පේරාදෙණිය විශ්වවිද්‍යාලයට අධිකරණයෙන් අතුරු තහනම් නියෝගයක්..

Sep 19, 2025 at 08:26 AM

|

Lanka Leader

පේරාදෙණිය විශ්වවිද්‍යාලයේ ප‍්‍රධාන ආරක්‍ෂක නිලධාරී එන්.කේ.සූරියබණ්ඩාර මහතා වහාම ක‍්‍රියාත්මක වන පරිදි නැවත එම තනතුරෙහි සේවයේ පිහිටුවන මෙන් අභියාචනාධිකරණය විසින් නියෝග කර ඇති අතර ඒ හා සමග ඔහුට එරෙහිව ඉදිරිපත් කර තිබෙන චෝදනා පත‍්‍රය අත්හිටුවීමට සහ වැඩ තහනම අත්හිටුවීම සදහා තවත් අතුරු තහනම් නියෝග දෙකක් නිකුත් කිරීමටද අභියාචනාධිකරණය විසින් කටයුතු කර ඇත.

පේරාදෙණිය විශ්වවිද්‍යාලයේ සේවකයන් පිරිසක් විසින් උපකුලපතිවරයා වෙත ඉදිරිපත් කර තිබෙන පෙත්සමක් සම්බන්ධයෙන් පරීක්‍ෂණයක් කිරීම පිණිස එහි ප‍්‍රධාන ආරක්‍ෂක නිලධාරීවරයා ලෙස කටයුතු කල එන්.කේ.සූරියබණ්ඩාර මහතා 2023-12-01 දින සිට අනිවාර්ය නිවාඩු යවා ඇති අතර පසුව වැඩ තහනමකටද ලක් කර ඇත.

එන්.කේ.සූරියබණ්ඩාර මහතා පේරාදෙණිය විශ්වවිද්‍යාලය විසින් ගන්නා ලද එම පියවර අභියෝගයට ලක් කරමින් නෙළුම් සේනානායක ඇසෝසියේට්ස් නීතීඥ සමාගම මගින් අභියාචනාධිකරණයේ අංක CA WRIT 705/’2025 දරණ රිට් පෙත්සම ගොනුකර ඇති අතර එමගින් නීතිවිරෝධී විනය ක‍්‍රියාවලිය අත්හිටුවීම සහ නැවත සේවයේ පිහිටුවීම ඇතුළු සහන කිහිපයක් ඉල්ලා සිටිමින් පේරාදෙණිය විශ්වවිද්‍යාලය ඇතුළු වග උත්තරකරුවන් 33 දෙනෙකු නම් කර තිබේ. මෙම පෙත්සම 2025-09-12 වන දින කැදවන ලද අවස්ථාවේදී මෙම නියෝග ලබාදී තිබේ.

2025-09-12 වන දින සිට සති 5 ක කාලයක් ඇතුලත විරෝධතා ඇත්තම් ගොනුකරන මෙන් මෙම නඩුවේ වගඋත්තරකරුවන් 33 දෙනා වෙත නියෝග කර ඇති අතර ඔවුන් වෙත විධිමත් නොතීසි නිකුත් කිරීමටද අභියාචනාධිකරණය විසින් කටයුතු කර ඇත.

පෙත්සම්කාර එන්.කේ.සූරියබණ්ඩාර මහතා වෙනුවෙන් ජනාධිපති නීතීඥ සංජීව ජයවර්ධන මහතා සමග නීතීඥ රන්මලී මීපාගල මහත්මිය පෙනී සිට ඇති අතර වගඋත්තරකරුවන් වෙනුවෙන් නියෝජ්‍ය සොලිසිටර් ජනරාල් ෂුරි ෂෙයින් මහත්මිය පෙනී සිට ඇත.