මහ ඡන්දය අදයි... අපේක්‍ෂකයන් 8888කින් 225ක් අද තෝරයි

Nov 14, 2024 at 06:38 AM

|

Lanka Leader

ශ්‍රී ලංකාවාසීන්ට සර්වජන ඡන්දබලය ලැබී වසර 93ක් සම්පූර්ණ වීමෙන් අනතුරුව පැවැත්වෙන දස වැනි පාර්ලිමේන්තුව සඳහා  සභිකයන් තෝරා පත්කර ගැනීමේ ඡන්ද විමසීම අද (14දා) පෙරවරු 7.00 සිට පස්වරු 4.00 දක්වා ඡන්ද මධ්‍යස්ථාන 13,421කදී පැවැත්වෙයි.

දේශපාලන පක්ෂ 49කින් හා ස්වාධීන කණ්ඩායම් 282කින් ඉදිරිපත් වූ අපේක්ෂකයන් 8,888 දෙදෙනකු අතරින් පාර්ලිමේන්තුවට මන්ත්‍රීවරුන් 225 දෙනකු තෝරා පත් කරගැනීමට අද ඡන්ද දායකයන් එක් කෝටි හැත්තෑ එක්ලක්ෂ හතළිස් දහස් තුන්සිය පනස් හතර (17,140,354) දෙනකු ඡන්දය ප්‍රකාශ කිරීමට සුදුසුකම් ලබා ඇත.

මහජනතාවගේ ඡන්දයෙන් සභිකයින් 196 දෙනකුද, ජාතික ලැයිස්තුව මගින් සභිකයින් 29 දෙනකුද තෝරා පත්කර ගැනීමට නියමිතය.

මෙවර මැතිවරණයේදී ඡන්දදායිකාවන් සඳහා පමණක් වෙන්වූ ඡන්ද මධ්‍යස්ථාන සංඛ්‍යාව 107 කි. සමස්ත ඡන්ද මධ්‍යස්ථාන 13,421 අතුරින් 6,147 ක් තනි පෝලිමකින්ද, 7,274 ක් පෝලිම් දෙකකින්ද යුතු බව මැතිවරණ කොමිෂන් සභාව කියයි.

ඡන්ද මධ්‍යස්ථාන සඳහා නිලධාරීන් ද එක්ලක්ෂ පනස් දෙනෙක් (152,000ක්) පමණ යොදවා ඇති අතර ඡන්ද මධ්‍යස්ථාන ආරක්ෂා කිරීම සඳහා පොලිස් නිලධාරීන් විසිහත් දහසක් (27,000ක්) පමණ යොදවා තිබේ.

මැතිවරණයේ ඡන්දය විමසීමේ කටයුතු පස්වරු 4.00ට අවසන් වීමෙන් පසු තැපැල් ඡන්දය ගණන් කිරීමේ කටයුතු පස්වරු 4.15 ට පමණ ආරම්භ කිරීමට මැතිවරණ කොමිෂන් සභාව කටයුතු යොදා ඇත. අනෙකුත් ඡන්ද ගණන් කිරීමේ කටයුතු රාත්‍රී 7.15 ට පමණ ආරම්භ කරන බවද එම කොමිසම සඳහන් කරයි.

මැතිවරණ කොට්ඨාස 22 හි ගණන් කිරීමේ මධ්‍යස්ථාන 54 කදී ඡන්දය ගණන් කිරීමේ කටයුතු සිදු කෙරෙන අතර, ගණන් කිරීමේ ශාලා සම්පූර්ණ සංඛ්‍යාව 1,582 කි. මෙම ශාලා අතුරින් 452 කදී තැපැල් ඡන්දය ගණන් කිරීමේ කටයුතු සිදු කෙරෙන අතර,සාමාන්‍ය ඡන්ද ගණන් කිරීමේ ශාලා සංඛ්‍යාව 1,582 කි. ඡන්දය ගණන් කිරීමේ කටයුතු සඳහා නිලධාරීන් 80,000 ක් යොදවා තිබේ.

පාර්ලිමේන්තු මැතිවරණයේ පළමු ඡන්ද ප්‍රතිඵලය රාත්‍රී 12.00 ට පෙර නිකුත් කිරීමට බලාපොරොත්තු වන බවද එම කොමිසම කියයි.