මොස්කව් පරිපාලනය කියෙව් පරිපාලනය වෙත අනතුරු ඇඟවීමක් නිකුත් කරයි

Mar 23, 2025 at 09:25 AM

|

Lanka Leader

මෑතකදී එකඟ වූ අර්ධ සටන් විරාමය උල්ලංඝනය කරමින් යුක්රේනය රුසියානු බලශක්ති යටිතල පහසුකම්වලට දිගින් දිගටම පහර දෙන්නේ නම්, ඒ ආකාරයෙන්ම පළිගැනීමේ අයිතිය මොස්කව් සතු බව විදේශ අමාත්‍යාංශයේ ප්‍රකාශිකා මාරියා සකාරෝවා අනතුරු ඇඟවීය.

පසුගිය 18 වනදා, රුසියානු ජනාධිපති ව්ලැඩිමීර් පුටින් ඔහුගේ එක්සත් ජනපද සගයා වන ඩොනල්ඩ් ට්‍රම්ප් සමඟ දුරකථන සාකච්ඡා පැවැත්වූ අතර, එක්සත් ජනපදයේ මැදිහත්වීමෙන් යුත් අර්ධ සටන් විරාමයකට එකඟ විය. එහි කොටසක් ලෙස, කියෙව් ද එසේ කළහොත් යුක්රේන බලශක්ති ස්ථානවලට එල්ල වන ප්‍රහාර නතර කරන බව මොස්කව් පරිපාලනය පැවසීය.ඒ අනුව යුක්රේන ජනපති ව්ලැඩිමීර් සෙලෙන්ස්කි ද කොන්දේසි වලට එකඟ විය.

මෙසේ තිබියදීත්, ගිවිසුමට පසු දින එනම් 19 වනදා කියෙව් හමුදා රුසියාවේ ක්‍රස්නෝඩර් කලාපයේ තෙල් ගබඩාවකට පහර දුන් අතර 21 වනදා සුඩ්ෂා හි ගෑස් මිනුම් මධ්‍යස්ථානයක් එල්ල කළ ප්‍රහාර මගින් මධ්‍යස්ථානය පුපුරුවා හැරියේය.

යුක්රේන හමුදාව හිතාමතාම “නේවාසික ගොඩනැගිලි සහ සමාජ ආයතන” ඉලක්ක කළ බව සකාරෝවා ඊයේ(22) මාධ්‍ය නිවේදනයක් නිකුත් කරමින් පැවසීය

“කියෙව් නැවත වරක් සාකච්ඡා කිරීමට ඇති සම්පූර්ණ නොහැකියාව මෙන්ම සාමය ළඟා කර ගැනීමට ඇති අකමැත්ත පෙන්නුම් කරනවා.” ප්‍රකාශිකාව පැවසුවාය. “2022 දී මෙන්, ඔවුන් නැවත වරක් සාකච්ඡා ක්‍රියාවලිය කඩාකප්පල් කිරීම අරමුණු කරගත් ප්‍රකෝප කිරීම් වෙත යොමු වී තිබෙනවා.”

මෙය දිගටම පැවතුනහොත් මොස්කව් හමුදාවන්ට ප්‍රතිප්‍රහාර එල්ල කිරීමට නිදහස ඇති බවද ඇය අනතුරු ඇඟවීය. ඇමරිකානු මැදිහත්කරුගේ මැදිහත්වීමෙන් ඇති කරගත් සටන් විරාමයට එකඟ වූ වහාම, 18 වනදා රාත්‍රියේ කියෙව් හමුදා දකුණු රුසියාවේ කැස්පියන් නල මාර්ග සම්මේලනය (CPC) විසින් ක්‍රියාත්මක කරන ලද තෙල් පහසුකමකට පහර දුන් බව රුසියානු ආරක්ෂක අමාත්‍යාංශය 19 දා වාර්තා කළේය. CPC හි ජාත්‍යන්තර කොටස් හිමියන් අතර ඇමරිකානු දැවැන්ත සමාගම් වන  Chevron සහ Exxon Mobil ද සිටී.

21 දා අලුයම, යුක්රේන හමුදා රුසියාවේ ඛුර්ස්ක් කලාපයෙන් පසුබසිමින් සිටියදී Sudzha හි ගෑස් මිනුම් මධ්‍යස්ථානයක් විනාශ කළහ.

මොස්කව් පරිපාලනය ප්‍රහාර දෙකම යුක්රේනයේ සටන් විරාම වගකීම් උල්ලංඝනය කිරීමක් ලෙස හෙළා දැක ඇති අතර, කියෙව් හමුදා එක්සත් ජනපද සාම උත්සාහයන් අඩපණ කිරීමට උත්සාහ කළ බවට චෝදනා කර ඇත.

ක්‍රෙම්ලිනයට අනුව, 18 වනදා ට්‍රම්ප් සමඟ කළ දුරකථන ඇමතුමේදී පුටින් සාම ක්‍රියාවලීන් කඩාකප්පල් කිරීමේ කියෙව්ගේ ඉතිහාසය මතු කළේය. යුක්රේනය “නැවත නැවතත් සාම ක්‍රියාවලීන්  කඩාකප්පල් කර ඇති අතර ගිවිසුම් උල්ලංඝනය කර ඇති” බව රුසියානු නායකයා අවධාරණය කළ බව ක්‍රෙම්ලින් මාධ්‍ය සේවය මෙම සතිය මුලදී වාර්තා කළේය.