එදා අපි පාරේ කරපු අරගලය අද කරන්න වෙලා තියෙන්නේ රජයේ නිලධාරීන් එක්ක - අමාත්‍ය හදුන්නෙත්ති

Dec 29, 2024 at 07:07 AM

|

Lanka Leader

ජාතික ජන බලවේගය බලයට පත්වීමට පෙර ජනතාවගේ අයිතිවාසිකම් වෙනුවෙන් පාරට බැස කළ අරගලය දැන් රජයේ නිලධාරීන්ට ඒරෙහිව සිදු කිරීමට සිදුව ඇති බව  කර්මාන්ත අමාත්‍ය සුනිල් හඳුන්නෙත්ති මහතා පවසයි.

‘ශිල්පාභිමානී’ ජනාධිපති සම්මාන ප්‍රදානය කිරීමේ උත්සවයකට එක්වෙමින් ඔහු කියා සිටියේ ඇතැම් නිලධාරීන් ආණ්ඩුවේ ජනවරම නොතේරෙන බවත් තවමත් තම පැරණි තීන්දු, ගිවිසුම්, කැබිනට් තීරණ සහ ගැසට් නිවේදන මත රැඳී සිටින බවත්ය.

“අපි බලයට පත්වෙන්න කලින් ජනතාවගේ අයිතිවාසිකම් වෙනුවෙන්, නාස්තියට, මංකොල්ලකෑමට, වංචාවට, දූෂණයට විරුද්ධව, ආණ්ඩුවේ වැරදි වැඩ විවේචනය කරන්න පාරට බැහැලා අරගල කළා.දැන් අපිට අරගල කරන්න වෙලා තියෙන්නේ  රාජ්‍ය නිලධාරීන් එක්ක. ඔවුන්  ජනතාවට එරෙහිව ක්‍රියාකරමින්, ඔවුන්ට සහන නොදී, ඔවුන්ගේ අයිතිවාසිකම් කඩකරමින් හිටපු රජයන්ගේ ප්‍රතිපත්තිවලට අනුව දැන්  පැරණි ක්‍රියාදාමයන් වලින්  ඉවත් කිරීමේ ප්‍රශ්නයක් තිබෙනවා ජනවරම ඔවුන් පසුගිය ආණ්ඩු සමයේ අනුගමනය කළ ප්‍රතිපත්තිවලට එරෙහිව ජනාධිපති අනුර කුමාරට ජනවරමක් ලබාදුන් බව තේරුම් ගැනීමට අපහසු බව ඔහු පැවසීය.

මෙම තත්ත්වය නිලධාරීන්ට ඒත්තු ගැන්වීමට ද අපහසු බව පැවසූ අමාත්‍යවරයා, නිලධාරීන් තවමත් ඔවුන්ගේ පැරණි තීරණ, ගිවිසුම්, කැබිනට් තීරණ සහ ගැසට් නිවේදන මත රැඳී සිටින බවද පැවසීය.

“ජනතාවගේ අවශ්‍යතා සපුරාලීමට, ජාතික ආර්ථිකය ශක්තිමත් කිරීමට, දේශීය කර්මාන්ත ශක්තිමත් කිරීමට නොව විදේශ බලවේග, ආනයනකරුවන් සහ බහු ජාතික සමාගම් ශක්තිමත් කිරීමට පමණක් ඔවුන් තීරණ ගන්නා බවද ඔහු පැවසීය.