කාදිනල් තුමාගේ සියලු චෝදනා ප්‍රතික්ෂේප කරමින් ගෝටාගෙන් කාදිනල් තුමාට ප්‍රති ප්‍රහාර

Apr 22, 2025 at 04:09 PM

|

Lanka Leader

පාස්කු ඉරිදා ප්‍රහාර සම්බන්ධයෙන් අග රදගුරු  මැල්කම් කාදිනල් රංජිත් හිමිපානන් විසින් කරන ලද චෝදනා දැඩි ලෙස ප්‍රතික්ෂේප කරමින්, හිටපු ජනාධිපති ගෝඨාභය රාජපක්ෂ මහතා පැවසුවේ  අග රදගුරු  මැල්කම් කාදිනල් රංජිත් හිමිපානන්  ත්‍රස්තවාදී ප්‍රහාරවල වගකීම නොසලකා හැරීම හෝ ත්‍රස්තවාදී ප්‍රහාරවලට සැබවින්ම සම්බන්ධ වූ පාර්ශව දෙක පැහැදිලිවම නිදහස් කරන බවයි.

පසුගියදා පැවැති මාධ්‍ය හමුවකදී  අග රදගුරු  මැල්කම් කාදිනල් රංජිත් හිමිපානන්  හිටපු ජනාධිපති ගෝඨාභය රාජපක්ෂ මහතාට එරෙහිව පහත සඳහන් චෝදනා ඉදිරිපත් කළහ.

• පාස්කු ඉරිදා ප්‍රහාර පිළිබඳ ජනාධිපති විමර්ශන කොමිසමේ වාර්තාව මට භාර දුන් දිනට පසු දින, මම දුරකථනයෙන් කාදිනල්තුමා සමඟ කතා කළ අතර එම වාර්තාවේ නිර්දේශ ක්‍රියාත්මක කිරීමේදී මට දුෂ්කරතා ඇති වූ බව පැවසූ අතර එමඟින් පුද්ගලයින් අත්අඩංගුවට ගැනීමට සහ මට සහාය දක්වන සංවිධාන පවා තහනම් කිරීමට සිදුවනු ඇති  බවත්.

• ජනාධිපති කොමිෂන් සභා වාර්තාවේ පළමු වෙළුමේ පිටපතක් කාදිනල්තුමාට ලබා දීම ප්‍රමාද කළ බවත් ඉතිරි වෙළුම් මම ඔහුට ලබා නොදුන් බවත්.

• පාස්කු ඉරිදා ප්‍රහාර විමර්ශනය කිරීම සඳහා පත් කරන ලද විවිධ කමිටු සහ කොමිෂන් සභා විසින් කරන ලද නිර්දේශ කිහිපයක් පමණක් තෝරා බේරා ක්‍රියාත්මක කිරීම සඳහා මා හය දෙනෙකුගෙන් යුත් කැබිනට් අනුකමිටුවක් පත් කළ බවත්.

• පාස්කු ඉරිදා ප්‍රහාර විමර්ශනය කළ Cඓඪ් නිලධාරීන් මාරු කර, විමර්ශනය කඩාකප්පල් කිරීම සඳහා එවැනි ජ්‍යෙෂ්ඨ නිලධාරියෙකු පවා සිරගත කළ බවත්.

ඊට ප්‍රතිචාර වශයෙන් රාජපක්ෂ මහතා මෙසේ පැවසීය,

 “පළමු චෝදනාව සම්බන්ධයෙන්, ජනාධිපති කොමිෂන් සභා වාර්තාව මා වෙත ඉදිරිපත් කිරීමෙන් පසු මම කාදිනල්තුමා සමඟ දුරකථනයෙන් කතා නොකළ බවත්, ජනාධිපති කොමිසමේ නිර්දේශ ක්‍රියාත්මක කළ නොහැකි බවත්, එය පුද්ගලයින් අත්අඩංගුවට ගැනීමට සහ මා සමඟ මිත්‍රශීලී සංවිධාන තහනම් කිරීමට පවා හේතු වන බව මම ඔහුට පැවසූ බවත් පැවසීම මම තරයේ ප්‍රතික්ෂේප කරමි. ජනාධිපතිවරණයේදී මුස්ලිම් ප්‍රජාව පොදුවේ මට ඡන්දය නොදුන් බව හෝ මගේ අපේක්ෂකත්වයට සහාය නොදැක්වූ බව ප්‍රසිද්ධ කරුණකි. එබැවින් පාස්කු ඉරිදා ප්‍රහාරයන්ට සම්බන්ධ වීම හේතුවෙන් තහනම් කළ යුතු කිසිදු සංවිධානයක මට සහචරයින් සිටිය නොහැක.

දෙවන චෝදනාව සම්බන්ධයෙන්, ජනාධිපති කොමිසමේ වාර්තාව 2021 පෙබරවාරි 1 වන දින මට භාර දෙන ලදී. එය මා විසින්ම අධ්‍යයනය කර නීතිපතිවරයා වෙත යොමු කිරීමෙන් පසු, එය 2021 පෙබරවාරි 23 වන දින පාර්ලිමේන්තුවේ කථානායකවරයාට භාර දෙන ලද අතර 2021 මාර්තු 1 වන දින එහි පිටපත් මහානායක හිමිවරුන්ට, කාදිනල්තුමාට සහ කතෝලික බිෂොප්වරුන්ට ලබා දී තිබුණි. වාර්තාව කාදිනල්තුමාට භාර දීමට ප්‍රමාදයක් සිදු නොවීය.

ජනාධිපති විමර්ශන කොමිසම සිය වාර්තාව ඉදිරිපත් කිරීමෙන් පසු, පාස්කු ඉරිදා ප්‍රහාර පිළිබඳ ජනාධිපති විමර්ශන කොමිසමේ සහ පාර්ලිමේන්තු තේරීම් කාරක සභාවේ වාර්තාවල නිර්දේශ ක්‍රියාත්මක කිරීමේ කාර්යය ප්‍රමුඛතාවය දීමට සහ අදාළ රජයේ දෙපාර්තමේන්තු සහ ආයතනවලට බෙදා දීමට මම හය දෙනෙකුගෙන් යුත් කැබිනට් අනුකමිටුවක් පත් කළෙමි. රජයේ දෙපාර්තමේන්තු සහ ආයතනවලට කැබිනට් මණ්ඩලයේ එවැනි උපදෙස් නොමැතිව ක්‍රියා කළ නොහැකි බව රාජ්‍ය පරිපාලනය පිළිබඳ හුරුපුරුදු අය දනිති.

2019 නොවැම්බර් මාසයේදී එවකට පොලිස්පතිවරයාගේ නිර්දේශය මත පොලිස් කොමිසම විසින් එවකට රහස් පොලිසියේ අධ්‍යක්ෂවරයා මාරු කරන ලදී. ඒ පසුගිය රජය විසින් 19 වන සංශෝධනය යටතේ පත් කරන ලද පොලිස් කොමිසම විසිනි. සති කිහිපයකට පසු, මෙම නිලධාරියා එවකට නියෝජ්‍ය අමාත්‍ය රන්ජන් රාමනායක සමඟ පැවති මහාධිකරණ නඩුවකදී විනිසුරුවරුන්ට බලපෑම් කිරීම සම්බන්ධයෙන් ඔහු කළ දුරකථන සංවාදවල කාන්දු වූ පටිගත කිරීම් පිළිබඳ විමර්ශනයක් සම්බන්ධයෙන් පොලිස් කොමිසම විසින් ඔහුගේ වැඩ තහනම් කරන ලදී. මාස කිහිපයකට පසු, හිටපු පොලිස් නියෝජ්‍ය පොලිස්පතිවරයෙකු සම්බන්ධයෙන් අපරාධ නඩුවක සාක්ෂි ගොතන ලද බවට චෝදනා එල්ල වන විමර්ශනයක් සම්බන්ධයෙන් අධිකරණය විසින් ඔහු රිමාන්ඩ් කරන ලදී. එබැවින්, පාස්කු ඉරිදා විමර්ශනය කඩාකප්පල් කිරීම සඳහා මම අපරාධ පරීක්ෂ්නණ දෙපාර්තමේන්තුවේ අධ්‍යක්ෂවරයා මාරු කර රිමාන්ඩ් භාරයේ තැබූ බවට එල්ල වන චෝදනාව මම ප්‍රතික්ෂේප කරමි.

මෙම විශේෂිත අපරාධ පරීක්ෂ්නණ දෙපාර්තමේන්තුවේ අධ්‍යක්ෂවරයා 2017 දී එම කාර්යාලයට පත් කර ඇති අතර පාස්කු ඉරිදා ප්‍රහාරයෙන් පසුව ඔහු මාස ​​හතකට වැඩි කාලයක් එම තනතුර දැරීය. පාස්කු ඉරිදා ප්‍රහාරයට පෙර මාසවලදී, වවුනතිව් ඝාතන, මාවනැල්ල බුදු පිළිම විනාශ කිරීම සහ වනාතවිල්ලුවේ පුපුරණ ද්‍රව්‍ය සොයා ගැනීම සම්බන්ධයෙන් පාස්කු ඉරිදා ප්‍රහාර සිදු කළ පුද්ගලයින් සහ කණ්ඩායම්ම සම්බන්ධ විමර්ශනය කළේ අපරාධ පරීක්ෂණ දෙපාර්තමේන්තුව ය. නීතිය ක්‍රියාත්මක කරන බලධාරීන් වඩාත් සුපරීක්ෂාකාරී වූයේ නම්, සහරාන් සහ ඔහුගේ කණ්ඩායම පාස්කු ඉරිදා ප්‍රහාර සිදුවීමට පෙර අත්අඩංගුවට ගත හැකිව තිබූ බව ජනාධිපති කොමිසම නිරීක්ෂණය කර ඇත. ප්‍රහාරය වැළැක්වීමට අපොහොසත් වීම එම අධ්‍යක්ෂවරයා යටතේ ඇති පරාධ පරික්ෂණ දෙපාර්තමේන්තුවෙඔ අසාර්ථකත්වයකි.

ඉහත සඳහන් කළ කතාවේදී, පාස්කු ඉරිදා බෝම්බ ප්‍රහාරයේ වැරදිකරුවන් නීතිය හමුවට පමුණුවා නොමැති බවට කාදිනල්තුමා මට චෝදනා කළේය. කෙසේ වෙතත්, අපරාධකරුවන් නීතිය හමුවට පමුණුවා ගත යුත්තේ දේශපාලනඥයින් විසින් නොව, පොලිසිය, නීතිපති දෙපාර්තමේන්තුව සහ අධිකරණ පද්ධතිය එක්ව කටයුතු කිරීමෙනි. එම ක්‍රියාවලිය දැන් සිදුවෙමින් පවතින අතර මාධ්‍යවලට අනුව, එම මරාගෙන මැරෙන බෝම්බ ප්‍රහාරවලට අදාළ වැරදි සම්බන්ධයෙන් පුද්ගලයින් 93 දෙනෙකු දැන් අධිකරණයේ නීතිමය ක්‍රියාමාර්ගවලට මුහුණ දී සිටිති.

පාස්කු ඉරිදා ප්‍රහාර ඉස්ලාමීය අන්තවාදීන් පිරිසක් විසින් සිදු කරන ලද්දකි. එවකට රජයේ ඉහළම විමර්ශන අංශය වන අපරාධ පරීක්ෂණ දෙපාර්තමේන්තුව - ප්‍රහාරයට මාස කිහිපයකට පෙර, මරාගෙන මැරෙන බෝම්බ ප්‍රහාර සිදු කළ පුද්ගලයින්ගේ සහ කණ්ඩායම්වල ක්‍රියාකාරකම් පිළිබඳව විමර්ශනය කළ නමුත් ත්‍රස්තවාදීන් ප්‍රහාරයට පෙර අත්අඩංගුවට ගැනීමට අපොහොසත් විය. අති උතුම් මැල්කම් කාදිනල් රංජිත් හිමිපාණන් ඉහත සඳහන් කළ පාර්ශව දෙකෙහි වගකීම නොසලකා හරින බව හෝ පැහැදිලිවම නිදහස් කරන බව, පාස්කු ඉරිදා මරාගෙන මැරෙන බෝම්බ ප්‍රහාර සම්බන්ධයෙන් මට නිරන්තරයෙන් පහර දීම සහ විවේචනය කිරීම දිගටම කරගෙන යන බව මහජනතාව හොඳින් සැලකිල්ලට ගත යුතුය."

Gota fires back at Cardinal, rebuts allegations