ආණ්ඩුව අමෙරිකාව සමග ආරක්ෂක හොර ගිවිසුමකට සැරසේ.. වහාම හෙළිදරව් කරනු!.. - ජාතික සංවිධාන කියයි

Aug 1, 2025 at 06:46 PM

|

Lanka Leader

ලංකා ලීඩර් වෙත අදහස් දැක්වූ ජාතික සංවිධාන එකමුතුවේ මාධ්‍ය ප්‍රකාශක වෛද්‍ය වසන්ත බණ්ඩාර මහතා සඳහන් කරන්නේ තීරු බදු අඩු කිරීමේ හිලව්වට ආණ්ඩුව අමෙරිකාව සමග වෙළෙඳ සහ ආරක්ෂක ගිවිසුමක් හොර රහසේ අත්සන් කිරීමට සැරසෙන බවය.

ඊට අදාළව සාක්ෂි මොනවාදැයි ප්‍රශ්න කිරීමේ දී ඔහු සඳහන් කරන්නේ අමෙරිකානු ජනාධිපති ඩොනල්ඩ් ට්‍රම්ප් විසින් තීරුබදු සහන ලබාදීමට අදාළව නිකුත් කළ විධායක නියෝගයට අනුව ශ්‍රී ලංකාවට බදු සහනයක් ලබාදීමට එකඟවන්නේ ශ්‍රී ලංකාවේ නියෝජිතයන් ඊට අදාළව වෙළෙඳ සහ ආරක්ෂක ගිවිසුමක් අත්සන් කිරීමට එකඟවීම නිසා බවය.

වසන්ත බණ්ඩාර මහතාට අනුව වෙළෙඳාම සමග ආරක්ෂක ගිවිසුමක් ගැටගසන්නේ බදු සහනය යොදා ගනිමින් අවසානයේ දී SOFA ගිවිසුමට අදාළ එකඟතාවය ලබා ගැනීම සඳහාය. වසන්ත බණ්ඩාර මහතාට අනුව SOFA ගිවිසුමට අදාළව 2016 දී ඉදිරිපත් කළ ඇමණුම B ලේඛනයට මාලිමා ආණ්ඩුව එකඟවුවහොත් අමෙරිකානු හමුදාවලට සහ එම හමුදාවලට සේවා සපයන සමාගම්වල නිලධාරීන්ට පූර්ව අවසර ගැනීමකින් තොරව ඕනෑම තොටුපොළකින් රට තුළට ඇතුළු විය හැක. ඊට අමතරව එම නිලධාරීන්ට නිල ඇඳුම් ඇතිව හෝ එසේ නොමැතිව රට තුළ මුහුදින්, අහසින් හෝ ගොඩබිමින් ගමන් කළ හැක. එසේම ඔවුන්ගේ වාහන හෝ ගමන්මළු පරීක්ෂා කළ නොහැකි අතර ඔවුන්ට රට තුළ ඕනෑම ස්ථානයක කඳවුරු බැඳිය හැක. 

තවද ඔවුන් අපරාධ වරදක් සිදුකළ හොත් නීතිමය ක්‍රියාමාර්ග ගැනීමට නොහැකි අතර, ඒ පිළිබඳ අමෙරිකානු තානිපතිට දැනුම් දිය යුතුය.

එම තත්ත්වය තුළ ආණ්ඩුව වහාම තමා එකඟවූ වෙළෙඳ සහ ආරක්ෂක ගිවිසුම්වලට අදාළ කොන්දේසි වහාම හෙළිදරව් කළ යුතු බව ඔහු සඳහන් කරයි.