දවසේ ඉඳලා ජලාශවල වාන් දොරටු ක්‍රම ක්‍රමයෙන් තමයි විවෘත කරන්න තිබුණේ.

නමුත් එක පාරටම විවෘත කිරීම නිසා හුඟක් තැන් යට වුණා. විශේෂයෙන්ම කොත්මලේ ජලාශයේ වාන් දොරටු එක පාරටම ඇරපු නිසා විශාල පිරිසකට ප්‍රශ්න ඇතිවුණා.

මේ මියගිය අයගෙන් සීයයට 75කගේ පමණ ජීවිත බේරා ගන්න තිබුණා මේ ආකාරයෙන් ක්‍රම ක්‍රමයෙන් වාන් දොරටු විවෘත කරා නම් .එහෙම කරේ නෑ ".