පොලිසියට දුන් ප්‍රකාශයක් ප්‍රසිද්ධ කිරීම වරදක්.. - විමල්ගෙන් චෝදනා..

Oct 11, 2025 at 07:39 PM

|

Lanka Leader

ජාතික නිදහස් පෙරමුණේ නායක, පාර්ලිමේන්තු මන්ත්‍රී විමල් වීරවංශ මහතා අද මාධ්‍ය හමුවක් පවත්වමින්, පොලිස් පරීක්ෂණයකට අදාළව තමන් දුන් ප්‍රකාශයක් විකෘති කර හෝ නොකර ප්‍රසිද්ධියට පත් කිරීම සම්බන්ධයෙන් ශ්‍රී ලංකා පොලිසියට සහ එහි ක්‍රියාකාරීත්වයට දැඩි විවේචනයක් එල්ල කළේය.

වීරවංශ මහතා සඳහන් කළේ, පොලීසිය විසින් පුද්ගලයෙකුගේ ප්‍රකාශයක් එලෙස ප්‍රසිද්ධියට පත් කළ ඉතිහාසයේ පළමු අවස්ථාව මෙය බවයි.

නීතිඥයෙකු මාර්ගයෙන් හෝ අධිකරණ නියෝගයක් අනුව මිස, පරීක්ෂණයකට අදාළව ලබා දෙන ප්‍රකාශයක පිටපතක් අදාළ පුද්ගලයාටවත් රිසි පරිදි ලබා ගැනීමට නොහැකි බවත්, එය රහස්‍යභාවය සහිතව තබා ගැනීමේ වැදගත්කම ඉන් තහවුරු වන බවත් මන්ත්‍රීවරයා අවධාරණය කළේය.

අපරාධ නඩු විධාන සංග්‍රහයේ 110(3) වගන්තිය පරීක්ෂා කළහොත්, පරීක්ෂණයකට අදාළව පුද්ගලයෙකු විසින් දෙනු ලබන ප්‍රකාශයක් කොතරම් රහස්‍යභාවයකින් ආරක්ෂා කළ යුතුද යන්න මැනවින් තහවුරු වන බව හෙතෙම කීය. එලෙස ප්‍රකාශයක් විකෘති කර හෝ නොකර ප්‍රසිද්ධියට පත් කිරීම, පරීක්ෂණයේ නිරෝගී ක්‍රියාකාරීත්වයට බාධාවක් විය හැකි බව ද වීරවංශ මහතා පෙන්වා දුන්නේය.

පොලිස් දෙපාර්තමේන්තුව මෙතෙක් කටයුතු කළ ආකාරය එය නොවන බවත්, අද වන විට මේ තියෙන්නේ ‘ශ්‍රී ලංකා පොලීසියද, ජේවීපී පොලීසියද’ යන ප්‍රශ්නය මතුව ඇති බවත් ඔහු පැවසීය.

වීරවංශ මහතාගේ ප්‍රකාශය වූයේ, තංගල්ල පොලීසියේ මත්ද්‍රව්‍ය ජාවාරම්කරුවන් ගැන කෙරෙන පරීක්ෂණයකට තමන්ව කැඳවූ නමුත්, එය එතරම් තදින් අදාළ වූවක් නොවූ අතර, තමාගෙන් ප්‍රකාශයක් ගනු ලැබුවේ එම පුද්ගලයා සහ දේශපාලන සම්බන්ධතා ගැන බවයි.

වර්තමාන පොලිස්පතිවරයා පොලිස් දෙපාර්තමේන්තුව ජේවීපී පොලීසියක් බවට පත් කිරීමට කටයුතු කර තිබීම කොතරම් සාධාරණද යන්නත්, එය දෙපාර්තමේන්තුවේ ගරුත්වයට හානි කරන ක්‍රියාවක් බවත් ඔහු ප්‍රශ්න කළේය. ඔහු වැඩිදුරටත් චෝදනා කළේ පොලිස් මාධ්‍ය ඒකකය ජේවීපී මාධ්‍ය ඒකකයක් බවට පත් කර ඇති බවයි. පොලිස්පතිවරයා ආණ්ඩුවේ මර්දන ක්‍රියාකාරීත්වයේ ප්‍රධානියා බවට පත්ව ඇති බවත්, ඔහුගේ භාවිතාව වී ඇත්තේ ආණ්ඩුවෙන් ලැබෙන න්‍යාය පත්‍රයට අනුව පුද්ගලයන් දඩයම් කිරීම බවත් වීරවංශ මහතා සඳහන් කළේය.

ඔහු යෝජනා කළේ, පොලිස්පතිවරයාට පොලිස් දෙපාර්තමේන්තුවේ ගරුත්වය රැකීමට නොහැකි නම්, ඔහු සතු නිල ඇඳුම වඩා සුදුසු කොස්තාපලවරයෙකුට ලබා දිය යුතු බවයි.

රටේ ජනගහනයෙන් 12.5%ක් දුප්පතුන් බවට පත් කර තිබියදී, රෝහල්වල බෙහෙත් නොමැති නිසා රෝගීන් මිය යන වටපිටාවක, රජය මෙම දේශපාලන දඩයම් සඳහා පොලිස් දෙපාර්තමේන්තුව යොදා ගනිමින් “නිල්පාට බස් එකෙන් ගොඩ යන්න” උත්සාහ කරන බවට මන්ත්‍රීවරයා චෝදනා කළේය.

ඔහු කියා සිටියේ, මෙම ක්‍රියාවෙන් විපක්ෂයේ කටවල් වට කරලා වැට බඳින්නට උත්සාහ කළත්, එය කිසිදා සිද්ධ කළ හැකි දෙයක් නොවන බවයි.

මෙම “අදූරදර්ශී” ක්‍රියාව පිළිබඳව පොලිස් කොමිෂන් සභාවට පැමිණිලි කිරීමට බලාපොරොත්තු වන බවත්, ඊට විරුද්ධව අධිකරණ ක්‍රියා මාර්ගයක් ගැනීම සඳහා හෙටදින නීති උපදෙස් ලබා ගැනීමට බලාපොරොත්තු වන බවත් වීරවංශ මහතා පැවසීය.

තමන් දුන් ප්‍රකාශයෙන් යමෙකුට අපහසයක් හෝ අගතියක් සිදුවී තිබේ නම්, එම පාර්ශ්වයට උසාවි යාමට හැකි බවත්, එවිට කරුණු කාරණා සහිතව සියල්ල ඔප්පු කර පෙන්වීමට තමන් සූදානම් බවත් ඔහු සඳහන් කළේය. පොලීසියට තමන්ව උසාවි ගෙන යාමට නොහැකි බවත්, බොරු කීවා නම් පොලීසියට ඊට සම්බන්ධ වීමට අවශ්‍ය වන්නේ කුමක් නිසාදැයි ප්‍රශ්න කළ ඔහු, පොලීසිය ජේවීපීයට උළුප්පා දක්වන බවට චෝදනා කළේය.

මෑතකදී සිදු වූ කැබිනට් සංශෝධනය පිළිබඳව අදහස් දක්වමින් වීරවංශ මහතා ප්‍රකාශ කළේ, එය හිටපු අමාත්‍ය විමල් රත්නායක මහතා සතුව තිබූ වරාය හා ගුවන් සේවා කොටස ගලවා ගැනීම සඳහාම සිදු කළ සූක්ෂම ක්‍රියාවක් බවයි.

එම කැබිනට් සංශෝධනය රටේ සංවර්ධන අභියෝග ජය ගැනීම සඳහා ඉලක්ක කරගත් ප්‍රතිසංස්කරණයක් නොවන බවත්, වරාය ආශ්‍රිතව තිබෙන යම්කිසි උවමනාවක් සපුරා ගැනීම සඳහා පහසුවෙන් කටයුතු කළ හැකි අමාත්‍යවරයෙකු යටතට අමාත්‍යාංශය පවරා දීමක් ලෙස එය පෙනෙන බවත් ඔහු වැඩිදුරටත් පැවසීය.

අනෙකුත් නියෝජ්‍ය අමාත්‍යවරුන්ට තනතුරු ලබා දුන්නේ ද එම “රෙපෙයාර්” එක කර ගැනීම සඳහා පාර කපා ගැනීම සඳහා බවට ඔහු විශ්වාසය පළ කළේය.

අල්ලස් කොමිසමේ අධ්‍යක්ෂ ජනරාල්වරයාගෙන් කැඳවීමක් පැවති නමුත්, උසාවි යාමට ඇති බැවින් වෙනත් දිනයක් ඉල්ලා සිටීමෙන් පසුව, නැවත දැන්වීමක් ලැබුණේ නැති බවත්, තමන් යම් වරදක් කළ බවක් නොවන නමුත් වරදක් පැටවීමට උත්සාහ කරන බවක් පෙනෙන්නට තිබෙන බවත් වීරවංශ මහතා ප්‍රකාශ කළේය.

දේශපාලන වශයෙන් තර්ජනය කිරීමෙන් තමන් බිය ගැන්විය නොහැකි බව අවධාරණය කළ ඔහු, “නිල්පාට බස් එකෙන්” ගොඩ යන්නට උත්සාහ කරන අයට සිදු වන්නේ “රතුපාට බස් එක ප්‍රපාතයකට ඇද වැටෙන එක” බවට අනතුරු ඇඟවීය.