අපේ අමෙරිකාවේ ජාතීන්ගේ එකමුතුකම බිඳදැමීමේ එක්සත් ජනපද කුමන්ත්‍රණයට ලතින් අමෙරිකානු ජාතීන් හසු නොවිය යුතුයි!-ශ්‍රී ලංකාවේ බොලිවේරියානු සහයෝගිතාවය

Oct 4, 2025 at 10:41 AM

|

Lanka Leader

කියුබාව නිකරගුවාව සහ වෙනිසියුලාව ඇමරිකානු රාජ්‍යයන්ගේ දසවන සමුළුවට සහභාගි කරගැනීමට ආරාධනා නොකිරීමට  ඩොමිනිකන් ජනරජය ගත් තීරණය සම්බන්ධයෙන් ශ්‍රී ලංකාවේ බොලිවේරියානු සහයෝගිතාවය සිය අප්‍රසාදය පල කර සිටියි. ඒ අනුව ශ්‍රී ලංකාවේ බොලිවේරියානු සහයෝගිතාවය නිවේදනයක් නිකුත් කරමින් පවසා සිටින්නේ,  මේ වන විට එක්සත් ජනපද අධිරාජ්‍ය විරෝධී කඳවුර තුළ විශාල භූමිකාවක් රඟ දක්වන වෙනිසියුලාව සම්බන්ධයෙන් එක්සත් ජනපද  අධිරාජ්‍යවාදියාගේ මානව විරෝධී ප්‍රජාතන්ත්‍ර විරෝධී ස්ථාවරය එලෙසින්ම ඩොමිනිකන් ජනරජයේ අනුමත කර තිබෙන බවයි. ඒ අනුව ශ්‍රී ලංකාවේ බොලිවේරියානු සහයෝගිතාවය වැඩිදුරටත් පවසා සිටින්නේ එක්සත් ජනපදයේ සතුරෙකු වීම භායානකයි මිතුරෙකු වීම මාරාන්තිකයි යන සුප්‍රසිද්ධ කියමන  සිහිතබා ගෙන දෙසැම්බර් 4 සහ 5 යන දිනවල ඩොමිනිකන් ජනරජයේ පුන්ටා කානාහිදී පැවැත්වීමට නියමිත ඇමරිකානු රාජ්‍යයන්ගේ දසවන සමුළුවට සහභාගි වීම කියුබාව, වෙනිසියුලාව සහ නිකරගුවාව යන රාජ්‍ය වලට ආරාධනා නොකිරීමට ඩොමිනිකන් ජනරජය ගෙන ඇති තීරණය නැවත සලකා බලන ලෙස ඉල්ලා සිටින බවයි.සම්පුර්ණ මාධ්‍ය නිවේදනයේ සිංහල පරිවර්තනය පහතින්...

අපේ  අමෙරිකාවේ ජාතීන්ගේ එකමුතුකම බිඳදැමීමේ එක්සත් ජනපද කුමන්ත්‍රණයට ලතින් අමෙරිකානු ජාතීන් හසු නොවිය යුතුයි!-ශ්‍රී ලංකාවේ බොලිවේරියානු සහයෝගිතාවය

අමෙරිකානු එක්සත් ජනපද අධිරාජ්‍යවාදයේ පැවැත්ම රඳා පවතින්නේ වෙනත් ජාතීන් සතු සම්පත් මංකොල්ල කෑම මතය යන්න අධිරාජ්‍ය විරෝධී ජනයා සෘජුවමත් අධිරාජ්‍ය ගැති ජනයා වක්‍රවත් පිළිගන්නා සත්‍යයකි. ඔවුන් වෙනත් ජාතීන් සතු සම්පත් මංකොල්ල කෑමට භාවිත කළ හැකි ඕනෑම තිරස්චීන ක්‍රියාවක යෙදෙන බව ඔවුන්ගේ වසර 250ක් වැනි වූ කෙටි ඉතිහාසය උඩින් පල්ලෙන් හැදෑරීමෙන් පවා කෙනෙකුට වටහා ගත හැකිය. එයට ඇති හොඳම උදාහරණය, කැරිබියානු කලාපයේ අමෙරිකාවට කිලෝ මීටර 90ක් දුරින් පිහිටි කියුබාවයි. කියුබානු විප්ලවය ජයග්‍රහණය කළ මොහොතේ සිටම අමෙරිකානු සම්බාධක වලට මුහුණ දීමට සිදුවිය. යම් කෙනෙකු කියුබානු විප්ලවයේ ඉතිහාසය හදාරන්නේ නම් කියුබාවට එරෙහි අමෙරිකානු සම්බාධක වල ඉතිහාසය හැදෑරීමම වනු ඇත. එලෙසම අමෙරිකානු ඉතිහාසයේ පහෙන් එක් කොටසක් වැය වී තිබෙන්නේ කියුබාවට එරෙහිව සම්බාධක පැනවීමේ ඉතිහාසයටය. ඒ අනුව රටක සම්පත් තිබීම පමණක් නොව ඒ රට අභිමානයෙන් ස්වාධීනව නැගී සිටීමට ගන්නා උත්සාහය පවා අධිරාජ්‍යවාදී අමෙරිකාව ඉවසන්නේ නැත. ඒ අනුව එක්සත් ජනපද අධිරාජ්‍යවාදියාට ලතින් අමෙරිකානු කැරිබියානු කලාපය දඩබිමක් ලෙස කෙතරම් වැදගත් දැයි  ලෝක ජනයාට පැහැදිලිය. එලෙසම අමෙරිකානු අධිරාජ්‍යවාදියා ඉදිරියේ දන නොනමන ලතින් අමෙරිකානු කැරිබියානු කලාපයක් ආසියානු අප්‍රිකානු අධිරාජ්‍ය විරෝධී ජනයාට ලබා දෙන උත්තේජනය විසින් සමස්ත ලෝක ජනයාගේම අධිරාජ්‍යවාදී එක්සත් ජනපදයෙන් නිදහස් වීමේ සිහිනය ඉක්මනින් සැබෑ වන බවද අවධාරණය කරමු.

අප මේ දීර්ඝ පුර්විකාව ලියනු ලැබුවේ එළඹෙන දෙසැම්බර් 4 සහ 5  දිනවල ඩොමිනිකන් ජනරජයේ පුන්ටා කානාහිදී පැවැත්වීමට නියමිත ඇමරිකානු රාජ්‍යයන්ගේ දසවන සමුළුවට සහභාගි වීම කියුබාව, වෙනිසියුලාව සහ නිකරගුවාව යන රාජ්‍ය වලට සහභාගි වීමට ඩොමිනිකන් ජනරජයේ විදේශ අමාත්‍යාංශයේ නිල සටහනක් මගින් ආරාධනා කර නොමැති බව තහවුරු කර ඇති බව දැනගැනීමෙන් පසුවය. ඩොමිනිකන් ජනරජයේ විදේශ අමාත්‍යාංශය සිය නිවේදනය මගින් පවසන දේ අනුව ඔවුන් මේ වන විට එක්සත් ජනපද අධිරාජ්‍ය විරෝධී කඳවුර තුළ විශාල භූමිකාවක් රඟ දක්වන වෙනිසියුලාව සම්බන්ධයෙන් එක්සත් ජනපද  අධිරාජ්‍යවාදියාගේ මානව විරෝධී ප්‍රජාතන්ත්‍ර විරෝධී ස්ථාවරය එලෙසින්ම අනුමත කර ඇත. එලෙසම ඩොමිනිකන් ජනරජයට කියුබාව සමඟ තිබෙන ඓතිහාසික බැඳීම අහක නොදමන බව ඩොමිනිකන් ජනරජයේ විදේශ අමාත්‍යාංශයේ ප්‍රකාශය මගින් වැඩිදුරටත් පවසා සිටී. එසේ නමුදු කියුබානු අසාහය විප්ලවවාදියා වන ෆිදෙල් කස්ත්‍රෝ වරක් බොලිවියානු ජනපතිවරයෙකු වූ ඉවෝ මොරලෙස්ට දේශපාලනය ඉගෙන ගත යුත්තේ ෆිදෙල් කස්ත්‍රෝවන තමාගෙන් නොව නව ලෝක පිළිවෙලෙහි තරුවක් වූ හියුගෝ චාවෙස්ගෙන් බව අවධාරණය කළේය. හියුගෝ චාවෙස්ගේ මරණයෙන් වෙනිසියුලාවේ ඇතිවූ හිඩැස මේ වන විට නිකොලොස් මදුරෝ ජනාධිපතිවරයා වඩාත් හොඳින් පුරවා ඇති බව කුහක නොවන ඕනෑම දේශපාලන චරිතයක් පිලිගන්නා සත්‍යයකි. ඔපෙක් සංවිධානයේ බලවත් රටක් ලෙස සිය අමෙරිකානු විරෝධී ස්ථාවරය මනා ලෙස පවත්වාගෙන යමින් වෙනිසියුලානු ජනයාගේ සුබ සෙත උදෙසා ගන්නා ක්‍රියා මාර්ග සයිමන් බොලිවාර් මෙන්ම හියුගෝ චාවෙස්ද පරයා යන බව පැවසීම අතිශයෝක්තියක් නොවේ.  එක්සත් ජනපද බළල් අත් වෙනිසියුලාවේ නිර්මාණය කළ වර්ණ විප්ලව දෙකක් පරාජය කළ නිකොලොස් මදුරෝ සිය ජනයා අමෙරිකානු සම්බාධක හේතුවෙන් මුහුණ දුන් දැඩි ඖෂධ හිඟය පාලනය කර ඇත්තේ මේ වන විට වෙනිසියුලාවේ අක්‍රියව තිබූ ඖෂධ නිෂ්පාදනාගාර 24 න් 23ක්ම බල ගන්වමින් බව අවධාරණය කරමු. නිකරගුවාව සම්බන්ධයෙන් සලකන කළ දිගු කළක් අමෙරිකානු අධිරාජ්‍යවාදී යකඩ සපත්තුවට පෑගී සිට නැගී සිටින්නට සාර්ථක උත්සාහයක් ගන්නා රටක් ලෙස අවධාරණය කරමු. ඒ අනුව ඇමරිකානු රාජ්‍යයන්ගේ දසවන සමුළුව මෙම රාජ්‍යයන්ගේ සහභාගීත්වයෙන් තොරව පවත්වන්නේ නම් එය හුදු කථා සාප්පුවක් පමණක් වනු ඇත. එලෙසම කියුබාව, වෙනිසියුලාව සහ නිකරගුවාව යන රාජ්‍යයන් අතහැර තම ඉදිරිගමන යන බව අධිරාජ්‍යවාදියාට ඩොමිනිකන් රාජ්‍ය දෙනු ලබන සංඥාවෙන් එක්සත් ජනපද බලහත්කාරය ඉදිරියේ දන නමන බව තහවුරු කිරීමකි. එලෙස එක්සත් ජනපද බලහත්කාරකම ඉදිරියේ දන නැමීමේ ප්‍රතිවිපාක අසල්වැසි හයිටි රාජ්‍ය මනා ලෙස භුක්ති විඳින බව හයිටියෙන් සැතපුම් දහස් ගණනක් ඈතින් සිටින අපට  වඩා අසල්වැසි ඩොමිනිකන් රාජ්‍යයේ ජනයා අවබෝධකර ගෙන ඇතැයි සිතමු. එලෙසම එක්සත් ජනපද බලහත්කාරය ඉදිරියේ දන නොනමන කියුබාව තම ජනයා ඉතාම දුෂ්කර තත්තවයන් යටතේ රැක ගන්නා අන්දමද ශ්‍රී ලංකාවේ අපට වඩා ඩොමිනිකන් රාජ්‍යයේ ජනයා හොඳින් අවබෝධ කරගෙන තිබෙන බව අපගේ වැටහීමයි. අවසාන වශයෙන් එක්සත් ජනපදයේ සතුරෙකු වීම භායානකයි මිතුරෙකු වීම මාරාන්තිකයි යන සුප්‍රසිද්ධ කියමන ඩොමිනිකන් රාජ්‍යයේ රාජ්‍ය පාලකයන්ටත් එහි ජනයාටත් ගෞරවයෙන් යුතුව සිහිපත් කරමු. ඒ අනුව දෙසැම්බර් 4 සහ 5 යන දිනවල ඩොමිනිකන් ජනරජයේ පුන්ටා කානාහිදී පැවැත්වීමට නියමිත ඇමරිකානු රාජ්‍යයන්ගේ දසවන සමුළුවට සහභාගි වීම කියුබාව, වෙනිසියුලාව සහ නිකරගුවාව යන රාජ්‍ය වලට ආරාධනා නොකිරීමට ඩොමිනිකන් ජනරජය ගෙන ඇති තීරණය නැවත සලකා බලන ලෙස ගෞරව පූර්වකව ඉල්ලා සිටිමු. 

ජීවන්ත ජයතිස්ස,

ශ්‍රී ලංකාවේ බොලිවේරියානු සහයෝගිතාවය.