කියුබානු විප්ලවය ආරක්ෂා කිරිමට කළ හැකි උපරිම කැපවීම කරනවා- කියුබානුවෝ හවානා නුවරට රැස්වී එක හඬින් පවසති

Dec 21, 2024 at 10:26 PM

|

Lanka Leader

කියුබානු විප්ලවය ජයග්‍රහනය කළ මොහොතේ සිටම අමෙරිකානු එක්සත් ජනපද ආණ්ඩු කියුබානු විප්ලවය ආපසු හැරවීමට කටයුතු කළේය. ඒ සඳහා අමෙරිකා එක්සත් ජනපදය නොගත් ක්‍රියාමාර්ගයක් නැත. කියුබානු විප්ලවයේ අසාහය නායක ෆිදෙල් කැස්ත්‍රෝගේ ජීවිතය පැහැර ගැනීමට අමෙරිකා එක්සත් ජනපදය 637 වතාවක් උත්සහා කර තිබේ. මෙය ලෝකයේ කුමන හෝ රටක කුමන හෝ කාලයක නායකයෙකු ඝාතනය කිරීමට කළ අනවරත වැඩිම වාර ගණන ලෙස ඉතිහාසගත වන බව ලංකා ලීඩර් වෙබ් අඩවියේ අදහසයි. කියුබානු විප්ලවයේ නායකයා සිය ජීවිතයට සමුදී වසර ගණනක් ගතවී ඇත. කියුබානු විප්ලවයටද වසර 60ක් සම්පූර්ණ වී අවසන්ය. දැන් කියුබාවේ ජීවත්වන ජනගහනයෙන් විශාල පිරිසක් ෆිදෙල් කැස්ත්‍රෝගේ සන්නද්ධ සටන දැක ඇත්තේ ශ්‍රව්‍ය දෘෂ්‍ය මාධ්‍ය හරහාය. එසේ වෙතත් අමෙරිකානු ආණ්ඩු කියුබනු ජනයාගෙන් පලිගැනීම අවසන් කර නැත. පසුගිය දිනවල කියුබාව අමෙරිකානු සම්බාධක හේතුවෙන් ජාතියක් ලෙස අත් විඳි දරුණුතම අත්දැකීම අත් වින්දහ. ඒ මුළු රටටම විදුලිය නොමැති තත්වයක් ඇති කරලීමට අමෙරිකානු සම්බාධ්ක සමත් වීම නිසාය. එතරම් දුෂ්කරතා මාධ්‍යයේ වුවද කියුබානු ජනයා සිය විප්ලවය ආරක්ෂා කරන අයුරු ඊයේ(20) මුළු ලොවටම පෙන්වා සිටියහ. කියුබානු  හමුදා ජෙනරාල් රාවුල් කැස්ත්‍රෝ සහ කියුබානු ජනාධිපති මිගෙල් ඩයස්-කැනෙල් ඊයේ(20) හවානා  නුවරදී  එක්සත් ජනපද සම්බාධක වලට එරෙහිව මහජන බලමුලු ගැන්වීමට නායකත්වය දුන්හ.

එහිදී කියුබානු ජනයා  වොෂින්ටන් ප්‍රතිපත්තියේ කොටසක් ලෙස ක්‍රියාවට නැංවෙන අමෙරිකානු රාජ්‍ය දෙපාර්තමේන්තුවේ ත්‍රස්තවාදයට අනුග්‍රහය දක්වන රටවල් ලැයිස්තුවට කියුබාව ඇතුළත් කිරීම හෙළා දකිනු ලැබූහ.

එක්සත් ජනපද ඩිමොක්‍රටික් ජනාධිපති ජෝ බයිඩන් ධවල මන්දිරයෙන් පිටවීමට දින තිහකට පෙරද, කියුබාවට එරෙහිව රිපබ්ලිකන් ජනපති ඩොනල්ඩ් ට්‍රම්ප් (2017-2021) රජය විසින් පනවන ලද කුරිරු ආර්ථික බලහත්කාර පියවර සියල්ලම පාහේ බලාත්මකව පවතින බව රැස්ව සිටි ජනයා එක හඬින් මුළු ලොවටම ඇසෙන්නට කීහ.

කියුබානු ජනයා සම්බාධක යථාර්ථයට මුහුන දෙමින්, කියුබානු රජයේ ඉහල නිලධාරීන්, හවානා නුවර ජනයා සමග, කියුබානු ජනතාව වෙනුවෙන්,සමාජවාදී විප්ලවයේ නොනවතින  අරගලයට ඔවුන්ගේ සහයෝගය ප්‍රදර්ශනය කළහ.

කියුබාවේ ස්වෛරීත්වය සහ කියුබානුවන්ගේ අභ්‍යන්තර කටයුතුවලට මැදිහත් නොවීම සඳහා වූ අයිතිය ආරක්ෂා කිරීමට සූදානම් බව කියුබානු ජනයා එම අවස්ථාවේදී එක හඬින් ශපථ කළහ.