පරීක්ෂාවකින් තොරව බහාලුම් 373ක් වරායෙන් නිදහස් කර තිබෙන බව සත්‍යයක්! ඒවායේ යම් නීති විරෝධී දෙයක් තිබුණොත් ආණ්ඩුව වගකීම භාර ගන්නවා- වරාය හා සිවිල් ගුවන් සේවා නියෝජ්‍ය ඇමති ජනිත කොඩිතුවක්කු

Jan 23, 2025 at 09:07 PM

|

Lanka Leader

වරාය හා සිවිල් ගුවන් සේවා නියෝජ්‍ය ඇමති ජනිත කොඩිතුවක්කු මහතා පවසන්නේ රේගු පරීක්ෂාවකින් තොරව වරායෙන් පිටතට යැවූ බහාළුම්වල යම් කිසි නීති විරෝධී ද්‍රව්‍යයක් රට තුළට ගෙනවිත් තිබුණහොත් එහි වගකීම රජය බාරගන්නා බවයි. 

පරීක්ෂාවෙන් තොරව බහාලුම් 373 ක් වරායෙන් පිටතට යවා ඇති බවට එල්ල වන චෝදනා පිළිබඳව ප්‍රතිචාර දක්වමින් ඔහු මෙලෙස පැවසීය.

“අපේ වරායට දිනකට එන බහාලුම් වලින් 80% ක් පමණ නැවත ප්‍රතිඅපනයනය කරනවා. මේ වන විට ආනයනය වන බහාලුම් දෙදහසක් පමණ මේ වනවිට දිනකට ලැබෙමින් පවතිනවා. මෙලෙස තදභදයක් ඇති වීමට හේතුව වරාය වර්තමානයට ගැලපෙන පරිදි සංවර්ධනය කර නොතිබීමයි. වරායේ තිබූ තදබදය ඉවත් කිරීම සඳහා "ග්‍රීන් චැනල්"  ඔස්සේ පරීක්ෂාවකින් තොරව බහාලුම් 373 ක් පිටතට යවා තිබෙන බව සත්‍යයක්.එලෙස පරීක්ෂාවකින් තොරව බහාලුම් පිටකිරීම් සම්බන්ධයෙන් අපරාධ පරීක්‍ෂණ දෙපාර්තමේන්තුවට මේ වනවිට පැමිණිල්ලක් පවා යොමු වී තියෙනවා. ඒ වගේම අභ්‍යන්තර පරීක්ෂණයක් ද සිදු කෙරෙනවා." යනුවෙන් පැවසීය.

එහිදි වැඩිදුරටත් කරුණු දක්වමින් මෙරටට පැමිණි නැව් 27 ක ප්‍රමාණයක් නැවත හැරී ගොස් තිබෙන බවට අමාත්‍යවරයා දැනුවත් කළේ නැව් ඒජන්තවරු විසින් බව පැවසීය.

" නැව් ශ්‍රී ලංකාවේ මුහුදු සීමාවට පැමිණි පසු වුවද නැවත ආපසු හැරී යන්නත් පුළුවන්. ඔවුන්ගේ ඊළඟ වරායට ළඟා වෙන්න තියෙන වෙලාව අනුව අපේ රටේ තියෙන තදබදය නිසාත් නැවක් ආපසු හැරිලා යන්න පුළුවන්. ඒ පිළිබඳව දත්ත තියෙන්නේ නැව් නියෝජිතයන් ගාව පමණයි. ඒ අනුව අපිට එයාලව විශ්වාස කරන්න වෙනවා.නැව් වරාය ඇතුලට ඇවිල්ල හැරිලා ගියාද පිටතින් හැරිලා ගියාද කියන ප්‍රශ්නය තමයි තියෙන්නේ. ඇත්තටම අපේ වරාය දැන් කාර්යබහුලයි. ඒකත් රේගුවේ ප්‍රශ්නේ වගේ තමා. 2024 ඉවර වෙන්න තිබුන නැගෙනහිර ජැටිය අපි එනකොට තිබුනේ 2027 ඉවර කරන්නයි. මේ අවුරුද්දේම ඉවර කරගන්න අපි දැන් උත්සාහ කරනවා.” අමාත්‍යවරයා අවධාරණය කළේය.