පරිපාලන ක්රියාවලියට බරපතළ දේශපාලන බලපෑම්...GMOA දැඩි ක්රි්යාමාර්ගයකට සැරසෙයි
සෞඛ්ය අමාත්යාංශයේ පරිපාලන ක්රියාවලියට බරපතළ දේශපාලන බලපෑම් සිදුවෙමින් පවතින බව රජයේ වෛද්ය නිලධාරීන්ගේ සංගමය සඳහන් කරයි.
මෙම තත්ත්වය වහා නිවැරදි කිරීමට සෞඛ්ය අමාත්යවරයා කටයුතු නොකළහොත් දැඩි වෘත්තිය ක්රියා මාර්ගවලට එළඹීමට සූදානම් බව එම සංගමයේ ලේකම් වෛද්ය ප්රභාත් සුගතදාස මහතා විසින් නිවේදනයක් නිකුත් කරමින් කියා සිටී.
අදාළ සම්පූර්ණ මාධ්ය නිවේදනය මෙසේය.
මාධ්ය නිවේදනය
මෙරට වෛද්යවරුන්ගේ ස්ථාන මාරු ක්රියාවලිය කෙරෙහි එල්ල වන අනවශ්ය බාහිර බලපෑම් හේතුවෙන් උද්ගත වී ඇති අර්බුදකාරී තත්ත්වය.
ශ්රී ලාංකේය වෛද්ය සේවාව දීප ව්යාප්ත සේවාවකි. රට පුරා සෞඛ්ය සේවාවන් ඉහළ ගුණාත්මකභාවයෙන් සහ සමානාත්මතාවයෙන් යුතුව අඛණ්ඩව ලබාදීමට නම් රට පුරා සියලු රෝහල් සහ ප්රදේශ ආවරණය කරමින් වෛද්යවරුන් ස්ථානගත වීම අනිවාර්ය වේ.
මේ වෙනුවෙන් විශේෂඥ වෛද්යවරුන්, පරිපාලන ශ්රේණියේ වෛද්යවරුන් සහ ශ්රේණි වෛද්යවරුන් යන සියලු කාණ්ඩ වල වෛද්යවරුන්ගේ ස්ථාන මාරු ක්රියාවලිය වඩාත් කාර්යක්ෂමව, විධිමත්ව සහ පාරදෘශ්ය ලෙස සිදු කිරීම අත්යාවශ්ය වේ.
වෛද්යවරුන්ගේ ස්ථාන මාරු ක්රියාවලිය නියාමනය වනුයේ ආයතන සංග්රහය, රාජ්ය සේවා කොමිෂන් සභාවේ කාර්ය පටිපාටිගත රීති සහ සෞඛ්ය අමාත්යාංශය මගින් නිකුත් කරන ලද චක්රලේඛ ඔස්සේය. ස්ථාන මාරුවීම් ක්රියාවලිය වඩා පාරදෘශ්ය සහ විනිවිදභාවයෙන් යුතුව දේශපාලන හෝ කිසිදු බාහිර බලපෑමකින් තොරව පවත්වාගෙන යාම සඳහා ආයතන සංග්රහයේ ප්රතිපාදන මත ක්රියාත්මක වන වෛද්ය ස්ථාන මාරු මණ්ඩල ද කේන්ද්රීය කාර්යභාරයක් ඉටු කරයි.
එහෙත් මෑත කාලීනව වෛද්ය ස්ථාන මාරු ක්රියාවලියට අනීතික අයුරින් විවිධ පාර්ශව හරහා අනව්යශ බලපෑම් කිරීමේ සහ අත පෙවීමේ අහිතකර ප්රවණතාවයක් ගොඩනැගෙමින් පවතින බව නිරීක්ෂණය වී ඇත.
පවතින නීත්යානුකූල ක්රමවේදය උල්ලංඝනය කරමින් ක්රියාකිරීමට සෞඛ්ය අමාත්යංශයේ ඇතැම් නිලධාරීන් දරන උත්සාහයන් හේතුවෙන් ශ්රේණි වෛද්යවරුන්ගේ 2025 වර්ෂයේ වාර්ෂික ස්ථාන මාරු ලැයිස්තුව ප්රකාශයට පත් කිරීම මේ වන විට මාස ගණනාවක් ප්රමාද වී ඇත. එයින් අසාධාරණයට ලක් ව ඇති වෛද්යවරුන් සංඛ්යාව 5000 කට අධිකය.
වෛද්යවරුන්ගේ තාවකාලික අනුයුක්ත කිරීම් සිදුකිරීමේදී ඒවා ස්ථාන මාරු මණ්ඩලයේ අනුමැතියට යටත්ව සිදු කල යුතු අතර එමගින් ක්රියාවලියේ සාධාරණත්වය, පාරදෘශ්යභාවය සහ නිරවද්යතාවය තහවුරු කිරීමට හැකිවී ඇත.
එක්වරම තාවකාලික අනුයුක්ත ලබාදීමේ ක්රියාවලියෙන් වෛද්ය ස්ථාන මාරු මණ්ඩලය අනීතික සහ අත්තනෝමතික ලෙස ඉවත් කිරීමට සෞඛ්ය අමාත්යංශය විසින් කටයුතු කර ඇති අතර එහි අරමුණ වනුයේ ස්ථාන මාරු ක්රියාවලියේ පාරදෘශ්යභාවය සහ සාධාරණත්වය උල්ලංඝනය කර දේශපාලන උවමනාවන්ට ප්රමුඛතාවය ලබාදීම ද යන්න බරපතළ සැකයක් මතු වී ඇත.
මේ අතර විශේෂඥ වෛද්යවරුන්ගේ ස්ථාන මාරු ක්රියාවලියට ද පෙර නොවූ විරූ අන්දමේ අනවශ්ය අත පෙවීම් සිදුවෙමින් පවතින බව මෑත කාලීන සිදුවීම් හරහා නිරීක්ෂණය වී ඇත.
මෙහි ආසන්නතම සහ ප්රශ්නකාරීම සිදුවීම වනුයේ, ශ්රී ජයවර්ධනපුර මහා රෝහලේ නව සභාපතිවරයාට සියලු පිළිගත් ක්රමවේද සහ නීතිමය ප්රතිපාදන බරපතල ලෙස උල්ලංඝනය කරමින් කාසල් වීදියේ කාන්තා රෝහල වෙත තවත් අමතර පත්වීමක් ලබා දීමයි.
විශේෂඥ වෛද්යවරුන්ගේ ස්ථාන මාරු මණ්ඩලයට සම්පූර්ණයෙන් පරිබාහිරව එවන් පත් වීමක් ලබා දී එය අනීතික ලෙස රාජ්ය සේවා කොමිෂන් සභාවේ අනුමැතියටද යොමු කිරීමේ තීරණය පිටුපස සිටින්නේ කවුරුන්ද යන්න ගැටලුවකි. මෙම පත්වීම සම්බන්ධයෙන් රජයේ වෛද්ය නිලධාරීන්ගේ සංගමය සහ විශේෂඥ වෛද්යවරුන්ගේ සංගමය ද දැඩි අප්රසාදය සහ විරෝධතාවය දක්වා ඇති පසුබිමක, එය නිවැරදි කිරීමට සෞඛ්ය අමාත්යාංශය පාර්ශවයෙන් මෙතෙක් කිසිදු පියවරක් නොගැනීම හරහා ගම්ය වනුයේ නීතිමය ක්රියාවලින් උල්ලංඝනය කරමින්, දේශපාලන න්යාය පත්ර සපුරාලමින් කටයුතු කිරීමේ පරිසරයක් නැවත වරක් සෞඛ්ය අමාත්යාංශය තුළ නිර්මාණය වෙමින් පවතින බවයි.
ඊටත් වඩා බරපතල කරුණ වනුයේ, තෝරාගත් විශේෂඥ වෛද්යවරුන්ගේ ස්ථානගත කිරීම් වෙනස් කරන ලෙස නියෝග ලබා දෙමින් සෞඛ්ය අමාත්යවරයාගේ කාර්යාලයෙන්, සෞඛ්ය අමාත්ය කාර්යාලයේ ලිපි ශීර්ෂය සහිතව අමාත්යාංශ නිලධාරීන් වෙත උපදෙස් ලබාදීමේ “නව සම්ප්රදායක්” නිර්මාණය කරමින් තිබීමයි.
පවතින නීතිමය ප්රතිපාදන සහ සම්මත ක්රමවේද උල්ලංඝනය කරන මෙම නව “සම්ප්රදායන්” පැහැදිලිවම වෛද්යවරුන්ගේ ස්ථාන මාරු ක්රියාවලිය කෙරෙහි බරපතළ ලෙස දේශපාලන බලපෑම් සිදු කිරීමක් වන අතර, වහාම මෙම තත්ත්වය නිවැරදි කිරීමට සෞඛ්ය අමාත්යවරයා පියවර නොගන්නේ නම් ඉදිරියේදී දැඩි වෘත්තීය ක්රියාමාර්ගවලට පවා එළඹීමට රජයේ වෛද්ය නිලධාරින්ගේ සංගමය පසුබට නොවනු ඇත.
සෞඛ්ය අමාත්යාංශයේ සහ රෝහල් පද්ධතියේ පරිපාලන තනතුරු ගණනාවක් පුරප්පාඩු වී ඇති අතර රාජකාරි ආවරණය කිරීම වැඩ බලන පරිපාලකයින් හරහා සිදු විමෙන් වෛද්ය පරිපාලන ශ්රේණියේ ද ගැටලු ගණනාවක් මේ වන විට උද්ගත වී ඇත. ඒ අතර සෞඛ්ය අමාත්යාංශයේ නියෝජ්ය අධ්යක්ෂ ජනරාල් තනතුරු 7 ක් පුරප්පාඩු වී තිබීමද බරපතල තත්වයකි.
නියෝජ්ය අධ්යක්ෂ ජනරාල් තනතුරු සඳහා සුදුසු ජ්යෙෂ්ඨ වෛද්ය පරිපාලකයින් තෝරා ගනු ලබන්නේ සම්මුඛ පරීක්ෂණයක් ද ඇතුළත් සම්මත බඳවා ගැනීමේ පටිපාටියකට අනුකූලවය. එහෙත් නියෝජ්ය අධ්යක්ෂ ජනරාල් ධුරයක් දැරීමට තරම් පරිචයක් නොමැති නිලධාරීන් වැඩ බැලීමේ පදනම මත එම තනතුරු වලට පත් කිරීම හරහා සෞඛ්ය අමාත්යාංශයේ තීරණ ගැනීමේ සහ ක්රියාත්මක කිරීමේ ක්රියාවලියේ ගැටලු ගණනාවක් මතුවෙමින් පවති. දේශපාලන හිතවත්කම් සහ න්යාය පත්ර මෙම පත්කිරීම් පිටුපස පවතින බව සෞඛ්ය ක්ෂේත්රය තුළ ගොඩනැගි ඇති මතයයි.
සෞඛ්ය අමාත්යාංශය සහ සෞඛ්ය ක්ෂේත්රය තුළ දේශපාලන හිතවත්කම් සහ න්යාය පත්රයන්ට ප්රමුඛතාවය ලැබීමේ තත්ත්වය තුළ, සෞඛ්ය පද්ධතියේ පසුගිය කාලය තුල ගොඩනැඟුණු සුභවාදී පරිසරයට හානි කරමින් නැවත අර්බුදයක් කරා රැගෙන යාමේ පසුබිම සකස් වෙමින් පවතී. මේ හරහා අවදානමට ලක් වනුයේ අහිංසක රෝගී ජනතාවගේ ජීවිතයි.
දේශපාලන අධිකාරියේ අභිමතයන්ට සහ පටු න්යාය පත්රයන්ට අනුකූලව තීන්දු තීරණ ගනිමින්, වෛද්ය ස්ථාන මාරුවීම් වලට පවා බලපෑම් කෙරූ සෞඛ්ය අමාත්යවරුන් ඉතිහාසයේ අප දැක ඇති අතර, අද වනවිට ඔවුන් ජනතාවගෙන් ප්රතික්ෂේපිතව නීතිය ඉදිරියේ චූදිතයින් බවට පවා පත්ව සිටීම හරහා ලබා දෙන පණිවිඩය මෙරට සියලු දේශපාලකයින් නිවැරදිව කියවා ගත යුතු බව අපගේ හැඟීමයි.
වත්මන් ජනාධිපතිවරයාට සහ රජයට ලැබුණු දැවැන්ත ජනවරමේ ප්රධාන සාධකයක් වූයේ දේශපාලන සහ පෞද්ගලික න්යාය පත්ර මත තීරණ ගැනීමේ සහ කටයුතු කිරීමේ අසාර්ථක දේශපාලන සංස්කෘතිය වෙනස් කර ප්රතිපත්ති මත රාජ්ය පාලනය කිරීමේ ක්රම වෙනසක් ඇති කිරීමයි. එම වගකීමෙන් සෞඛ්ය අමාත්යංශයට ද මිදිය නොහැක.
පසුගිය සමයේ මුහුණ දුන් අර්බුදකාරී තත්ත්වයෙන් මුදවා මෙරට නිදහස් සෞඛ්ය සේවාව පුනරුදය කරා රැගෙන යාමට නම් පටු දේශපාලන න්යාය පත්ර සහ මැදිහත්වීම් පසෙකලා, වඩා පුලුල් දැක්මක් සහිතව, ප්රතිපත්ති මත පිහිටා සියලු පාර්ශව එක් කරගනිමින් කටයුතු කිරීම අනිවාර්ය වේ.
එය මෙරට ජනතාවගේ ජීවත්වීමේ අයිතිය ආරක්ෂා කිරීම වෙනුවෙන් ගරු ජනාධිපතිතුමා, සෞඛ්ය ඇමතිතුමා ඇතුළු වගකිවයුත්තන්ගේ අත්හළ නොහැකි වගකීමකි.
ස්තූතියි.
මීට විශ්වාසී,
වෛද්ය ප්රභාත් සුගතදාස,
ලේකම්.
සම්බන්ධිත පුවත් | Related News
ප්රධාන පුවත්
ආණ්ඩුවට බැරි බෙදුම්වාදය පරාජය කිරීමේ වගකීම බාරගන්න අපි සූදානම්.. - 'රණවිරු ජනපවුර' ආණ්ඩුවට කියයි..
ඉහළ උසාවිවල විනිසුරු පුටු අටක් හිස්..
සාම ගිවිසුමක් සඳහා අමෙරිකාව සහ ඉරානය අවසන් එකඟතාවකට ආවා - පාකිස්තාන අග්රාමාත්ය ෂෙබාස් ෂරීෆ්
ගෝඨාභය රාජපක්ෂ ඇත්ත මහමොළකරු තේරුම් ගත්තා.. - වෛද්ය වසන්ත බණ්ඩාර
යුක්රේන ගැටුමේදී රුසියාව සමස්ත බටහිර කඳවුරට එරෙහිව තනිව සටන් කරනවා – පුටින්
“පාස්කු ප්රහාරය වළක්වා ගැනීමට අපොහොසත් වූ නිලධාරීන් දැන් මට එරෙහිව පරීක්ෂණ මෙහෙයවනවා”..- සලේ අභියාචනාධිකරණයට කියයි
අලුත් පාස්කු මහ මොළකරුවෙක් සොයාගත්තා නම් FBI, Interpol, Scotlandyard, AFU ආයතනවලටත් දන්වන්න.. - දිලිත් කියයි
ශ්රී ලංකාව මෙතෙක් අනුගමනය කළ මධ්යස්ථ විදේශ ප්රතිපත්තිය තවදුරටත් අනුගමනය කරනු ඇතැයි අපි විශ්වාස කරනවා- ශ්රී ලංකාවේ රුසියානු තානාපති ලෙවාන් S ධගාරියන්
ඊශ්රායලයේ ඉඳලා මෙරට ළමයි එවන ඩොලර් ටික එක ආයතනය හිරවෙලා.. - තවත් හැකර් ප්රහාරයක් ගැන ඩී.වී චානක හෙළිකරයි..
සලේගේ පෙත්සම සලකා බැලීම ජූලි 10 දක්වා කල් යයි.. සලේ වෙනුවෙන් පෙනී සිටි නීතිඥවරයා අයි.එස්.අයි.එස්. ත්රස්ත සංවිධානයේ දෘෂ්ටිවාදය මෙරට තුළ ක්රියාත්මක වූ ආකාරය ගැනත් කරුණු හෙළිකරයි..
MCC ගිවිසුම නැවතත් ශ්රී ලංකාවට ගේන්න යනවා.. – හර්ෂ ද සිල්වා
ලෝකයේ බලශක්ති අර්බුදයක් ඇති වීමට හේතුව අමෙරිකාව සහ චීනයේ බල ඝට්ටනය ද?.. - ගෝලීය බලශක්ති අර්බුදයේ ඇත්ත කතාව ආචාර්ය ජගත් චන්ද්රවංශ හෙළිකරයි..
සුරේෂ් සලේ කියන්නේ අත්අඩංගුවට ගැනීම හෝ රඳවා තබා ගැනීමට කිසිඳු සාක්ෂියක් නොමැති නිර්දෝෂී අයෙක්.. ගනේද්ර සහ ශානි ගහපු ගේම් එක මෙන්න.. - නීතිඥ සංජීව වීරවික්රම හෙළිකරයි
මහාභාණ්ඩාගාර කොල්ලයට මහබැංකුවත් වගකිව යුතුයි.. නන්දලාල්ටත් වැඩ වරදියි.. - මුදල් කාරක සභාවේ සභාපති හර්ෂ කියයි
සලේ විශේෂඥ වෛද්ය මණ්ඩලයකට යොමු කිරීමට අධිකරණයෙන් නියෝග..
සුරේෂ් සලේ වදකාගාරයක දමා මරා දැමීමට හැදූ කුමන්ත්රණය සත්යග්රහය නිසා වැළකුණා.. - වෛද්ය වසන්ත බණ්ඩාර