ශ්‍රී ලංකාවේ ශ්‍රම බළකාය ශීඝ්‍රයෙන් පහළට...ආර්ථිකයටත් දැඩි බලපෑම් - මහාචාර්ය වසන්ත අතුකෝරල

Apr 17, 2025 at 11:58 AM

|

Lanka Leader

මෙරට ශ්‍රමබළකාය ශීඝ්‍රයෙන් පහළ යෑමේ අවදානමක් මතුව ඇතැයි පේරාදෙණිය විශ්වවිද්‍යාලයේ ආර්ථික විද්‍යා හා සංඛ්‍යාත අධ්‍යයන අංශයේ මහාචාර්ය, වසන්ත අතුකෝරල මහතා සඳහන් කරයි.

මෙම තත්ත්වය මෙරට ආර්ථිකයට ද විශාල බලපෑමක් එල්ල කරනු ඇතැයි ද සඳහන් කරන මහාචාර්යවරයා, මීට අමතරව මෙරට ජනගහන වර්ධන වේගය ද තරමක අඩුවක් පෙන්නුම් කර ඇති බව ජන හා සංඛ්‍යා ලේඛන දෙපාර්තමේන්තුව සිදු කළ සංගණනයේදී හෙළිව ඇතැයි ද පවසයි.

2024 වසරේදී සිදු කළ ජන හා නිවාස සංගණනයට අනුව මෙරට ජනගනය දෙකෝටි දාහත් ලක්ෂ හැට තුන්දාස් එකසිය හැත්තෑවක් වුවත් පළාත් වශයෙන් සැලකීමේදී ජන ඝනත්වයේ ද විෂමතාවන් දැකගත හැකිව ඇතැයි මහාචාර්යවරයා පෙන්වා දෙයි.

ශ්‍රම බළකාය අඩුවීම, ජනගහන වර්ධන වේගය අඩුවීම හේතුවෙන් ආර්ථිකමය බර වැඩිවිය හැකි බවත් වැඩිහිටි ජනගහනය වැඩිවීම හේතුවෙන් සෞඛ්‍ය වියදම් ඉහළ යෑමත්, නාගරික තදබදය වැඩිවීම, සාමාජීය ප්‍රශ්න ඉහළ යෑමට බලපෑ හැකි බවද මහාචාර්යවරයා පවසයි.

ජන සංගණනයක් වසර දහයකට වරක් සිදු කළත්, මෙවර එය යම් ආකාරයක ප්‍රමාදයක් පෙන්නුම් කළ බවත්, සඳහන් කළ මහාචාර්යවරයා 2012 කළ සංගණනයට සාපේක්ෂව සලකා බැලීමේදී ලක්ෂ 14ක පමණ ජනගහනය වැඩිවීමක් පෙන්නුම් කළත් ජනගහන වර්ධනය පිළිබඳව සලකා බැලීමේදී එහි පහළ යෑමක් පෙන්නුම් කර ඇති බවත් එය සීයට දශම 05ක පමණ වර්ධනයක් මේ වන විට පෙන්වා දී ඇතැයි ද මහාචාර්යවරයා පවසයි.

එය 2012 දී සියයට දශම 07ක ප්‍රමාණයක පැවැති බවද පවසන මහාචාර්යවරයා මෙම සංගණනය තුළදී මෙරට ජනගහනය ක්‍රම ක්‍රමයෙන් පහත අගයක් ගන්නා බව පෙන්වා ඇතැයි ද කියා සිටී.

ඇතැම් ප්‍රදේශවල ජනගහනය සංකේන්ද්‍රනය වීමේ ස්වරූපයක් පෙන්නුම් කරන බවත් විශේෂයෙන් බස්නාහිර පළාතේ බිලියන 6 කට ආසන්න ජනගහනයක් පෙන්නුම් කරන බවත් මධ්‍යම පළාතේ මිලියන 2.7ක්, දකුණු පළාතේ මිලියන 2.6ක් වශයෙන් විවිධ පළාත්වල ජන ගණත්වයේ විශාල විෂමතාවක් පෙන්නුම් කරනු ලබන බව ද සංගණනය මගින් පෙන්වා දී ඇති බව සඳහන් කරන මහාචාර්ය වසන්ත අතුකෝරල මහතා, තමන්ට ජීවත් වීමට හිසට වහලක් නොමැති පුද්ගලයන් දෙදහස් දෙසිය අසූඑකක් සිටින බවද වැඩිදුරටත් සඳහන් කර සිටී.

- දිවයින-