ඉන්දු ලංකා ගිවිසුමෙන් උපන් 13 වැනි සංශෝධන මර උගුලේ සුලමුල මෙන්න..(වීඩියෝ)

Apr 4, 2025 at 08:40 PM

|

Lanka Leader

13 වැනි ආණ්ඩුක්‍රම ව්‍යවස්ථා සංශෝධනය කරළියට පැමිණෙන්නේ 1987 වසරේ වුවද 13 වැනි සංශෝධනයට මුලපුරණ සිදුවීම් මාලාව ආරම්භ වූයේ 1983 වසරේ දී බව ප්‍රවීන මාධ්‍යවේදී ධර්ම ශ්‍රී කාරියවසම් මහතා පවසයි.

1977 දී අතිවිශාල ජනවරමකින් බලයට පත්වූ ජෙ.ආර් ජයවර්ධන 1983 වන විට ජනයා අතර ඉතා අප්‍රසාදයට ලක්වූ රාජ්‍ය නායකයකු බවට පත්වී සිටි බවත්, ඔහු ලංකාවේ පළමුවැනි විධායක ජනාධිපති බවට පත්වූයේ ජනාධිපතිවරණයකින් හෝ මහමැතිවරණයකින් හෝ ජනවරමකින් හෝ නොවන බවත් ධර්ම ශ්‍රී කාරියවසම් මහතා පවසයි.

ජේ.ආර්. ජයවර්ධන විසින් සකස්කරගත් අලුත් ආණ්ඩුක්‍රම ව්‍යවස්ථාව මගින් ඔහුම විධායක ජනාධිපති ලෙස කිරුළු පැළඳූ බවද පවසන ඒ මහතා, 1982 වසරේ ඉතාම දූෂිත ජනාධිපතිවරණයක් පවත්වා නැවත වතාවක් ජේ.ආර්. ජයවර්ධන බලයට පත්වූ බවද සඳහන් කරයි.

එම කාලසීමාවේදී ජනාධිපතිවරයාගේ ජනප්‍රියත්වය ඉතා පහළ බැස තිබූ බවත් 1983 දී පැවැත්වීමට නියමිතව තිබූ මහ මැතිවරණයෙන් ආණ්ඩුව පරාජයට පත්වන බවට කිසිඳු සැකයක් නොතිබූ බවත්, මේ නිසා ජේ.ආර්. ජයවර්ධන ඉතා සටකපට ලෙස ඊළඟ අවුරුද්දේ පැවැත්වීමට නියමිතව තිබූ මහ මැතිවරණය වෙනුවට ඊට පෙර අවුරුද්දේ ජනමත විචාරණයක් පැවත්වූ බවත්, එය ලංකාවේ ඉතා දූෂිතම මැතිවරණය වූ බවත් ඒ මහතා පවසයි.

මෙම මැතිවරණයට එරෙහිව ජනතා විමුක්ති පෙරමුණේ නිර්මාතෘ රෝහණ විජේවීර මහතා අදිකරණයට ගිය බවත්, මෙම නඩුවෙන් ආණ්ඩුව පරාජය වන ලකුණු පෙනෙමින් තිබියදී 1983 කළු ජූලිය කරලියට පැමිණි බවත් ඒ මහතා සඳහන් කරයි.

කළු ජූලිය ආරම් කිරීම පිටුපස ඇති ජේ.ආර්. ජයවර්ධනගේ භූමිකාව සහ කළු ජූලිය නිසා සරණාගත තත්ත්වයට ඇද වැටුණු ලංකාවේ දමිළ ජනයා දඩමීමා කරගනිමින් ඉන්දියාව මෙයට මැදිහත් වූ ආකාර සම්බන්ධවෙන් ද ධර්ම ශ්‍රී කාරියවසම් මහතා මෙහිදී දීර්ඝ වශයෙන් කරුණු පැහැදිලි කරයි.

සවිස්තරාත්මක වීඩියෝව නරඹන්න...