මෝදීගේ සංචාරයේදී අත්සන් තැබෙන ආරක්ෂා සහයෝගිතා ගිවිසුම ගැන ඉන්දීය මාධ්‍යවලින් අනාවරණයක්

Mar 29, 2025 at 02:22 PM

|

Lanka Leader

ඉන්දීය අග්‍රාමාත්‍ය නරේන්ද්‍ර මෝදිගේ ශ්‍රී ලංකා සංචාරයේදී අත්සන් තැබීමට නියමිත ආරක්ෂක සහයෝගීතා ගිවිසුම සම්බන්ධයෙන් ඉන්දීය මාධ්‍ය රැසක කරුණු අනාවරණය කර තිබුණා. 1987 දී අත්සන් කෙරුණු ඉන්දු - ලංකා ගිවිසුමෙන් පසුව අත්සන් කෙරෙන වැදගත් ගිවිසුම මෙය ලෙසටයි ඉන්දීය මාධ්‍ය වාර්තාවල දැක්වුණේ.  හින්දුස්ථාන් ටයිම්ස්, පී ටී අයි, ඉන්දියන් එක්ස්ප්‍රස්, බ්ලූම්බර්ග් වැනි මාධ්‍ය වාර්තාවල ඉන්දීය අග්‍රාමාත්‍යවරයාගේ ශ්‍රී ලංකා සංචාරය සම්බන්ධයෙන් වැඩි අවධානයක් යොමු කර තිබුණා.

දෙරට අතර අත්සන් කිරීමට නියමිත ගිවිසුම මගින් සියුම් ආරක්ෂක තොරතුරු මෙන්ම, ඉන්දියානු සාගර කලාපයේ ආරක්ෂාව ඉහළ නැංවෙනු බවයි එහි සදහන් වුණේ.

මෙරටට පැමිණෙන ඉන්දීය අග්‍රාමාත්‍යවරයා අප්‍රේල් 05 වනදා ජනාධිපති අනුර කුමාර දිසානායක හමුවීමට නියමිත අතර එහිදී මෙරට ණය ප්‍රතිව්‍යුහගත කිරීමේ ගිවිසුම ඇතුලු ගිවිසුම් කිහිපයක් සම්බන්ධයෙන් ද සාකච්ඡා කරනු ඇති.

ඉන්දියාව, ශ්‍රී ලංකාව සහ එක්සත් අරාබි එමීර් රාජ්‍ය එක්ව ත්‍රිකුණාමලය තෙල් ටැංකි සංවර්ධනය කිරීමේ ව්‍යාපෘතිය සම්බන්ධයෙන් ද මෙහිදී අවධානයට ලක්වනවා.

එමෙන්ම, මෙම සංචාරය අතරතුරදී සාම්පූර් බලාගාරයේ වැඩ කටයුතු ද ආරම්භ කෙරෙනු ඇති.

මීට අමතරව භෞතික, ඩිජිටල් සහ බලශක්ති ක්ෂේත්‍රවල සහයෝගීතාව තවදුරටත් ඉහළ නැංවෙනු ඇති බවයි ඉන්දීය මාධ්‍ය සදහන් කළේ.

ඉන්දීය අග්‍රාමාත්‍යවරයා අවසන් වරට මෙරටට පැමිණ තිබුණේ, 2019 වසරේදීයි.

එමෙන්ම, ශ්‍රී ලංකාව ආර්ථීක අර්බුදයකට ලක්වූ සමයේ ඉන්දීය රජය මෙරටට ඩොලර් බිලියන 4 දශම 05ක මුදලක් මූල්‍යාධාර වශයෙන්ද ලබා දී තිබුණා.