මහින්ද ක්‍රියාකාරී දේශපාලනයෙන් ඉවත් කිරීමට ආණ්ඩුව කටයුතු කරනවා - සාගර කාරියවසම්

Dec 31, 2024 at 02:22 PM

|

Lanka Leader

හිටපු ජනාධිපති මහින්ද රාජපක්ෂ මහතාගේ ආරක්‍ෂාව අඩු කර නිවාස අඩස්සියට පත් කර ක්‍රියාකාරී දේශපාලනයෙන් ඉවත් කිරීමට ආණ්ඩුව උත්සහ කරමින් ඇතැයි  ශ්‍රී ලංකා පොදුජන පෙරමුණේ මහ ලේකම් හිටපු පාර්ලිමේන්තු මන්ත්‍රි නීතිඥ සාගර කාරියවසම් පවසයි.

ශ්‍රී  ලංකා පොදුජන පෙරමුණ පක්ෂ මූලස්ථානයේ පැවැති මාධ්‍ය සාකච්ඡාවකදී එක්වෙමින් ඔහු මෙම අදහස් පල කලේය.

මෙහිදී වැඩිදුරටත් අදහස් දක්වා සිටි හෙතම මෙසේද පැවැසුවේය

‘රට බේරගත් නායකයාට අනතුරක් වෙනවට අපි එකඟ නැහැ. ඒ නිසා අපි එතුමාව ආරක්ෂා කරනවා. ආරක්ෂාව කියන එක පුද්ගලයන්ගෙන් පුද්ගලයාට වෙනස් වෙනවා. එල්.ටි.ටි.ඊ සංවිධානය අදටත් ක්‍රියාත්මකයි. මේ රටේ පොලිසිය භාර ඇමැතිවරයා පාර්ලිමේන්තුවේදී ප්‍රකාශ කළා පහුගිය ගුණසමරුවේදී එල්.ටී.ටී.ඊ. ලක්ෂණ පළ කළා කියලා. ඒ මහා විරු සැමරුම් 10ක. මෙවැනි තත්ත්වයක් යටතේ එල්.ටී.ටී.ඊ. සංවිධානයේ අඳුරු සෙවණැලි තවමත් මේ භූමියෙන් නැතිවෙලා නැහැ.

ඒ නිසා මේ තර්ජනය තිබෙන්නේ එල්.ටී.ටී.ඊ. එක නැති කළ නායකයාට මිසක්, එල්.ටී.ටී.ඊ එකට උදව් කළ නායකයන්ට නොවේ.

පක්ෂයක් විදිහට අපි ඉතාමත් අමිහිරි අත්දැකීම්වලට මුහුණ දීපු වසරක් මේ. මේ වසරටත් වැඩිය 2022 අපිට ඉතාම අමිහිරි වසරක් වුණේ. හැබැයි 2024 වසර ලංකාව ඉතිහාසයේ රටේ ජනතාව වැඩියෙන්ම රැවටුණු වසර හැටියට ඉතිහාසගත වේවී. මේ ජනතාව මුළා කරලා බොරු කියලා ලබා ගත්ත බලයක්. මේ බලය රැකගන්න කොයි පුද්ගලයා පැමිණියත් බැහැ.

ස්වභාව ධර්මයේ නීතියක් කියලා එකක් තිබෙනවා. ස්වභාව ධර්මයේ නීතිය තුළ බොරුවට රජ කරන්න ඉඩ දෙන්නේ නැහැ. අපි දැක්කා යහපාලන ආණ්ඩුවටත් මේ දේ වෙනවා. ඒ වගේම මේ දේ ඊටත් කලින් මේ ආණ්ඩුවට වෙන බව දැන් පේන්න තිබෙනවා’’