‘රුපියල් 6000 දීමනාව ලබා දීමේ තීරකයා විදුහල්පති’ - කැබිනට් මාධ්‍ය ප්‍රකාශක කියයි

Jan 1, 2025 at 01:44 PM

|

Lanka Leader

රුපි‍යල් 6,000ක දීමනාව ලබා දීමේදී දරුවන් තෝරාගැනීම පාසල් මට්ටමින් සිදුකරන බව ත් තම පාසලේ සිටින මෙම සහනය ලැබිය යුතු දරුවන් පිළිබඳව සොයා බලා ලේඛන සකස් කරන ලෙස පාසල්වල විදුහල්පතිවරුන්ට දැනුම් දී ඇති බව ත් කැබිනට් මාධ්‍ය ප්‍රකාශක, සෞඛ්‍ය සහ ජන මාධ්‍ය අමාත්‍ය වෛද්‍ය නලින්ද ජයතිස්ස පවසයි.

ඔහු මේ බව ප්‍රකාශ කළේ, අද (දෙසැ. 31) කැබිනට් තීරණ දැනුම් දීමේ මාධ්‍ය හමුවේදී ය.

මව හෝ පියා අහිමි දරුවන්, ළමා නිවාසවල දරුවන්, ආර්ථික අර්බුද නිසා මව්පියන්ගේ රැකියා අහිමි වූ දරුවන් වගේ ම මෙම සහනය ලැබීය යුතු යැයි විදුහල්පතිවරුන්ට හැඟෙන දරුවන්ගේ නම් ඊට ඇතුළත් කළ හැකි බව අමාත්‍යවරයා පැවසීය.

ඔහු මේ බව පැවසුවේ, පාසල් සිසුන්ට රුපියල් 6000 දීමනාව ලබා දෙන ආකාරය පිළිබඳව ජනතාවට වැටහීමක් නොමැති යැයි මාධ්‍යවේදියෙකු කළ ප්‍රශ්න කිරීමේදීය.

එහිදී ඇති වූ සංවාදය මෙසේය.

ප්‍රශ්න : පාසල් සිසුන්ට රුපියල් 6000 දීමනාව දෙන ආකාරය ගැන ජනතාවට වැඩි වැටහීමක් නෑ. නිසියාකාරව සන්නිවේදනය වෙලා නෑ?

අමාත්‍යවරයා : “ප්‍රධාන කාණ්ඩ දෙකක දරුවන්ට මේ සහනය ලැබෙනවා. දැනටමත් අස්වැසුම ප්‍රතිලාභී දරුවන් සිටිනවා. ඒක පැහැදිලියිනේ. නමුත් අස්වැසුම පවුල්වල දරුවෝ පමණක් නෙවෙයි මේ ප්‍රශ්නයට මුහුණ පා තිබෙන්නේ. ඒ නිසා තමන්ගේ පාසලේ ඉන්න සහනය ලැබිය යුතු දරුවන්ගේ ලේඛන හදන්න විදුහල්පතිවරුන්ට කිව්වා. මව හෝ පියා අහිමි දරුවන්, ළමා නිවාසවල දරුවන්, ආර්ථික අර්බුද නිසා මව්පිය රැකියා අහිමි වූ දරුවන් වගේ ම විදුහල්පතිවරුන්ට දැනෙනවා නම් මේ සහනය යම් දරුවෙකුට ලැබිය යුතුයි කියල ඊට ඔවුන්ගේ නම් ඇතුළත් කළ හැකියි.”

ප්‍රශ්න : ලබා දෙන්නේ වවුචරයක්ද? නැත්තන් ගිණුමට මුදල් ද?

අමාත්‍යවරයා : “මුදල් අමාත්‍යාංශය කියාවි. දරුවාට පොත පත ගැනීම සඳහා ම ක්‍රමවේදයක් හදන්න උත්සාහ කරනවා.”