අදානිට එරෙහිව ඇමෙරිකානු අධිකරණයක අධිචෝදනා ගොනු වීමත් සමග ශ්‍රී ලංකාව සහ බංග්ලාදේශය අදානි සමග ගිවිසුම් යළි විමසා බැලීමේ තීරණයක්

Nov 26, 2024 at 06:20 AM

|

Lanka Leader

අල්ලස් දීමේ චෝදනාව මත ප්‍රකෝටිපති ඉන්දීය ව්‍යාපාරික ගෞතම් අදානිට එරෙහිව ඇමෙරිකානු අධිකරණයක අධිචෝදනා ගොනු වීමත් සමග බංග්ලාදේශය හා ශ්‍රී ලංකාව අදානි සමූහ ව්‍යාපාරය සමග අත්සන් තබා ඇති බලශක්ති සම්බන්ධ ගිවිසුම් නැවත විමසා බැලීමට තීරණය කර ඇති බව ඉන්දියාවේ ‘ද ඉන්ඩියන් එක්ස්ප්‍රෙස්’ පුවත්පත වාර්තා කරයි.

මේ අනුව අදානිට අයත් අදානි ග්‍රීන් එනර්ජි සමාගම බංගලාදේශය සමග අත්සන් තබා ඇති විදුලිය සැපයීමේ කොන්ත්‍රාත් ගිවිසුම් පිළිබඳව නැවත විමසා බැලීමට එරට අන්තර්වාර රජය තීරණය කර ඇත. ශ්‍රී ලංකාවේ සුළං මෝල් ව්‍යපෘතියක් අදානි සමාගමට ලබා දීමට පසුගිය රජය ගෙන තිබූ තීරණය සම්බන්ධයෙන් වත්මන් රජයේ කැබිනට් මණ්ඩලය විසින් තීරණයක් ගනු ඇති බව අදාළ පුවත්පත වාර්තා කර තිබේ.

ශ්‍රී ලංකාවේ මන්නාරම හා පුනරින් ප්‍රදේශවල අදානිට අයත් ග්‍රීන් එනර්ජි සමාගම විසින් ඇරඹීමට තීරණය කර තිබූ සුළං මෝල් ව්‍යපෘතියක් සඳහා හිටපු ජනාධිපති රනිල් වික්‍රමසිංහ මහතාගේ රජය විසින් අනුමැතිය ලබා දී තිබූ අතර එම අනුමැතිය සම්බන්ධයෙන් නැවත විමසා බැලීමට වත්මන් රජය තීරණය කර ඇති බවද මෙරට විදුලිබල මණ්ඩල නිලධාරීන් උපුටා දක්වමින් ද ඉන්ඩියන් එක්ස්ප්‍රස් පුවත්පත වාර්තා කර තිබේ. 

ජනාධිපති අනුර කුමාර දිසානායක මහතා ද පසුගියදා ශ්‍රේෂ්ඨාධිකරණය වෙත අදානි සමාගම විසින් ශ්‍රී ලංකාවේ ක්‍රියාත්මක කිරීමට යන සුළං මෝල් ව්‍යපෘතිය සම්බන්ධයෙන් නැවත සලකා බලන බව දැනුම් දී ඇතැයි ද එම පුවත්පත සඳහන් කරයි. 

මේ අතර බංග්ලාදේශ රජයද හිටපු අගමැතිනි ෂික් හසීනාගේ රජය විසින් අදානි සමාගම සමග ගිවිසුම් අත්සන් කර ඇති විදුලිය සැපයීමේ කොන්ත්‍රාත් ගිවිසුම් නැවත විමසා බැලීමට පිළිගත් නීතිමය හා විමර්ශන ආයතනයක සහාය ලබා ගැනීමට තීරණය කර තිබේ.

නිව්යෝර්ක් නගරයේ අධිකරණයක ඉන්දීය රජයේ නිලධාරීන්ට සිය සූර්ය බලශක්ති ව්‍යාපෘතීන් ක්‍රියාත්මක කිරීම සඳහා ඇමෙරිකානු ඩොලර් මිලියන 250 ක අල්ලස් මුදලක් ලබා දීමට පොරොන්දු වීමේ සිද්ධියක් සම්බන්ධයෙන් අදානිට හා ඔහුගේ සමාගමේ විධායක නිලධාරීන් 8 දෙනකුට එරෙහිව අධිචෝදනා ගොනු කර ඇති අතර 62 හැවිරිදි අදානි හා ඔහුගේ බෑණා වන 30 හැවිරිදි සාගර් අදානි අත්අඩංගුවට ගැනීමට එම අධිකරණය මගින් වරෙන්තු ද නිකුත් කර තිබේ.

-දිවයින