ඉන්දීය රුපියල් සහ ශ්‍රී ලංකා රුපියල් භාවිතය ඉහළ නැංවීමට විද්වත් සාකච්ඡාවක්

Feb 28, 2025 at 08:11 AM

|

Lanka Leader

ඉන්දීය රුපියල් – ශ්‍රී ලංකා රුපියල් වෙළෙඳ පියවීම් ද්විපාර්ශ්වික ආර්ථික සබඳතා ශක්තිමත් කිරීම යන මැයෙන් වූ විද්වත් සාකච්ඡාවක් ඉකුත් 25 දා කොළඹ දී සංවිධානය කර තිබිණ.

ශ්‍රී ලංකා රජය, ශ්‍රී ලංකා සහ ඉන්දීය බැංකු මෙන්ම විවිධ වෙළෙඳ මණ්ඩල, මාධ්‍ය සහ විද්වත් සංවිධාන වැනි ආයතන නියෝජනය කරමින් ප්‍රධාන පාර්ශ්වකරුවන් රැසක් මේ සඳහා සහභාගී වූහ. ශ්‍රී ලංකාවේ ඉන්දීය මහ කොමසාරිස් සන්තෝෂ් ජා මහතා සහ ශ්‍රී ලංකා මහ බැංකු අධිපති ආචාර්ය පී. නන්දලාල් වීරසිංහ මහතාද මෙම අවස්ථාවට එක් වූහ.

ඉන්දීය මහ කොමසාරිස් සන්තෝෂ් ජා මහතා පිළිගැනීමේ කතාව සිදු කරමින් අදහස් දැක්වූ අතර ඉන් අනතුරුව ඉන්දීය සංචිත බැංකුවේ ප්‍රධාන සාමාන්‍යාධිකාරී ආදිත්‍ය ගයිහා මහතා විසින් ඉන්දීය රුපියල ජාත්‍යන්තරකරණය සහ ඉන්දීය රුපියල් – ශ්‍රී ලංකා වෙළෙඳ පියවීම් පිළිබඳ සවිස්තරාත්මක ඉදිරිපත් කිරීමක් සිදු කරන ලදී. එතුමා අන්තර් දේශසීමා ගනුදෙනුවලදී ඉන්දීය රුපියල් සහ ශ්‍රී ලංකා රුපියල් භාවිතා කිරීම ඉහළ නැංවීම අරමුණු කරගෙන ඉන්දීය සංචිත බැංකුව විසින් මෑතක දී විදේශ විනිමය කළමනාකරණ පනතට සිදු කරන ලද සංශෝධන සම්බන්ධයෙන් ද විස්තර කළේය.

ශ්‍රී ලංකා මහ බැංකු අධිපති ආචාර්ය පී. නන්දලාල් වීරසිංහ මහතා ඉන්දීය රුපියල් – ශ්‍රී ලංකා රුපියල් වෙළෙඳ පියවීම් රාමුව සම්බන්ධයෙන් වැදගත් කරුණු රැසක් ඉදිරිපත් කළේය. මෙම යාන්ත්‍රණයේ වැදගත්කම අවධාරණය කළ එතුමා යාන්ත්‍රණය සංවිධිතකරණයෙහිලා දෙරටෙහිම ප්‍රතිපත්ති සම්පාදකයන් සහ මහ බැංකුව සමඟ නියැළෙන ලෙස බැංකු දිරිමත් කළේය.